އަޅުގަނޑުމެން މިތިބީ ވިއްދާފައި، ވިއްދި ވިއްދީނުން މި ސަރުކާރު ވައްޓާލާނަން: ޝާހިދު

އެމްޑީޕީން ނުކުމެ، މި ސަރުކާރު ބަލި ކޮށްލައި، ސަރުކާރު ވައްޓާލާނެ ކަމުގެ އިންޒާރު އެ ޕާޓީގެ ރައީސް އަބްދުالله ޝާހިދު ދެއްވައިފިއެވެ.

އެމްޑީޕީން ”ގާނޫނު އަސާސީގެ ދިފާޢުގައި“ ނަމުގައި ރޭ ބޭއްވި ކަންމަތީ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ، ގާނޫނު އަސާސީގެ ދިފާޢުގައި އެމްޑީޕީން ބާއްވަމުންދާ ސިލްސިލާ ބައްދަލުވުންތަކަށް ސަރުކާރުން ހުރަސް އަޅަމުންދާ ކަމަށެވެ. އެހެން ނަމަވެސް، އެފަދައިން ކަންކޮށްގެން އެމްޑީޕީ ފަހަތަށް ޖައްސައިނުލެވޭނެ ކަމަށާ، އެ ޕާޓީ ނުކުމެ އޮތީ ވަރަށް ކެރިގެން ކަމަށް އޭނާ ވިދާޅުވިއެވެ.

”އަޅުގަނޑުމެން 31 ވަނަ ދުވަހު މި ނުކުންނަނީ އަޅުގަނޑުމެންނަކީ ކެރިގެން ރާއްޖޭގެ ރައްޔިތުންނަށް ހެޔޮ ވެރިކަން ކޮށްދިނުމުގެ ހަމައެކަނި ރައްޔިތުންނަށް އޮތް އުއްމީދު ކަމުގައިވާ ޕާޓީ ކަމުގައިވާތީ. މި މަސައްކަތަކަށް ރާއްޖޭގައި މިއޮތް ޚުދުމުޚުތާރު ސަރުކާރަކަށް ހުރަހެއް ނޭޅޭނެ. އަޅުގަނޑުމެން މިއަދުގެ ސަރުކާރު ބަލިކޮށްލާނީ ނިކަން ނަލަކޮށް ނިކަން ފަރިކޮށް.“ ޝާހިދު ވިދާޅުވިއެވެ.

އަޅުގަނޑުމެން މިތިބީ ވިއްދާފައި. ހަމަ ވިއްދި ވިއްދީނުން މި ސަރުކާރު ވައްޓާލާނީ. ވިއްދި ވިއްދީނުން ވައްޓާލާނީ.

އެމްޑީޕީގެ ރައީސް އަބްދުالله ޝާހިދު

މީގެ އިތުރުން ރޭގެ ޖަލްސާގައި ވާހަކަ ދައްކަވަމުން ޝާހިދު ވަނީ 21 އަހަރު ނުފުރޭ މީހުންނަށް ސިނގިރޭޓް ނުވިއްކޭ ގޮތަށް ހެދުމުން އެކަމަށްވެސް ވަރަށް ބޮޑަށް ފާޑު ވިދާޅުވެފައެވެ.

އެގޮތުން ވިދާޅުވީ، 18 އަހަރު ފުރިފައިވާ ކޮންމެ މީހަކީ ޒިންމާ އުފުލުމުގެ ގާބިލިއްޔަތުކަން ލިބިގެންވާ މީހެއް ކަމަށާ، އެމީހުންނަށް ވޯޓު ލުމާއި، ކައިވެނި ކުރުމާއި ޖިނާއީ ކުށުގެ ޒިންމާ ނަގަންޖެހޭ ކަމަށެވެ.

”މި އުޅޭ ކަމަކީ ކިހާ ވަރަކަށްތޯ 18 އަހަރު ފުރި 21 އަހަރު ނުފުރޭ ޒުވާނުން ބަސް ބުނަނީ ބެލުން. އެ ކުދިން ޗުއްޕު ވެސް ނުބުނެ މިކަމުގައި ތިބެއްޖެނަމަ ދެން އަންނަން އޮތީ މަޖިލީހުގައި އޮތް ސުޕަމެޖޯރިޓީ ބޭނުންކޮށްގެން ވޯޓު ލެވޭނީ 21 އަހަރުވުމުން ކަމަށް ގާނޫނުއަސާސީ ބަދަލުކުރުން. ސިނގިރޭޓާ ބެހޭ ގޮތުން ކުރައްވާފައި އޮތް ކަމަކީ ވަކަރަށް ޖެހުން“ ޝާހިދު ވިދާޅުވިއެވެ.

މިއާއެކު ޝާހިދު ވިދާޅުވީ، 18 އަހަރު ފުރިފައުވާ އެންމެނަށް ވޯޓު ލެވޭ ގޮތް ހަދާފައިވަނީ އެމްޑީޕީން ވަރަށް ބުރަ މަސައްކަތް ކޮށްގެން އެޕާޓީން ކަމަށެވެ. އަދި އެ ހައްގު ނިގުޅައިގަންނައިރު ބަލަން ނުތިބޭނެ ކަމަށްވެސް ވިދާޅުވިއެވެ.