ބަރުލަމާނީ ގުޅުން ބަދަހިކުރަން ރާއްޖެއިން އިންޑިއާގެ ގާނޫނު ހަދާ މަޖިލީހާއެކު އެއްބަސްވަނީ

ބަރުލަމާނީ ގުޅުން ބަދަހިކުރުމާއި ބެހޭ އެއްބަސްވުމެއްގައި، ރާއްޖޭގެ ގާނޫނު ހަދާ މަޖިލީހުން، އިންޑިއާގެ ގާނޫނު ހަދާ މަޖިލީހާ އެކު އެއްބަސްވުމެއްގައި ސޮއިކުރަން ނިންމައިފިއެވެ.

ރައްޔިތުންގެ މަޖިލީހުގެ މަޖިލީހުގެ މިއަދުގެ ޖަލްސާ، ފައްޓަވައިދެއްވައި ދެއްކެވި ވާހަކަފުޅުގައި މަޖިލީހުގެ ރައީސް މުހައްމަދު ނަޝީދު ވިދާޅުވީ، މިއެއްބަސްވުމުގައި ސޮއިކުރުމަށް މިމަހުގެ ނުވަޔަކުން ތޭރަ އަށް ރާއްޖޭގެ ގާނޫނުހަދާ މަޖިލީހުގެ ވަފުދެއް އިންޑިއާއަށް ދަތުރެއްކުރަން ހަމަޖެހިފައިވާކަމަށެވެ.

މަޖިލިސް މެންބަރުން އިންޑިއާއަށް ކުރައްވާ މި ދަތުރުގައި، މަޖިލީހުގައި ހިމެނި ވަޑައިގަންނަވާ ހުރިހާ ސިޔާސީ ޕާޓީތަކުން މެންބަރުން ހިމެނޭގޮތަށް 15 މެންބަރުން ބައިވެރިވެ ވަޑައިގަންނަވާނެ ކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ މި އެއްބަސްވުމުގެ ސަބަބުން ދެފަރާތުން ގަވާއިދުގެ ތެރެއިން މައުލޫމާތު ބަދަލު ކުރުމާއި ބައިނަލް އަގުވާމީ ބައްދަލުވުން ތަކުގައި ބަރުލަމާނީ އެއްބާރުލުން ކުރިއަރުވަން މަގުފަހިވެންދާނެ ކަމަށެވެ.

މި އެމްއޯޔޫގެ ދަށުން ދެފަރާތުގެ ދެމެދުގައި ބަރުލަމާނީ ގުޅުން ބަދަހި ކުރުމުގެ އިތުރުން ދެ ގައުމުގެ ޒަމާންވީ އެކުވެރިކަމުގެ ގުޅުން އިތުރަށް ކުރިއަރުވައި، ރައްޔިތުންގެ މަޖިލީހާއި އެ މަޖިލީހުގެ އިދާރާގެ ހިންގުން ތަރައްގީ ކުރުމާއި ފަންނީ ފުރުސަތުތަކަށް މަގުފަހި ކުރުމަށް ރަސްމީ އޮނިގަނޑެއް އެކުލަވައިލާނެ ކަމަށް ނަޝީދު ވިދާޅުވިއެވެ.

ބަރުލަމާނީ ގުޅުން ބަދަހިކުރުމާ ބެހޭ އެއްބަސްވުމެއްގައި ރާއްޖޭގެ ގާނޫނު ހަދާ މަޖިލީހުން ސޮއިކުރަން ނިންމި އިރު ރާއްޖެއަކީ ރިޔާސީ ނިޒާމެއްގެ ދަށުން ވެރިކަން ކުރަމުންދާ ގައުމެކެވެ.

މިފަދަ އެއްބަސްވުމެއްގައި ސޮއިކުރާއިރު، އިދިކޮޅު ފަރާތްތަކުން ބުނަމުންދަނީ ދައުލަތުގެ ވަކިވެފައިވާ ތިންބާރު އެއްކޮށް، ބަރުލަމާނީ ނިޒާމެއްގެ ދަށުން ވެރިކަން ކުރާ އުސޫލުން ސަރުކާރުން މިހާރު އަމަލުކުރަމުންދާކަމަށެވެ.