ކޮމިޓީން ދިރާސާ ކުރުމަށްފަހު، ވަޒީރުންނަށް ރުހުންދޭން ނިންމުމުން، މަޖިލީހުން އެކަން ކުރަންޖެހޭނެ: ރިޔާޒު

ރައްޔިތުންގެ މަޖިލީހުގެ ކޮމިޓީން ދިރާސާ ކުރުމަށްފަހު، ސަރުކާރުގެ ވަޒީރުންގެ ޝަރުތު ހަމަވާ ކަމަށް ކަނޑައަޅައި، އެ ވަޒީރުންނަށް ރުހުން ދިނުމަށް ނިންމުމުން، މަޖިލީހުގެ ތަޅުމުން އެ ވަޒީރުންނަށް ރުހުން ދޭންޖެހޭ ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު އަބްދުالله ރިޔާޒް ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުން، މަޖިލިސް ދައުރު ނިމުނު އިރުވެސް ކުރިއަށް ނުގެންދެވިފައި ވާއިރު، މިއަދު ދައުރުން ބޭރުން ޖަލްސާއެއް ބާއްވައިގެން އެ މަސައްކަތް ކުރުން ވަނީ ފަށާފައެވެ.

އެގޮތުން، ރުހުން ދިނުމާއި ގުޅޭގޮތުން ކޮމިޓީން އެކުލަވާލި ރިޕޯޓަށް ބަހުސް ކުރައްވަމުން ރިޔާޒް ވިދާޅުވީ، ގާނޫނު އަސާސީގައި ވަޒީރުންގެ ކިބާގައި ހުރުމަށް ކަނޑައަޅާފައިވާ ޝަރުތުތައް ހަމަވާ ބޭފުޅުން އެ މަގާމަށް އައްޔަން ކުރެއްވުމުން، އެ ބޭފުޅުންނަށް މަޖިލީހުން ރުހުން ދޭން ޖެހޭ ކަމަށެވެ.

މި މަޖިލީހުން، އެކަމާއި ގުޅުން ހުރި ކޮމިޓީން، އެކަން ބަލައި ދިރާސާކޮށް ހެދުމަށް ފަހުގައި، ގާނޫނު އަސާސީގެ 130 ވަނަ މާއްދާގައި، ބުނާ ހުރިހާ ޝަރުތުތަކެއް ފުރިހަމަވާ ކަމަށް ކަނޑައަޅާ، ކޮމިޓީން އެ އޮތީ ހުރިހާ ބޭފުޅުންނަށްވެސް މަޖިލީހުން ރުހުންދޭން ފެންނަ ކަމަށް ނިންމާފައި. އަޅުގަނޑު ދެކޭގޮތުގައި، މަޖިލީހުގެ ކަމާގުޅޭ ކޮމިޓީން ނިންމާފައި އޮތް ނިންމުމަކީ ރަނގަޅު ނިންމުމެއް. ރައީސުލްޖުމްހޫރިއްޔާ ހުށަހަޅާފައިވާ ނަންތައް ގާނޫނު އަސާސީއާ ތަޢާރުޒު ނުވާ ކަމަށް ވަންޏާ، އެންމެ ފުރަތަމަ މި ހުށަހެޅި ކެވިނެޓަށް އަޅުގަނޑުމެން ހުރިހާ އެންމެން ރުހުން ދޭންޖެހޭ.

ތިމަރަފުށީ ދާއިރާގެ މެންބަރު އަބްދުالله ރިޔާޒް

ރިޔާޒު ވިދާޅުވީ ވަޒީރުންނާއި ގުޅޭ އެއްވެސް މައްސަލައެއް އޮތް ނަމަ، ކޮމިޓީ މަރުހަލާގައި އެކަމެއް ބަލައި ނިންމައި، މަޖިލީހުގެ ތަޅުމަށް ފޮނުވާނެ ކަމަށެވެ. އެހެން ނަމަވެސް، އެފަދަ އެއްވެސް މައްސަލައެއް ފޮނުވާފައި ނުވާ ކަމަށް އޭނާ ވިދާޅުވި އެވެ.

އެހެންކަމުން، ރިޔާޒު ވަނީ ކޮމިޓީން ނިންމާފައިވާ ނިންމުމާއި އެއްގޮތަށް ހުރިހާ ވަޒީރުންނަށް ވެސް ރުހުން ދިނުމަށް އެދިވަޑައިގެންފައެވެ.