ޑިޕޮސިޓް ފައިސާ ވަކި އެކައުންޓެއްގައި ބަހައްޓަން ޖެހޭގޮތަށް ހަަދަނީ

ދިރިއުޅުމަށް ތަންތަން ކުއްޔަށް ދޫކުރުމުގެ މަރުހަލާގައި ނެގޭ ސެކިއުރިޓީ ޑިޕޮސިޓް ވަކި އެކައުންޓެއްގައި ބަހައްޓަންޖެހޭ ގޮތަށް ދިރިއުޅުމަށްޓަކައި ގޯތިގެދޮރު ކުއްޔަށް ދޫކުރުމާއި ބެހޭ ގާނޫނުގެ ބިލެއް ރައްޔިތުންގެ މަޖިލީހަށް ހުށައަޅައިފިއެވެ.

މި ބިލްގައިވާ ގޮތުގައި ސެކިއުރިޓީ ޑިޕޮސިޓްގެ ގޮތުގައި އެންމެ ގިނަވެގެން ނެގޭނީ ދެ މަސްދުވަހުގެ ކުއްޔަށްވާ ފައިސާއެވެ. އަދި އެ ފައިސާ ޖަމާކުރާނީ އެ ބިލްގެ ދަށުން އުފައްދާ ޓެނެންސީ ބޯޑުން ކަނޑައަޅާ ވަކި އެކައުންޓަކަށެވެ. އަދި ކުއްޔަށް ހިފާތަން ދޫކުރާ ހާލަތެއްގައި ޑެޕޮސިޓް ފައިސާ އަނބުރާ ހަވާލުކުރާނީވެސް މި ބޯޑުންނެވެ.

ޓެނެންސީ ބޯޑަކީ މީހުން ދިރިއުޅުމަށްޓަކައި ގޯތިގެދޮރު ކުއްޔަށް ދޫކުުރުމުގެ ކަންތައްތައް ރެގިއުލޭޓްކުރާ ބޯޑެކެވެ. މި ބޯޑުގައި ހިމެނޭނީ ތިން މެންބަރުންނެވެ. މި ފަރާތްތައް އައްޔަން ކުރާނީ މިނިސްޓަރގެ ލަފާފުޅުގެ މަތިން ރައީސުލްޖުމްހޫރިއްޔާއެވެ.

އެޑްވާންސް ފައިސާގެ އިތުރުން ކުއްޔަށް ދޫކުރާއިރު އެއްވެސް މިންވަރަކަށް ފައިސާ ނެގޭނެ ހާލަތްތައް މި ބިލްގައި ވަނީ ބުނެފައެވެ. އެއީ ދިރިއުޅެން ތަނެއް ކުއްޔަށް ދިނުމުގެ އެއްބަސްވުމުގެ ދަށުން ކުއްޔަށް ދިނުމުގެ ޖުމްލަ މުއްދަތަށް އެކުގައި ކުލި ނަގާ ހާލަތުގައެވެ. މި ބިލްގައި ބުނެފައިވާ ގޮތުގައި ތަނެއް ކުއްޔަށް ދޫކުރެވޭނެ އެންމެ ކުރު މުއްދަތަކީ ހަމަސް ދުވަހެވެ. އަދި އެންމެ ދިގު މުއްދަަތަކީ ދިހަ އަހަރެވެ.

މި ބިލް ދިރާާސާ ކުރުމަށް ރައްޔިތުންގެ މަޖިލީހުގެ މަޖިލީޙުގެ ގައުމީ ތަރައްގީއާއި ތަރިކައިގެ ކޮމިޓީއަށް ވަނީ ފޮނުވާފައެެވެ.