އެމް.އެން.ޔޫ "ފަހި ފުރުސަތު" 2026 ގައި ބައިވެރިވުމުގެ ފަހު ފުރުސަތު
ލިޔުންތެރިޔާ
ޚަދީޖާ އަރުފާ
ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އިންތިޒާމުކުރާ "ފަހި ފުރުސަތު" 2026 ފެސްޓިވަލްގައި ބައިވެރިވުމަށް ވަޒީފާދޭ ފަރާތްތަކަށް ހުޅުވާލާފައިވާ މުއްދަތު މާދަމާ ހަމަވާނެ ކަމަށް އެ ޔުނިވަރސިޓީން ބުނެފިއެވެ.
އެމް.އެން.ޔޫ އިން މަޢުލޫމާތު ދޭ ގޮތުގައި، މި ފެސްޓިވަލްގައި ބައިވެރިވާން ޝައުޤުވެރިވާ ކުންފުނިތަކާއި ސަރުކާރުގެ މުއައްސަސާތަކުން ފޯމު ހުށަހެޅުމުގެ އެންމެ ފަހު ތާރީޚަކީ މާދާރޭ 23:00 އެވެ. މި ހަރަކާތަކީ ދަރިވަރުންނާއި، ދަސްވެނިންނާއި، ވަޒީފާ ހޯދާ ފަރާތްތަކުގެ އިތުރުން ވަޒީފާދޭ ފަރާތްތައް އެއް ފުރާޅެއްގެ ދަށުން ބައްދަލުވެ، ހުނަރުވެރި ފަރާތްތަކާއި ވަޒީފާގެ ފުރުޞަތުތައް ގުޅުވައިދިނުމަށް ބާއްވާ ވަރަށް މުހިންމު ހަރަކާތެކެވެ.
މި އަހަރުގެ "ފަހި ފުރުސަތު" ފެސްޓިވަލް ބޭއްވުމަށް ހަމަޖެހިފައިވަނީ ޖޫން މަހުގެ 03 އިން 05 އަށެވެ. މި ފެސްޓިވަލް ކުރިއަށްދާނީ ކަނޑައެޅިފައިވާ އެ ދުވަސްތަކުގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ. މި ހަރަކާތް އެމް.އެން.ޔޫގެ ހުރިހާ ކެމްޕަސްއެއްގައި ކުރިއަށްދާނެ ކަމަށް އެ ޔުނިވަރސިޓީން ބުނެއެވެ.
މި ފެސްޓިވަލްގެ ތެރެއިން އެކި މުއައްސަސާތަކާއި ކުންފުނިތަކުގައި ހުރި ވަޒީފާގެ ފުރުޞަތުތަކާއި، އިންޓަރންޝިޕް އަދި ތަމްރީނު ޕްރޮގްރާމްތަކުގެ މަޢުލޫމާތު ދިނުމުގެ ފުރުޞަތު ބައިވެރިވާ ފަރާތްތަކަށް ލިބިގެންދާނެއެވެ. ހަމައެއާއެކު، ވަޒީފާ ހޯދާ ފަރާތްތަކަށް އެކި ދާއިރާތަކުން ހުރި ކުރިއެރުމުގެ މަގުތައް ދެނެގަނެ، ވަޒީފާދޭ ފަރާތްތަކާ ސީދާ ބައްދަލުކޮށް މަޝްވަރާކުރުމުގެ ފުރުޞަތުވެސް މި ފެސްޓިވަލްގެ ތެރެއިން ފަހިވެގެންދާނެއެވެ.
މި ހަރަކާތުގައި ބައިވެރިވާން ބޭނުންވާ ވަޒީފާދޭ ފަރާތްތަކުން ތިރީގައިވާ ލިންކު މެދުވެރިކޮށް ފޯމު ހުށަހެޅުއްވުމަށް އެމް.އެން.ޔޫ އިން އިލްތިމާސްކުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
