ބޭނުންވަނީ ވިލިމާލެ، އެ ފެހިކަންމަތީ ބާއްވައިގެން މަޝްރޫޢުތައް ކުރިއަށްގެންދަން: ރައީސް
ލިޔުންތެރިޔާ
އަބްދުﷲ ހުސައިން
އަދުގެ ސަރުކާރުގެ ސިޔާސަތަކީ ވިލިމާލެ މިހާރުވެސް ފެންނަ ފެހިކަން މަތީ ބައްވައިގެން މަޝްރޫޢުތައް ކުރިއަށްގެންދިއުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
"ދަ ޕަލްސް" ނަމުގައި ރައީސުލްޖުމްހޫރިއްޔާގެ އޮފީހުން ފެށި ޕްރޮގްރާމްގައި ވާހަކަދައްކަވަމުން ރައީސް ޑރ.މުއިއްޒު ވަނީ މި ސަރުކާރުން ތިމާވެށީގެ ކަންކަން ކުރިއަށްގެންދާގޮތުގެ މައްޗަށް އަލިއަޅުވާލައްވައި ވާހަކަދައްކަވާފައެވެ. އެގޮތުން ވިލިމާލޭގައި ހައުސިން މަޝްރޫޢު އަދި އެނޫންވެސް ބައެއް މަޝްރޫޢުތައް ކުރިއަށްގެންދަން ބޮޑެތި ގަސްތައް ނަގަންޖެހިފައިވާ މައްސަލާގައި ރައީސް ވިދާޅުވީ، މި ސަރުކާރުން ވިލިމާލެ ބާއްވާނީ މިހާރުވެސް އެ ފެންނަ ފެހިކަންމަތީގައި ކަމަށެވެ.
އެގޮތުން މިފަހުން ހައުސިން މަޝްރޫޢު ހިންގަން ގަސްތައް ނަގަންޖެހުމުން ހައުސިން އިމާރާތްތައް އަޅާ ސަރަހައްދަށް ބަދަލުގެނެސް ގަސްތައް އެ ހުރިގޮތަށް ބެހެއްޓުމަށް ނިންމާފައިވާކަން ރައީސްގެ ވާހަކަފުޅުގައި ފާހަގަކުރެއްވިއެވެ. ރައީސް ވިދާޅުވީ ވިލިމާލޭގައި ހޮސްޕިޓަލް އަޅަން ނިންމާފައިވާ ސަރަހައްދުން ގަސް ކޮންމެވެސް ވަރަކަށް ނަގަންޖެހުނު ނަމަވެސް، އެހެންތަންތަނުގައި ގަސްތައް އިންދުމުގެ ކަންކަން ކުރިއަށްދާނޭަކަމަށެވެ. އެގޮތުން ވަގުތީގޮތުން ގަސްތައް ނެގިނަމަވެސް އެހެންތަންތަނުގައި ގަސްތައް އިންދައި އޭގެ ބަދަލު ފަހުން ފެންނާނޭކަމަށް ރައީސް ފާހަގަކުރެއްވިއެވެ.
އަޅުގަނޑުމެން ބޭނުން ވިލިމާލެއަކީ ފެހިތަނެއްގެ ގޮތުގައި، ފެހިކޮށް ބާއްވަން. ދެން އަބަދުވެސް މާލެއާ ގުޅިފައި އެފަދަ ތަނެއް އޮތުން ވަރަށް މުހިންމު. ޒަމާންސުރެ އޮތް މި ރީތިކަން ޤާއިމުކޮށް ރަނގަޅަށް ބޭނުން. އަލުން ތަރައްޤީވެސް ކުރަން ބޭނުން
ރައީސް ޑރ.މުއިއްޒު
ރައީސް ވިދާޅުވީ މި ސަރުކާރުން ތަރައްޤީގެ މަޝްރޫޢުތައްވެސް ކުރިއަށްގެންދާނީ ތިމާވެށި ހިމާޔަތްކުރުމާ ގުޅިލާމެހިގެންދާނޭ ގޮތަށް ކަމަށެވެ. ތިމާވެށި ހިމާޔަތްކޮށް ކުރިއެރުވުމުގައި ރާއްޖެއަކީ އެހެން ޤައުމުތަކަށް ނަމޫނާއެއްގެ ގޮތުގައި ދައްކަން ބޭނުންވާކަމަށް ރައީސް ވަނީ ވިދާޅުވެފައެވެ.
ފަސް މިލިއަން ގަސް އިންދުމުގެ ޕްރޮގްރާމާ ގުޅޭގޮތުން ރައީސް ވިދާޅުވީ، އެ މަސައްކަތް ތާވަލްކޮށްފައިވާ ގޮތަށް ކުރިއަށް ގެންގޮސް ނިންމޭނޭކަމަށެވެ. އެގޮތުން ރައްޔިތުންގެ އެއްބާރުލުމާއެކު ކުރިއަށްގެންދާ މިފަދަ ކަންތައްތަކުގެ ނަތީޖާ ހޯދުމުގައި ރައްޔިތުންގެ ބައިވެރިވުން މުހިންމުކަން ރައީސް ފާހަގަކުރެއްވިއެވެ.
ސަރުކާރުން އަމާޒުހިފާފައިވާ ފަސް މިލިއަން ގަސް އިންދުމުގެ ޕްރޮގްރާމްގެ ދަށުން މިހާތަނަށް 1.6 މިލިއަނަށްވުރެ ގިނަ ގަސް ވަނީ އިންދާފައެވެ.
ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅިގެން، ފަސް މިލިއަން ގަސްއިންދުމުގެ ޕްރޮގްރާމް ފައްޓަވާފައިވަނީ 2024 ވަނަ އަހަރުގެ ޖޫންމަހުގެ ފަސްވަނަ ދުވަހުއެވެ. ވެރިކަމުގެ ފަސް އަހަރުގެ ތެރޭގައި ފަސް މިލިއަން ގަސް އިންދުމަކީ ސަރުކާރުގެ މެނިފެސްޓޯގައި ހިމެނޭ ރައީސް މުޢިއްޒުގެ ރިޔާސީ ވައުދެކެވެ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
