ހުޅުމާލޭގެ ސެންޓްރަލް ޕާކަށްގޮސް މިއަދު ފުޅަނދުތައް ބަލާލެވޭނެ: އެޗްޑީސީ

މިނިވަންދުވަހާ ގުޅުވައިގެން އެޗްޑީސީން ތައްޔާރުކުރި ފުޅަނދަށް ބޮޑު ތަރުހީބެއް ލިބުމާ ގުޅިގެން މިއަދުވެސް ހުޅުމާލޭގައި ފުޅަނދު ދައްކާލުން ކުރިއަށްދާނޭކަމަށް އެ ކުންފުނިން ބުނެފިއެވެ.

ދިވެހިރާއްޖޭގެ 60 ވަނަ މިނިވަންދުވަސް ފާހަގަކުރުމުގެ ގޮތުން އެޗްޑީސީން ތައްޔާރުކުރި ފުޅަނދު ހުޅުމާލޭގެ މަގުތަކުގައި ދައްކާލާފައިވާއިރު އެ ހަރަކާތައް ބޮޑު ތަރުހީބެއް ވަނީ ލިބިފައެވެ. އެޗްޑިސީގެ ފުޅަނދު ދައްކާލުމަށް ޖުލައި 28 ވަނަ ދުވަހުގެ ރޭ ނިންމި ނަމަވެސް މޫސުން ގޯސްވުމުގެ ސަބަބުން އެ ހަރަކާތް ވަނީ ކެންސަލްކޮށްފައެވެ.

އެޗްޑީސީން ސެންޓްރަލް ޕާކްގައި މިއަދު ހަވީރު ފުޅަނދު ދައްކާލުމަށް ނިންމާފައިވަނީ، 4 ކުން 6 ޖެހުމާ ހަމަޔަށެވެ. ފުލަނދު ރޭގަނޑު ދައްކާލުން ކުރިއަށްދާނީ 8 ކުން 10 ޖެހުމާ ހަމަޔަށެވެ.

އެޗްޑީސީން މިނިވަން ދުވަހާ ގުޅިގެން ފުޅަނދުތައް ތައްޔާރުކޮށްފައިވަނީ 'މައިންކްރާފްޓް' ތީމަށް، ހުޅުމާލޭގެ އެކި މަންޒަރުތައް ދައްކުވައިދޭ ގޮތަށެވެ. އެގޮތުން ހުޅުމާލޭގެ އެކިއެކި ލޭންޑްމާކްތައް ދައްކުވައިދޭ ގޮތަށް މި ފުޅަނދުތައް ތައްޔާރުކޮށްފައިވަނީ 100 އިންސައްތަ އެޗްޑީސީގެ މުވައްޒަފުންގެ މަސައްކަތުން ދެ ހަފްތާގެ ތެރޭގައިކަމަށް އެޗްޑިސީން ބުނެއެވެ.

އެޗްޑިސީން ބުނީ، މިއީ މިނިވަން 60 ކުލަގަދަކޮށް ފާހަގަކުރުމަށް ސަރުކާރުން ކުރިއަށްގެންދާ ހަރަކާތްތަކަށް އެއްބާރުލުން ދިނުމުގެ ގޮތުން ކުރިއަށްގެންދެވުނު ހަރަކާތެއް ކަމަށާއި، ފުޅަނދު ގިނަ ބަޔަކަށް، ވަކިން ހާއްސަކޮށް ފުޅަނދު ބަލަން ނުކުތް ކުޑަކުދިންގެ މެދުގައި މަގްބޫލުކަމެއް ލިބިގެންދިޔަކަމަށެވެ.

އެޗްޑީސީ ބުނީ އަމާޒަކީ ކުރިއަށްއޮތްތަނުގައިވެސް މިފަދަ ދުވަސްތަކާ ގުޅުވައިގެން ސަރުކާރުން ކުރާ މަސައްކަތްތަކަށް އެއްބާރުލުންދީ، ހުޅުމާލޭގައި ދިރިއުޅޭ ރައްޔިތުންގެ ބައިވެރިވުމާއެކު މިފަދަ ދުވަސްތައް ކުލަގަދަކޮށް ފާހަގަކުރުން ކަމަށެވެ.