މި ދައުރުތެރޭގައި، ޤާރީންގެ ދަތިކަން ހުރި ހުރިހާ ރަށެއްގައި އެ މައްސަލަ ހައްލުކުރަން މަސައްކަތް ކުރާނަން: ޑރ.ޝަހީމް

މި ދައުރު ނިމުމުގެ ކުރިން، ޤާރީންގެ ދަތިކަން އޮތް ހުރިހާ ރަށެއްގައި އެ މައްސަލަ ޙައްލުކުރުމަށް މަސައްކަތްކުރައްވާނެ ކަމަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު ޝަހީމް މިއަދު ވިދާޅުވީ، ޤުރުއާން އުނގަންނައިދިނުމުގައި ޤާރީންގެ ދަތިކަށް އޮތް ރަށްތަކުގެ ތެރެއިން 6 ރަށަކަށް، ރާއްޖެއިން ބޭރުގެ ޤުރުއާން ހިތުދަސް ޤާރީން މިއަދު މާލެ އަންނާނެ ކަމަށެވެ.

އަދި އެ ބޭފުޅުން އެ ރަށްތަކުގައި ޤުރުއާން މަރުކަޒުގެ ގޮފިތަކުގައި ކިޔަވައި ދިނުމުގެ އިތުރުން މިސްކިތުގައި ޤުރުއާން ހިތު ދަސްކުރާ ކްލާސްތައް ހިންގާނެ ކަމަށާ، މިކަންކަން ކުރިއަށްދާނީ ކައުންސިލްތަކުގެ ބެލުމުގެ ދަށުންކަންވެސް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، މި މުދައްރިސުންނަށް މުސާރަ ދެވޭނީ ޤުރުއާން މަރުކަޒު މެދުވެރިކޮށް ޒަކާތު ފަންޑުގެ ފީ ސަބީލިالله ބައިން ކަމަށެވެ.

އިރާދަ ކުރެއްވިއްޔާ މިދަތިކަން ހައްލުވެ ރަށްތަކުގައި މީހުން އުފެދެންދެން މިކަންކަން ދެމިއޮންނާނެ. މި ދަތިކަން އޮތް ހުރިހާ ރަށެއްގައި މި ދައުރުގައި މިކަން ޙައްލުކުރުމަށް މަސައްކަތްކުރާނަން.

ވަޒީރު ޑރ. މުހައްމަދު ޝަހީމް

ހިލޭ ސާބަހަށް ޤުރުއާން އުނގަންނައި ދިނުން ފުޅާ ކުރުމަކީ ރައީސް ޑރ މުއިއްޒުގެ މެނިފެސްޓޯގައި ހިމެނޭ މުހިންމު ވަޢުދެކެވެ.

ވަޒީރު އިތުރަށް ވިދާޅުވީ، މީގެ އަހަރު ތަކެއް ކުރިން ރާއްޖޭގެ ބޮޑެތި މިސްކިތްތަކުގައި ހިފްޒުކޮށް ތަރާވީސް ކުރަން ވަރަށް ގިނަ ފަހަރު ބޭރު މީހުން ވަނީ ގެނެވިފައިވާ ކަމަށާ ނަމަވެސް ހާފިޒުން އުފެއްދުމުގެ މަޝްރޫޢުތައް ފަށައި ކުރެވުނު މަސައްކަތްތަކުން މިކަމުގައި މިއަދު ހެޔޮ ނަތީޖާ ފެންނަމުންދަކަމީ ކޮންމެ މީހަކު އުފާ ވާނެ ކަމެއް ކަމަށެވެ.

އެގޮތުން، ޒުވާން ޙާފިޒުންގެ ތެރެއިން ވަރަށް ގިނަ ޙާފިޒުންނަކީ އިސްލާމިކް މިނިސްޓްރީގެ 500 ހާފިޒުންގެ މަޝްރޫޢުގެ ދަސްވެނިންކަން ވަޒީރު ފާހަގަކުރެއްވިއެވެ.

ވަޒީރު މިހެން ވިދާޅުވެފައިވާއިރު، މާލޭގެ ބޮޑެތި މިސްކިތް ތަކުގައި ރަމަޟާން މަހުގައި ތަރާވިސް ނަމާދު ކުރުމަށް މިނިސްޓްރީން ކަނޑައަޅާފައިވަނީ ޒުވާން ދިވެހި ހާފިޒުންކަން ފާހަގަކޮށްލަންޖެހެއެވެ.