ތިން މަސް ތެރޭ ދިރާސާތައް ނިންމާ، މިއަހަރު ތެރޭގައި ބްރިޖްގެ އަމަލީ މަސައްކަތް ފެށޭނެ: މުއްޠަލިބު

މިސްރުގެ ކުންފުންޏެއް ކަމަށްވާ "ދަ އަރަބް ކޮންޓްރެކްޓާސް - އޮސްމާން އަހުމަދު އޮސްމާން އެންޑް ކޯ" އާއި މިއަދު ހަވާލު ކުރި ހިތަދޫ-ހުޅުމީދޫ ގުޅުވާލާ ރާއްޖޭގެ އެންމެ ބޮޑު ބްރިޖްގެ އެޅުމަށް ކުރަންޖެހޭ ދިރާސާތައް ކުރިއަށް އޮތް ތިން މަސް ދުވަސްތެރޭ ނިންމާ، މި އަހަރުތެރޭ މި ބްރިޖް ގެ އަމަލީ މަސައްކަތް ފެށިގެންދާނެ ކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

ބްރިޖުގެ ސާވޭ އާއި ޕްރިލިމިނަރީ ޑިޒައިން މަސައްކަތް ހަވާލުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބް ވިދާޅުވީ މިއަދު އެ ކުންފުންޏާއި އެކު ސޮއި ކުރެވިގެން ދިޔަ އެއްބަސްވުމާއެކު ބޭނުންވާ ދިރާސާތައް ހެދި، ޑިޒައިންތައް ހެދުމުގެ އިތުރުން މި ޕްރޮޖެކްޓަށް ދާނެ ޚަރަދުތައް އެނގި ކަށަވަރުވެގެން ދާނެ ކަމަށެވެ.

އެއާއި އެކު އީސީޕީ ކޮންޓްރެކްޓެއްގެ ތެރެއަށް ވަދެވިގެންދާނެ ކަމަށާއި މިއަދު އެއްބަސްވެގެން ދިޔައީ މި ކޮންޓްރެކްޓާއި ހަމައަށް ދިއުމަށްޓަކައި ބޭނުންވާ ހުރިހާ މައުލޫމާތެއް ހޯދުމަށްޓަކައި ކުރަން ޖެހޭ ދިރާސާތަކާއި ކުރަން ޖެހޭ އިންޖިނިއަރިން މަސައްކަތްތައް ކުރުމަށް ކަމަށެވެ.

" އިރާދަ ކުރެއްވިއްޔާ ކުރިއަށް އޮތް ތިން މަސް ދުވަސް ތެރޭގައި މި މަސައްކަތް ނިމި ފައިނޭންސް ހޯދުމުގެ މަސައްކަތް ސަބްކޮންޓްރެކްޓަރސް އިންކޮށް، އަޅުގަނޑުމެންނަށް މިއަހަރު ތެރޭގައި އަމަލީ މަސައްކަތް ފެށިގެންދާނެ ކަމީ އަޅުގަނޑުމެން ވަރަށް ބޮޑަށް ޔަގީން ކުރާ ކަމެއް."

ވަޒީރު މުއްޠަލިބް ވިދާޅުވިއެވެ.

ވަޒީރު މުއްޠަލިބް ވިދާޅުވީ  އައްޑޫ ސިޓީގައި އަޅާ ބްރިޖަކީ އެންމެ މަދުވެގެން 14 ކިލޯމީޓަރުގެ ބްރިޖަކަށް ވާނެ ކަމަށެވެ. އަދި ރައީސް ޑރ.މުއިއްޒު ސަރުކާރާ ހަވާލުވެވަޑައިގެން، އެ ބްރިޖުގެ މަޝްރޫއު އިއުލާން ކުރެއްވުމާއެކު ގިނަ ބަޔަކު ޝައުގުވެރިކަން ފާޅު ކުރި ކަމަށާއި އޭގެ ތެރޭގައި ޗައިނާގެ ބޮޑެތި ކުންފުނިތައް ވެސް ހިމެނޭ ކަމަށެވެ. ނަމަވެސް އަރަބް ކޮންޓްރެކްޓާސްއާ މަޝްރޫއު ހަވާލު ކުރެއްވުމަށް ނިންމެވީ އެ ކުންފުނިން މުޅި މަޝްރޫއު އެއްކޮށް ނިންމަން ޝައުގުވެރިކަން ފާޅުކޮށްފައިވާތީ ކަމަށް ވަޒީރު މުއްޠަލިބު ވިދާޅުވިއެވެ.

