ދ.އަތޮޅު ކައުންސިލުން މިނިމަސްގަލި، 21 އަހަރަށް ކުއްޔަށްދީފި

މާލީގޮތުން ކައުންސިލްތައް ބާރުވެރިކުރުވުމަށްޓަކައި ސަރުކާރުން ގެންގުޅެމުންދާ ސިޔާސަތުގެ ދަށުން ދ.އަތޮޅު ކައުންސިލަށް ދީފައިއޮތް މިނިމަސްގަލި، 21 އަހަރަށް ކުއްޔަށް ދީފިއެވެ.

މިކަމާ ގުޅިގެން ނިލަންދެއަތޮޅު ދެކުނުބުރީ އަތޮޅު ކައުންސިލްގެ އިދާރާއިން ނެރެފައިވާ ބަޔާނެއްގައި ބުނެފައިވަނީ، މިނިމަސްގަލި ބެލެހެއްޓުމަށް ޔަޝް އެގްޒޮޓިކް އައިލެންޑް ޕްރައިވެޓް ލިމިޓެޑަށް 21 އަހަރު ދުވަހުގެ މުއްދަތަކަށް ކުއްޔަށް ދީފައިވާކަމަށެވެ. އެގޮތުން އެފަރާތުގެ ހުއްދަ ނެތި އެއްވެސް ފަރާތަކުން އެރަށަށް އަރާ ފޭބުމަކީ މަނާކަމެއް ކަމެއްކަމަށް ދ.އަތޮޅު ކައުންސިލުން ވަނީ ބުނެފައެވެ.

ޔަޝް އެގްޒޮޓިކް ކުންފުންޏަކީ މިހާރުވެސް އެއަތޮޅުގައި ފުޅާދާއިރާއެއްގައި ޓޫރިޒަމްގެ ވިޔަފާރި ހިންގަމުން އަންނަ ކުންފުންޏެކެވެ.

މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްއިން މިނިމަސްގަލި ދ.އަތޮޅު ކައުންސިލާ ހަވާލުކޮށްފައިވަނީ މިއަހަރުގެ ޖެނުއަރީމަހުގެ 27 ވަނަ ދުވަހެވެ. މިނިސްޓްރީން ވަނީ މިނިމަސްގަލީގެ އިތުރުން އެއަތޮޅު ފެންފުށިވެސް އަތޮޅު ކައުންސިލަށް ދީފައެވެ. މިކަމާ ގުޅިގެން އޭރު ދ.އަތޮޅު ކައުންސިލުން ބުނެފައިވަނީ، އެ ދެ ރަށް ލިބިގެންދިއުމުގެ ސަބަބުން ދެ ރަށް ތަރައްޤީކޮށް، އޭގެ މަންފާ ރައްޔިތުންނަށް ލިބޭނެ ގޮތް ހެދުމުގެ ފުރުޞަތު ލިބިގެންދާނޭކަމަށެވެ.

ބައެއް ފަޅުރަށްތަކާއި ފަޅުތައް ސަރުކާރުން ކައުންސިލްތަކާ ހަވާލުކުރުމަށް ނިންމި މައިގަނޑު ސަބަބަކީ، ރަށްތަކުގެ ކައުންސިލްތައް މާލީގޮތުން ބާރުވެރިކުރުވައި، ރަށްރަށުގެ ތަރައްޤީއަށް ބޭނުންވާ ވަސީލަތްތައް ހޯދައިދިނުމަށެވެ. މިކަމުގެ ސަބަބުން ރަށްރަށުގެ އިޤްތިޞާދީ ޙަރަކާތްތައް އިތުރުވެގެންދާނެ ކަމަށް ސަރުކާރުން ބުނެއެވެ.