ބާރު ބޮޑުވެ، ބީއެމްއެލްގެ ކޯލު ސެންޓަރުގެ ހިދުމަތަށް ބުރޫއަރައިފި

ބޭންކު އޮފް މޯލްޑިވްސް (ބީއެމްއެލް) އިން ކާޑުތަކުން ކުރެވޭ ޑޮލަރު މުޢާމަލާތްތަކަށް ގެނައި ބަދަލާ ގުޅިގެން، ބޭންކުގެ ކޯލް ސެންޓަރަށް ކަސްޓަމަރުން ގުޅާ މިންވަރު އިތުރުވުމާއި ގުޅިގެން ބޭންކް ގެ ކޯލު ސެންޓަރުގެ ހިދުމަތަށް ބުރޫ އަރައިފިއެވެ.

ބީއެމްއެލުން އެކްސް ގައި ކުރި ޕޯސްޓެއްގައި ބުނީ،  ކޯލުތައް ގިނަވެ ހިދުމަތައް ބުރޫއެރި ނަމަވެސް ސޯޝަލް މީޑިއާ އިންޓަނެޓް ބޭންކިން މެދުވެރިކޮށް ބޭންކާ މުއާމަލާތް ކުރެވޭނެ ކަމަށެވެ.

ކާޑުތަކުން ކުރެވޭ ބޭރުގެ މުޢާމަލާތްތަކާ ގުޅޭ އިތުރު މަޢުލޫމާތު ބޭންކުގެ ވެބްސައިޓުން ލިބެން ހުންނާނެ ކަމަށާއި، ޚިދުމަތް ހޯދުމުގައި ދިމާވާ ދަތިތަކަށް މަޢާފަށް އެދޭ ކަމަށް ވެސް ބީއެމްއެލުން ވަނީ ބުނެފައެވެ.

މިއަދުން ފެށިގެން ބީއެމްއެލްއިން ވަނީ ރުފިޔާ ކާޑުތަކުން ކުރެވޭ ޑޮލަރު މުޢާމަލާތްތައް މުޅިން ހުއްޓާލައި، ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓް 100 ޑޮލަރަށް ތިރިކޮށްފައެވެ. މި ބަދަލުގެ ދަށުން:

•މިހާރު ދޫކޮށްފައިވާ ޑެބިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭނެ.

•މިއަދުން ފެށިގެން އަލަށް ދޫކުރާޑެބިޓް އަދި ކްރެޑިޓްކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތްކުރުމަށް އެއްވެސް އަދަދެއް ނުލިބޭނެ.

•މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓްކާޑުތައް: މަހެއްގެމައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުން.

ބީއެމްއެލުން ބުނީ މިއީ ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުންދިޔަ ނަމަވެސް ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައިވާތީ ގެނައި ބަދަލެއް ކަމަށެވެ.