އެމްޑީޕީން މޭޑޭގައި ބޮޑު އެއްވުމެއް ބާއްވަނީ

މަސައްކަތްތެރިންގެ ދުވަސް، މޭޑޭގައި އިދިކޮޅު އެމްޑީޕީން ވެރިރަށް މާލޭގައި ބޮޑު އެއްވުމެއް ބާއްވަން ނިންމައިފިއެވެ.

މި އެއްވުން ބާއްވަން ހަމަޖެހިފައިވަނީ  އެ ރޭގެ 8:30 ގައި އާޓިފިޝަލް ބީޗުންނެވެ.

މިކަމާ ގުޅޭގޮތުން މައުލޫމާތު ދެއްވަމުން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވީ، ރައްޔިތުންގެ ހައްގުތައް ކަށަވަރު ސަރުކާރުން ކުރަން ހުރި ކަންތައްތަކަށް ވަކާލާތުކޮށް އަޑު އުފުލުމަކީ އެމްޑީޕީން އަބަދުވެސް ކުރާ ކަމެއް ކަމަށާ މޭޑޭ ހަރަކާތުގެ ތެރެއިންވެސް އެކަން ކުރައްވާނެ ކަމަށެވެ.

އަދި ސަރުކާރު ޖަވާބުދާރީ ކުރުވުމަށް ކުރަންޖެހޭ ކަންކަން އެމްޑީޕީން ކުރަމުންދާނެ ކަމަށްވެސް އޭނާ ވިދާޅުވުއެވެ.

ބިގޭ ވިދާޅުވީ، ރާއްޖޭގައި މިވަގުތު، އަސާސީ ދަތިކަމެއް ތަހަންމަލުކުރަން ނުޖެހޭ އެއްވެސް މީހަކު ނެތް ކަމަށާ، ގިނަ ބައެއްގެ ހައްގުތަކަށް ސަރުކާރުން އަރައިގެންފައިވާ ކަމަށް އޭނާ ތުހުމަތުކުރެއްވިއެވެ.

"އަސާސީ ހައްގުތަކުން ފަށާމާ. ކޮންމެ ރައްޔިތަކު ބޭނުންވޭ ބަނޑުފުރާނަ މުއްތިކޮށްގެން ކައިގެން ބޮއިގެން އުޅެން. އަލިކަން އެ ބޭނުންވޭ. އެކަމަކު ސަބްސިޑީގެ އުނިކަން އައިސްފައި އޮތް ވަރުން އެކަންކަމަށް އޭގެ އަސަރު ކުރަމުން އެ ދަނީ. އޭގެ އިތުރުން، އެންމެ އަސާސީ އެއް ކަމަކީ ސިއްހަތު. ގަދަވެ ސަލާމަތުން ހުރުން. އެ ބޭސް ލިބުމުގައި ދަތިކަން އެބަހުރި. ލިބެންޖެހޭ ޚިދުމަތް ލިބުމުގައި ދަތިކަން އެބަހުރި،" އޭނާ ވިދާޅުވިއެވެ.

މީގެ އިތުރުން ސިޔާސީ ނުފޫޒުގެ ސަބަބުން، ސަރުކާރާ ކުޑަކޮށްވެސް ޚިޔާލުތަފާތު މީހެއް ނަމަ، މިނިވަންކަމާއެކު ވަޒީފާގައި ހުރުމުގެ ފުރުސަތެއް މިހާރު ނެތް ކަމަށާ، ސިޔާސީ ބޭނުމަށއޓަކައި، އިގްތިޞާދުގައި ނެތް މިންވަރުން ވަޒީފާތައް ދެމުންދާ ކަމަށްވެސް އޭނާ ވިދާޅުވިއެވެ.