މީގެ އިތުރުންވެސް ވަޒީރު މުއްޠަލިބް ވިދާޅުވީ މި މަޝްރޫއުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ އައްޑޫ ސިޓީގެ ކައުންސިލާއި ރައްޔިތުންނާއި މަޝްވަރާ ކުރެވިގެން ރައްޔިތުން ބޭނުންވާ ގޮތަށް ކަމަށެވެ. އަދި މި ބްރިޖަކީ އައްޑޫ ސިޓީއަށް ކުރިއެރުމާއި ތަރައްގީ ގެންނާނެ ބްރިޖެއް ކަމަށާއި، މި މަޝްރޫއު ގެ ސަބަބުން އެހެން އަތޮޅުތަކުން ވެސް މީހުން ހުޅުމީދޫއަށް ހިޖުރަކޮށް ރަށް އިތުރަށް ތަރައްގީ ވެގެންދާނެ ކަން ވެސް އެބޭފުޅާ ފާހަގަ ކުރެއްވިއެވެ.

މިއަދު ކުރިއަށް ދިޔަ މި ރަސްމިއްޔާތުގައި ބްރިޖުގެ ސާވޭ އަދި ޕްލިމިނަރީ ޑިސައިން މަސައްކަތުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުالله މުއްޠަލިބެވެ. އަދި އަރަބް ކޮންޓްރެކްޓަރސްގެ ފަރާތުން ސޮއިކުރެއްވީ އެ ކުންފުނީގެ ބޯޑު މެންބަރު، ހީބާ އަހުމަދުއެވެ.

މި އަހަރުގެ ބަޖެޓުގައި ހިތަދޫ-ހުޅުމީދޫ ބްރިޖުގެ ސާވޭ ހެދުމަށް 30 މިލިއަން ރުފިޔާ ވަނީ ހިމަނާފައެވެ. ނަމަވެސް ދަ އަރަބް ކޮންޓްރެކްޓާސް އިން އެ މަސައްކަތް ހިލޭ ކޮށްދޭން ޝައުގުވެރިކަން ފާޅުކޮށްފައިވާ ކަމަށް ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވަނީ މީގެ ކުރިން ވިދާޅުވެފައެވެ.

ރައީސް ޑރ.މުއިއްޒުގެ ރިޔާސީ ވައުދުފުޅުގެ ދަށުން ހިތަދޫ އާއި ހުޅުމީދޫ ގުޅާލުމަށް އަޅާ ބްރިޖުގެ ދިގު މިނަކީ އެންމެ މަދުވެގެން 14 ކިލޯ މީޓަރެވެ. ރާއްޖޭގައި ފުރަތަމަ އެޅި ސިނަމާލެ ބްރިޖުގެ ދިގު މިނަކީ 1.3 ކިލޯ މީޓަރެވެ. މާލެ އާއި ވިލިމާލެ އަދި ތިލަފުށި ގުޅާލުމަށްޓަކައި އަޅަމުންދާ ބްރިޖުގެ ދިގުމިނަކީ 6.7 ކިލޯ މީޓަރެވެ. އެހެންކަމުން މިއީ މިހާތަނަށް ރާއްޖޭގައި އަޅާ އެންމެ ބޮޑު ބްރިޖް ކަން ފާހަގަކޮށްލެވެއެވެ.