ލުތުފީ އެމްބަސީގައި އަރާމުގައި އުޅޭމަންޒަރު ބަލާކަށް ދިވެހިންނަށް ފަސޭހައެއް ނުވާނެ: ޒައިދު

3 ނޮވެންބަރުގައި ރާއްޖެއަށް ދިން އުދުވާނީ ހަމަލާގެ އިސް މޭސްތިރިއަކަށް ހުރި ހ. ހާޖަރާގެ އަބްދުﷲ ލުތުފީ ސްރީ ލަންކާގައި ހުރި ދިވެހި އެމްބަސީގައި އުޅެމުންދަނިކޮށް، އައްޝައިޚު އަލީ ޒައިދު މިއަދު ކުރެއްވި ޓުވީޓެއްގައި ވިދާޅުވީ، ރާއްޖެއަށް ޓެރަރިސްޓް ހަމަލާދީ، އެތައް ބަޔަކު ޝަހީދުކޮށްލި މީހަކު އަދަބަށް ފިލައިގެން ގޮސް، އަދަބުގެ މުއްދަތުގައި ދިވެހި އެމްބަސީއެއްގެ ތެރޭގައި އަރާމުގައި އުޅޭ މަންޒަރަކީ ދިވެހިންނަށް ބަލަން ފަސޭހަ މަންޒަރަކަށް ނުވާނެ ކަމަށެވެ.

ޒައިދު ވިދާޅުވީ އެއީ އެތައް ބައެއްގެ ބަދު ދުއާ ޖެހިދާނެ ކަމެއް ކަމަށާއި މިހުންނަނީ ގޯސް ކަންތައްތައް ކަމަށެވެ.

3 ނޮވެންބަރު 1988 ގައި ހިންގި އުދުވާނާއި ގުޅިގެން ރައީސް މައުމޫންގެ ސަރުކާރުގައި ހިންގި ޝަރީއަތުގައި ލުތުފީގެ މައްޗަށް ވަނީ މަރުގެ ހުކުމް އިއްވާފައެވެ. ނަމަވެސް ފަހަކަށް އައިސް ރާއްޖޭގައި މަރުގެ ހުކުމް ތަންފީޒު ނުކުރާތީ، އެހުކުމް އުމުރު ދުވަހުގެ ޖަލު ހުކުމަކަށް ބަދަލުކުރިއެވެ. އެހުކުމާއެކު ލުތުފީ ޖަލުގައި ހުއްޓައި ބޭސްފަރުވާއަށް ލަންކާއަށް ފޮނުވާލީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2010 ވަނަ އަހަރުގެ ޖެނުއަރީމަހުގެ 16 ގައެވެ. އެދުވަހަށްފަހު ލުތުފީ ލަންކާގައި ދިރިއުޅެނީ ފިލައިގެންނެވެ.

ނަމަވެސް ލަންކާގައި ހިންގި ޓެރަރިޒަމްގެ ހަމަލާއާއި ގުޅިގެން އެގައުމުގައި ގަވައިދާ ހިލާފަށް އުޅޭ ބިދޭސީން ޑީޕޯޓް ކުރުމަށް ފުލުހުން ހިންގި އޮޕަރޭޝަނުގައި، އެންމެ ފަހުން ލުތުފީ ހިމާޔަތް ހޯދުމަށް އެގައުމުގައި ހުރި ދިވެހި އެމްބަސީއަށް ވަނީ މިއަހަރުގެ ޖޫން މަހުގެ އެއްވަނަ ދުވަހުއެވެ. ލުތުފީ އެމްބަސީގައި ދިރިއުޅޭކަން ފަޅާއަރުވާލީ ކުރީގެ ހޯމް މިނިސްޓަރު އުމަރު ނަސީރެވެ. އޭގެ ތިން ދުވަސް ފަހުން މިމަހުގެ 24 ގައި ރާއްޖޭގެ ފޮރިން މިނިސްޓްރީން ވަނީ ބަޔާނެއް ނެރެފައެވެ.

ލުތުފީ 48 ގަޑިއިރުގެ ތެރޭގައި ރާއްޖެ ގެނެވޭތޯ މަސައްކަތް ކުރާ ކަމަށް ޕޮލިސް ކޮމިޝަނަރު މުހައްމަދު ހަމީދު މިދިޔަ އަންގާރަ ދުވަހު މީޑިއާގައި ވިދާޅުވި ނަމަވެސް އެ މުއްދަތު މިދިޔަ ބުރާސްފަތި ދުވަހުގެ ރެއަށް ހަމަވި އިރު ވެސް ލުތުފީއެއް ނުގެނެވުނެވެ.

އަދި އދ. ގެ ނިޒާމުތަކުގެ ތެރެއިން ލުތުފީ ކޮންމެވެސް ވަރެއްގެ ހިމާޔަތެއް ހޯދަން އެދުނު ލިޔެކިޔުންތަކެއް ގެންގުޅުމާއި ގާނޫނާ ޚިލާފަށް ލަންކާގައި ދިގު މުއްދަތެއް ވަންދެން ދިރިއުޅުމުން ދިއުމާ އެކު، އޭނާ ރާއްޖެ ވަގުތުން ގެނައުމުގައި ދަތިތަކެއް ކުރިމަތިވި ކަމަަށް ހަމީދު ބައެއް މީޑިއާގައި ވިދާޅުވެފައިވެއެވެ.