މަސްތުވާތަކެތި ޓްރެފިކްކުރި ފަތުރުވެރިއަކު ޖޫރިމަނާކޮށް، އުމުރަށް ޖަލަށްލާން ހުކުމްކޮށްފި

ރާއްޖެއށް މަސްތުވާތަކެތި ޓްރެފިކްކުރި ފަތުރުވެރިއަކު 1 ލައްކަ ރުފިޔާއިން ޖޫރިމަނާކޮށް، އުމުރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.

މި މައްސަލައިގައި ކޯޓުން ހުކުމްކޮށްފައިވަނީ ބ. މާޅޮހަށް ޗުއްޓީ ހޭދަކުރަން ދިޔަ ކެނެޑާ ފަތުރުވެރިއެއް ކަމަށްވާ ސްކޮޓް ވިލިއަމް އާމްސްޓޮރޯންގް ގެ މައްޗަށެވެ.

މިގޮތުން، ސްކޮޓް ވިލިއަމް އާމްސްޓޮރޯންގް ތުނޑި ވިލެޖް އެންޑް ސްޕާ މޯލްޑިވްސްގެ ރޫމް ނަމްބަރު 102ގައި މަސްތުވާތަކެތި ގެންގުޅެ އޭގެ ވިޔަފާރިކުރިކަމަށް ފުލުހުންނަށް ލިބުނު މައުލޫމާތަކާއި ގުޅިގެން  ކޯޓު އަމުރެއްގެ ދަށުން އެ ކޮޓަރި ބަލައި ފާސްކުރަން ފެށުމުން، އެކަމުގައި ފުލުހުންނަށް އެއްބާރުލުން ދޭނެކަމަށް ބުނެ އޭނާ ވަނީ އެ ކޮޓަރީގައި ހުރި މިނީބާ ތެރެއިން މަތިޖެހި ކޮންޓެއިނަރެއް ފުލުހުންނާ ހަވާލުކޮށްފައެވެ.

މި ކޮންޓެއިނަރުތެރޭ އޮތް ރަބަރު ޕެކެޓަކުން ފެނުނު ދެ ގުޅައިގައި 26.8 ގްރާމު ކެނެބިސް ހުރިކަމަށާއި، މިނީ ބާ ކައިރީ ބަހައްޓާފައި ހުރި ކަޅު ލަގެޖެއްގެ ތެރޭ އޮތް ކޮންޓެއިނަރަކުން ފެނުން ރަބަރު ޕެކެޓުގައި އޮތް ދެ ގުޅައިގައި 0.1 ގްރާމު ކެނެބިސް ހުރިކަމަށް ތަހުލީލީ ރިޕޯޓުތަކުން ވަނީ ހާމަވެފައެވެ.

އެކޮޓަރިން ފެނުނު މަސްތުވާތަކެއްޗަކީ ސްކޮޓް ވިލިއަމް އާމްސްޓޮރޯންގް ގެ ތަކެތި ނޫންކަމަށް ބުނެ އޭނާ ވަނީ ތުހުމަތުތަކަށް އިންކާރުކޮށްފައެވެ. މިގޮތުން އޭނާ ބުނީ، އެއީ ފަތުރުވެރިއަކަށްވާތީ، އެހެންމީހުންނާއި، ގެސްޓް ހައުސްގައި މަަސައްކަތްކުރާ މީހުންނަށް ކޮންމެ ވަގުތަކު ވެސް އެ ކޮޓަރިއަށް ވަދެވޭނެކަމަށެވެ.

އެހެންނަމަވެސް، މި މައްސަލައިގައި ކްރިމިނަލް ކޯޓުން ވަނީ، މަސްތުވާތަކެއްޗާ ބެހޭ ގާނުނުގެ 143ވަނަ މާއްދާއަށް ބަލައި އޭނާގެ މައްޗަށް ތަހުމަތުކުރި ކުށް ސާބިތުވާތީ، 1 ލައްކަ ރުފިޔާއިން ޖޫރިމަނާކޮށް، އޭނާ ޖަލުގައި ހޭދަކުރި މުއްދަތު އުނި ކުރުމަށްފަހު، 24 އަހަރާއި 6 މަހާއި 21 ދުވަހަށް އޭނާ ޖަލަށް ލުމަށް ހުކުމްކޮށްފައެވެ.