ރަމަޟާން މަހަށް އަސާސީ ތަކެތި އަގު ހެޔޮ ކުރުމުގެ މަސައްކަތް އެސްޓީއޯ މެދުވެރިކޮށް ވަނީ ފެށިފައި: ރައީސް

މާދަމާ ފެށޭ ބަރަކާތްތެރި ރަމަޟާން މަހު އަސާސީ ހުރިހާ ބާވަތެއްގެ ކާބޯތަކެތި އެސްޓީއޯއިން ގެނެސް ހެޔޮ އަގުގައި ވިއްކުމުގެ މަސައްކަތް މިހާރު ފަށާފައިވާ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެ އެވެ.

ރައީސް މުއިއްޒު މިހެން ވިދާޅުވީ ރައީސް އޮފީހުން ގެނެސް ދެމުންދާ "ރައީސްގެ ޖަވާބު" މިއަދުގެ ސެގްމަންޓުގައި ރޯދަމަހު ކާބޯތަކެތި ވީހާވެސް ހެޔޮ އަގެއްގައި ލިބޭގޮތް ހަދައިދިނުމަށް އެދި ލެއްވި އެދިލެއްވުމާއި ގުޅިގެން ދެއްކެވި ވާހަކަފުޅުގައެވެ.

އޭގެ ޖަވާބުގައި ރައީސް މުއިއްޒު ވިދާޅުވި ކާބޯތަކެތީގެ އަގު ހެޔޮ ކުރުމަކީ ސަރުކާރުން އެންމެ ބޮޑަށް އިސްކަން ދެމުންދާ އެއްކަންތައް ކަމުގައެވެ. އަދި ރޯދަމަސް ފެށިގެން ދާއިރު، އަސާސީ ކާބޯތަކެތީގެ އަގު ހިފެހެއްޓުމަށް އެސްޓީއޯ މެދުވެރިކޮށް ގެނެވި އަގުހެޔޮ ކުރުމުގެ މަސައްކަތް ކުރިޔަށްދާ ކަމުގައެވެ.

މިހާރުވެސް އަގުހެޔޮކޮށް ވިއްކަން ފަށާފައިވަނީ އެސްޓީއޯއިން، އަދިވެސް އިތުރު މަސައްކަތްތައް ކުރާނަން ކާބޯތަކެތީގެ އަގުތައް ހެޔޮކުރުމަށްޓަކައި.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުއިއްޒު އިތުރަށް ވިދާޅުވީ މެދު ރާސްތާ އަދި ދުރު ރާސްތާގެ ސަރުކާރުގެ އަމާޒަކީ ރާއްޖެއަށް ބޭނުންވާ ކާބޯތަކެތީގެ ބާވަތްތައް ރާއްޖޭގައި އުފެއްދައި، ފުޑް ސެކިއުރިޓީ ގާއިމް ކުރުން ކަމަށެވެ. ސަރުކާރުގެ ޕްލޭންކުރުން ކަމަގައެވެ.

ކުރިއަށް އޮތް މުސްތަޤްބަލުގައި މެދު ރާސްތާ އަދި ދުރު ރާސްތާގެ ޕްލޭންއަކީ ރާއްޖޭގައި އުފެއްދޭ ހުރިހާ ބާވަތެއް ރާއްޖޭގައި އުފެއްދޭގޮތް ގާއިމްކޮށް، ފުޑު ސެކިއުރިޓީ ޔަޤީންކުރުން، އޭރު އަގުވެސް ދަށްވެގެންދާނެ، އަދި ކޮއަންޓިޓީވެސް ޔަޤީންވެގެންދާނެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ބަރަކާތްތެރި ރަމަޟާންމަސް މާދަމާ ފަށާއިރު، އެސްޓީއޯ އިން މިހާރު ވަނީ ލުނބޮލުގެ އަގުވެސް ހެޔޮކޮށް ވިއްކަން ފަށާފައެވެ. އޭގެ އިތުރުން ކާޑުގެ ބާވަތްތަކާއި މުހިންމު އެހެން ގިނަ އަސާސީ ބާވަތްތައް އަގު ހެޔޮކޮށް ހުސްނުވެ ލިބޭނެ ކަމަށް އެސްޓީއޯއިން ވަނީ ބުނެފަ އެވެ.

އަދި މި ރަމަޟާން މަހު، ސަރުކާރުން ވަނީ ކޮންމެ ގޭބިސީ އަކަށް ހަނޑުލާއި ފުށް ދޭން ނިންމައި އެ މަސައްކަތްވެސް ފަށާފައެވެ.