ވަޒީފާގައި އަންހެނުންނަށް ކުރިމަތިވާ ހުރަސްތައް ނައްތާލަން މަސައްކަތް ކުރާނަން: ޝިދާތާ
ނިންމުން ނިންމާ ފެންވަރުގެ މަޤާމުތަކަށް އަންހެނުން ދިޔުމުގައި ކުރިމަތިވާ ހުރަސްތައް ނައްތައިލުމަށް ކުރަން ޖެހޭ މަސައްކަތްތައް ކުރައްވާނެ ކަމަށް ޖެންޑަރ މިނިސްޓަރ ޝިދާތާ ޝަރީފު ވިދާޅުވެއްޖެއެވެ.
ދައުލަތުގެ މުއައްސަސާތަކާއި ސަރުކާރު ޙިއްޞާވާ ކުންފުނިތަކުގައި، ޤާނޫނުތަކުން އަންހެނުންނަށް ކަށަވަރުކޮށްދީފައިވާ ޙައްޤުތައް ތަންފީޛުކުރާ މިންވަރު ބެއްލެވުމަށްޓަކައި އެތަންތަނަށް ކުރަން ނިންމާފައިވާ ޒިޔާރަތުގެ ތެރެއިން މޯލްޑިވްސް ކަސްޓަމްސް ސަރވިސްއާއި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަދި އެލައިޑް އިންޝުއަރެންސް ކޮމްޕެނީގެ މެނޭޖްމަންޓާއި އަންހެން މުވައްޒަފުންނާ ބައްދަލުކުރައްވައި، ޖެންޑަރ އިކުއަލިޓީގެ ޤާނޫނާއި ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނު ތަންފީޛުކުރާ މިންވަރު ވަނީ މިނިސްޓަރ ޝިދާތާ ވަނީ އޮޅުން ފިލުއްވާފައެވެ.
އެ ޒިޔާރަތުގައި މިނިސްޓަރ ޝިދާތާ ވަނީ ވަޒީފާގެ މާޙައުލުގައި އަންހެނުންނާ މެދު ކުރެވޭ ތަފާތުކުރުންތަކާއި ނިންމުން ނިންމާ ފެންވަރުގެ މަޤާމުތަކަށް އަންހެނުން ދިޔުމުގައި ކުރިމަތިވާ ހުރަސްތައް ނައްތައިލުމަށް ކުރަން ޖެހޭ މަސައްކަތްތައް ކުރައްވާނެ ކަމުގެ ފުރިހަމަ ޔަޤީންކަން އަރުއްވައިފައެވެ.
ރާއްޖޭގެ އާބާދީގައި އަންހެނުންގެ ނިސްބަތަކީ ގާތްގަނޑަކަށް ފިރިހެނުންނާ އެއް ހަމައެއްކަން ފާހަގަކުރައްވައި، ތަޢުލީމު ހާސިލުކުރާ އަންހެން ކުދިންގެ ނިސްބަތް ފިރިހެން ކުދިންނަށް ވުރެ އިތުރު ކަމުގައި ވިޔަސް، އެ ކަންކަން ވަޒީފާގެ މާޙައުލުގައި ނުފެންނަ ކަމަށް އެ ކަމަނާ ވަނީ ވިދާޅުވިއެވެ. އަދި އެ ބާވަތުގެ ތަފާތުތައް ޙައްލުކުރުމަށް ޤާނޫނަށް ގެންނަން ޖެހޭ ބަދަލުތައް ގެންނަން ޖެހޭ ނަމަ، އެ ކަމަށް ވެސް ގަދަ އަޅައި މަސައްކަތްކުރައްވަން ތައްޔާރަށް ހުންނެވި ކަމަށް އެ ކަމަނާ ފާހަގަކުރެއްވިއެވެ.
މިނިސްޓަރ ޝިދާތާ ވަނީ އޮފީހުގެ މަޙައުލުގައްޔާއި ގޭތެރޭގެ މާޙައުލުގައި ކުރެވޭ މިންތީގެ ތަފާތުކުރުންތަކާ ދެކޮޅަށް ތެދުވުމަށް އަންހެން މުވައްޒަފުންނަށް ވަނީ އިލްތިމާސްކުރައްވާފައެވެ. އަދި އެ ފަދަ ތަފާތުކުރުންތައް ނައްތައިލެވޭނީ، އަންހެނުން އެ ކަމަށް ނުކުމެގެން ކަން ވެސް މިނިސްޓަރ ޝިދާތާ ފާހަގަކުރެއްވިއެވެ.
ޤާނޫނުތަކުން އަންހެނުންނަށް ކަށަވަރުކޮށްދީފައިވާ ޙައްޤުތައް ތަންފީޛުކުރާ މިންވަރު ބެއްލެވުމަށްޓަކައި ދައުލަތުގެ އިތުރު މުއައްސަސާތަކާއި ސަރުކާރު ޙިއްޞާވާ ކުންފުނިތަކަށް މިނިސްޓަރ ޝިދާތާ ޒިޔާރަތްކުރެއްވުމަށް ވަނީ ހަމަޖެހިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
