އުމްރާއަށް ގޮސް އުޅެނިކޮށް ގެއްލުނު މީހާ ފެނިއްޖެ
ލިޔުންތެރިޔާ
އަބްދުﷲ ހުސައިން
އުމްރާގެ އަޅުކަން އަދާކުރަން މައްކާއަށްގޮސް އުޅެނިކޮށް ގެއްލުނު ޏ. ފުވައްމުލަކު/ ސްޓެއްލާ، އުމުރުން 63 އަހަރުގެ ހުސައިން މުހައްމަދު ދީދީ ފެނިއްޖެއެވެ.
ހުސައިން ދީދީ ފެނިފައިވާކަމަށް އޭނާގެ ގްރޫޕް ޔަލަމްލަމް އިން ވަނީ ޔަގީންކޮށްދީފައެވެ. އެ ޖަމާއަތުން ބުނީ ހުސައިން ދީދީ ފެނިފައިވާކަމަށާއި ފެނުނުއިރު ހުރީ ހެޔޮހާލުގައި ކަމަށެވެ. ވޮއިސްއަށް މައުލޫމާތު ލިބިފައިވާ ގޮތުގައި ހުސައިން ދީދީ ފެނިފައިވަނީ ފަރިހައްޖުއުމްރާ ގްރޫޕުން އުމްރާއަށްދިޔަ މީހުންނަށެވެ.
"އަޅުގަނޑުމެން ގްރޫޕްގެ ބައިވެރިން ގޮވައިގެން ބާޒާރު ދަތުރަށް ހޮޓަލުން ނިކުމެ ތިއްބައި ދިވެހި ދިދަ ފެނިގެން ފާހަގަކުރެވިގެން ހުސައިން ދީދީ އަޅުގަނޑުމެން ކައިރިއަށް އައީ" ފަރިހައްޖުއުމްރާ ގްރޫޕަށް ނިސްބަތްވާ މީހަކު ފޭސްބުކްގައި ކުރި ޕޯސްޓެއްގައި ބުންޏެވެ.
އުމްރާގެ އަޅުކަން ދާކުރުމަށް ހުސައިން މުހައްމަދު، ސައުދީއަށް ގޮސްފައިވަނީ ޔަލަމްލަމް ޖަމާއަތުގެ އުމްރާވެރިންނާއެކު އިއްޔެގެ ފްލައިޓުންނެވެ. އޭނާ ގެއްލުނީ އުމްރާގެ އަޅުކަން ފުރިހަމަ ކުރުމަށް ސަޢީ ކުރަނިކޮށް އާއިލާއާ ވަކިވެގެން ކަމަށް އެ ޖަމާއަތުން ވަނީ ބުނެފައެވެ.
ހައްޖުގެ އަޅުކަން އަދި އުމްރާއަށް ގޮސް އުޅެނިކޮށް މީގެކުރިންވެސް ދިވެހިން ގެއްލުމުގެ ހާދިސާތައް ހިނގާފައި އެބަހުއްޓެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
