ފެނަކަ ކޯޕަރޭޝަން އެސް.ޓީ.އޯގެ ސަބްސިޑަރީއަކަށް ބަދަލުކުރަން ނިންމަވައިފި

އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖައްސަން ރައީސް ނިންމަވައިފިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ފެނަކަ ކޯޕަރޭޝަން ލިމިޓެޑް (ފެނަކަ) ގެ ސައްތައިންސައްތަ ހިއްސާ، ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް (އެސް.ޓީ.އޯ.) އަށް ބަދަލުކޮށް، އެސް.ޓީ.އޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސުމަށް ނިންމަވާފައެވެ. މި ނިންމެވުން ނިންމެވީ 25 އޯގަސްޓު 2024 ގައި ބޭއްވުނު ވަޒީރުންގެ މަޖިލީހުގެ ބައްދަލުވުމުގައި މިނިސްޓަރ އޮފް ފިނޭންސް ހުށަހެޅުއްވި ކަރުދާހަކާ ގުޅިގެންނެވެ.

މި ނިންމެވުމުގެ މައިގަނޑު މަޤްޞަދަކީ ޔުޓިލިޓީ ސެކްޓަރ ހަރުދަނާކުރުމާއި، ރައްޔިތުންނަށް ދެވޭ ޚިދުމަތުގެ ފެންވަރު ރަނގަޅުކުރުމާއި، ފެނަކައިގެ ހިންގުން ހަރުދަނާކޮށް މާލީގޮތުން ބާރުވެރިކުރުމެވެ. މި ބަދަލާ ގުޅިގެން އެސް.ޓީ.އޯގެ އަސާސީ ގަވާއިދަށް ބަދަލުތަކެއް ގެނެވޭނެއެވެ. އަދި ފެނަކައިގެ ގަވަރނަންސް ހަރުދަނާކޮށް، ވިޔަފާރީގެ ހަރަކާތްތައް ސްޓްރީމްލައިންކުރުމުގެ އިޚްތިޔާރު އެސް.ޓީ.އޯއަށް ލިބިގެންދާނެއެވެ.

މުވައްޒަފުންނާ ގުޅޭގޮތުން، ފެނަކައިގެ މުވައްޒަފުންގެ އަދަދު ކަނޑައެޅުމުގެ އިޚްތިޔާރު އެސް.ޓީ.އޯއަށް ލިބިގެންދާނެއެވެ. ނަމަވެސް، ސަރުކާރުގެ މައިގަނޑު ސިޔާސަތާ އެއްގޮތަށް، ވީވަރަކުން މުވައްޒަފުން ވަކިނުކޮށް، އެހެން ތަންތަނަށް ބަދަލުކުރެވޭނެ ގޮތްތަކެއް ބެލުމަށް ވަނީ ނިންމާފައެވެ.

މި ބަދަލު ގެނައުމުގެ މަސައްކަތްތައް ކުރިއަށް ގެންދިއުމަށް މިނިސްޓްރީ އޮފް ފިނޭންސް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، އަދި އެސް.ޓީ.އޯގެ ބޭފުޅުން ހިމެނޭ ކޮމިޓީއެއް އުފައްދާ، 2024 ވަނަ އަހަރުގެ ނިޔަލަށް މި މަސައްކަތް ނިންމުމަށް ވަނީ ނިންމާފައެވެ.

މި ބަދަލަކީ ޔުޓިލިޓީ ސެކްޓަރަށް އަންނަ ބޮޑު ބަދަލެއްކަމަށް ބެލެވޭއިރު، މީގެ ސަބަބުން ފެނަކައިގެ ޚިދުމަތްތަކަށް އިތުރު ކުރިއެރުންތަކެއް ލިބި، ކުންފުނީގެ މާލީ ޙާލަތު ރަނގަޅުވެގެންދާނެ ކަމަށް އުންމީދުކުރެވެއެވެ.