މިއީ ރާއްޖެއަށް އެންމެ ހޫނުގަދަ ދުވަސްވަރު، ހޫނުމިން އިތުރަށް މަތިވުމުގެ ފުރުސަތުވެސް އެބައޮތް!

މިއީ ރާއްޖެއަށް އެންމެ ހޫނުގަދަ ދުވަސްވަރު ކަމަށް މޫސުމާއި ބެހޭ އިދާރާ (މެޓް އޮފީސް) އިން ހާމަކޮށްފިއެވެ.

މެޓް އޮފީހުން އެކްސްގައި ކުރި ޕޯސްޓެއްގައި ބުނީ، މާޗު އަދި އޭޕްރީލް މަހަކީ އަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗަށް ދާ ދުވަސްވަރު ކަމަށެވެ. އަދި މި ދުވަސްވަރު، ވިލާ މަދުވުމާއި ވައި މަޑުވުން އަދި ވައިގެ ތެތްކަން މަތިކޮށް ހިފެހެއްޓިފައި ހުރުމުގެ ސަބަބުން ވައިގެ ހޫނުމިނަށްވުރެ އިހްސާސް ކުރެވޭ ހޫނުމިން މަތިވާ ކަމަށް ވެސް އެއިދާރާއިން މައުލޫމާތުދެއެވެ.

މީގެ އިތުރުންވެސް މެޓް އޮފީހުން ބުނީ، މި އަހަރަކީ އެލްނީނޯ އަހަރެއް ކަމުން ހޫނުމިން އިތުރަށް މަތިވުމުގެ ފުރުސަތު އޮތްކަން ދުނިޔޭގެ މޫސުމާބެހޭ ޖަމިއްޔާއިން ލަފާކޮށްފައިވާ ކަމަށެވެ. އެލްނީނޯ އަހަރަކީ މެދުތެރެއާއި އިރުމަތީ ޓްރޮޕިކަލް ޕެސިފިކް ކަނޑުގެ ސަރަހައްދު ހޫނުވުން، ނުވަތަ ކަނޑުގެ ސަރަހައްދުގެ ފިނިހޫނުމިން އެވްރެޖަށްވުރެ މަތިވާ މަތިވުމަށް ދެވިފައިވާ ނަމެކެވެ.

މޫސުމާބެހޭ ގައުމީ އިދާރާއިން ބުނީ ދުވަހުގެ ހޫނުމިން އާއްމު ގޮތެއްގައި އެންމެ މައްޗަށްދާނީ މެންދުރުފަހު 2:00 ހާއިރު ކަމަށެވެ. ހޫނުމިން 40 ޑިގްރީ ސެލްސިއަސް އަށް ވުރެ މައްޗައްދާނެ ކަމަށް ވެސް މޫސުމާބެހޭ ގައުމީ އިދާރާއިން ލަފާކުރެއެވެ.

ހޫނުގަދަ ވުމުގެ ސަބަބުން، ދިމާވާ ސިއްހީ މައްސަލަ ތަކުގެ ތެރޭގައި، ހަށިގަނޑުން ފެން މަދުވެ ކުޑަކަމުދެވޭ މިންވަރު މަދުވުމާއި ލޮލަށް ލިބޭ ގެއްލުން ހިމެނެއެވެ. މީގެ އިތުރުންވެސް، ވަރުދެރަވުމާއި، ބޮލުގައި ރިއްސާ ބޯ އަނބުރައި، ހަންގަނޑު ކުރަކިވެ ހަންފޮޅުމަށް ވެސް މެދުވެރިވެއެވެ.

މިކަންކަމުން ސަލާމަތްވުމަށްޓަކައި، ގިނަ ގިނައިން ދިޔާތަކެތި ބޭނުން ކުރުމާއި، ހޫނު ގަދަ ވަގުތު ހާއްސަކޮށް ކުޑަކުދިން ބޭރަށް ނުނެރުމާއި، ސަން ލޯޝަނާއި އަވި އައިނު ބޭނުން ކުރުމަށް ކަމާބެހޭ ފަރާތްތަކުން އިލްތިމާސް ކުރެއެވެ.