ބޫޓު ގަންނާނެ ފައިސާ ނެތުމުން ބޫޓުގައި ދަވާދުލައިގެން ބޭނުންކުރިން: އުގެއިލް

ކުޑައިރުގައި ސްކޫލަށް ދިއުމަށް ބޫޓު ގަންނާނެ ފައިސާ ނެތުމުން ބޫޓުގައި ދަވާދު ހާއްކައިގެން ބޭނުންކުރެއްވިކަމަށް ދިވެހިރާއްޖޭގެ ފުރަތަމަ ޕްރޮފެސަރ ހަސަން އުގެއިލް ވިދާޅުވެއްޖެއެވެ.

އުގެއިލް މިހެން ވިދާޅުވީ ގއ.އަތޮޅު ތައުލީމީ މަރުކަޒުގެ އަހަރީ އިނާމު ދިނުމުގެ ޖަލްސާގައި ވާހަކަދައްކަވަމުންނެވެ.

ކުޑައިރުގެ ހަނދާންތަކުގެ ވާހަކަދައްކަވަމުން އެބޭފުޅާ ވިދާޅުވީ ހިތަދޫގައި އުޅުނު އިރުގައި އެރަށު ނޫރާނީ ސްކޫލުން ޖާގަ ލިބިގެން ޔުނީފޯމާއި ބޫޓު ގަންނާނެ ފައިސާއެއް ނެތްކަމަށެވެ. އެހެންކަމުން އުގެއިލްގެ ގޭތެރޭ ހާވަމުން ގެންދަވަނިކޮށް ފެނުނު ކަޅު ބޫޓެއްގައި ދަވާދު ހާއްކައިގެން ބޭނުންކުރެއްވި ކަމަށް އުގެއިލް ވިދާޅުވިއެވެ.

"ފައިސާ ނެތިގެން އަޅުގަނޑު ގޭތެރެ ހާވަމުން ދަނިކޮށް އަޅުގަނޑަށް ފެނުނީ ކަޅު ކުލައިގެން ބޫޓެއް. ބޭނުން ވަނީ ހުދު ބޫޓެއް. ދެން އަޅުގަނޑަށް ފެނުނީ ކައިރީގަ ހުރި ދަވާދު ހުދު ދަވާދު ދަޅެއް. ހުދު ދަވާދު ދަޅުން ބޫޓުގަ ކުލަ ޖައްސައިގެން އަޅުގަނޑު އެއް އަހަރު ދުވަސްވަންދެން ސްކޫލަށް ދިޔައިން،" ޕްރޮފެސަރ އުގެއިލް ވިދާޅުވިއެވެ.

މި ޖަލްސާގައި ވާހަކަފުޅު ދައްކަވަމުން އުގެއިލް ވިދާޅުވީ ފޯނުތަކުގެ ބަދަލުގައި ދަރިވަރުން ފޮތްތަކަށް އަހުލުވެރިވާންޖެހޭކަމަށެވެ.