ނޢޢވ. ޙަސަން ޞާބިރަކީ އިގްތިސާދީ ދާއިރާތަކުން ވަރަށް ބިނާކުރަނިވި ޚިދުމަތްތަކެއް ކޮށްދެއްވި ބޭފުޅެއް: ރައީސް

ދިވެހި ދައުލަތަށް ވަރަށް ގިނަ އަހަރުތަކެއް ވަންދެން ހިދުމަތްކުރެއްވި ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙަސަން ޞާބިރަކީ ވަޒީރުކަމުގެ މަގާމުގައި ހުންނަވައިގެން، ރާއްޖޭގެ އިގްތިސާދީ ދާއިރާތަކަށް ވަރަށް ބިނާކުރަނިވި ހިދުމަތްތަކެއް ކުރެއްވި ބޭފުޅެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހަސަން ޞާބިރު އަވަހާރަވުމާ ގުޅިގެން އެކްސްގައި ކުރެއްވި ޕޯސްޓްގައި ރައީސް ޑރ.މުއިއްޒު ވިދާޅުވީ، އެއީ ރާއްޖޭގެ އިގްތިސާދަށް ރާއްޖޭގެ މަސްވެރިކަމާއި، ދަނޑުވެރިކަމާއި، ފަތުރުވެރިކަމުގެ ދާއިރާއަށް، ވަރަށް ބިނާކުރަނިވި ޚިދުމަތްތަކެއް ކޮށްދެއްވި ބޭފުޅެއްކަމަށެވެ. ރައީސް ވިދާޅުވީ ދިވެހިރާއްޖެއިން ޖަޕާނަށް ކަނޑައަޅާފައި ހުރި ސަފީރު، ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙަސަން ޞާބިރު ދެމިއޮތުމުގެ ޢާލަމަށް ދަތުރުކުރެއްވި ޚަބަރު އެހީ ވަރަށް ފުން ހިތާމައާއެކުގައިކަމަށް ވިދާޅުވެފައެވެ.

ވަޒީރުކަމުގައި އެންމެ ދިގު މުއްދަތަކަށް ޚިދުމަތްކުރެއްވީ ފަތުރުވެރިކަމުގެ ދާއިރާއިންކަން ފާހަގަކުރައްވަމުން ރައީސް ވިދާޅުވީ، އެމަނިކުފާނަކީ، ރާއްޖެއިން އެކި ޤައުމުތަކަށް ކަނޑައެޅުއްވި ސަފީރުކަމުގެ މަގާމުގައި ހުންނަވައިގެން، ރާއްޖޭގެ ޚާރިޖީ ގުޅުންތައް ވަރުގަދަކުރެއްވުމަށް، ވަރަށް ހަރުދަނާ މަސައްކަތްޕުޅުތަކެއް ކުރެއްވި ޑިޕްލޮމެޓެއްކަމަށެވެ.

ޞާބިރު ދެމިއޮތުމުގެ ޢާލަމަށް ދަތުރުކުރެއްވުމަކީ މުޅި ދިވެހި ޤައުމަށް ލިބުނު ވަރަށް ފުން ހިތާމައެއް

ރައީސްގެ ޕޯސްޓްގައި ވިދާޅުވިއެވެ

ޞާބިރު އަވަހާރަވެފައިވަނީ ކެންސަރަށް ފަރުވާ ހޯއްދަވަމުން ދަނިކޮށް މިއަދު ހެނދުނު ޓްރީޓޮޕް ހޮސްޕިޓަލްގައެވެ.

ޙަސަން ޞާބިރަކީ ދައުލަތަށް 38 އަހަރަށްވުރެ ގިނަދުވަހު ހިދުމަތްކުރައްވާފައިވާ ހިދުމަތްތެރިއެކެވެ. ެކަން ފާހަގަކުރުމުގެ ގޮތުން މިނިވަންދުވަހު އިއްޔެ ބޭއްވި ޖަލްސާގައި ހަސަން ޞާބިރަށް ވަނީ ނިޝާން ޢިއްޒުއްދީނުގެ ޢިއްޒަތުގެ ވެރިޔާގެ ލަގަބު އަރުވާފައެވެ. ޙަސަން ޞާބިރަށް އިއްޒުއްދީނުގެ އިއްޒަތުގެ ވެރިކަމުގެ ލަގަބުގެ ވެރިކަން އަރުވާފައިވަނީ ރާއްޖޭގެ ތަރައްޤީގެ މަޝްރޫޢުތައް ރޭއްވުމުގައްޔާއި، ރާއްޖޭގެ އިޤްތިޞާދީ ދާއިރާއަށް ޚާއްޞަކޮށް މަސްވެރިކަމުގެ ދާއިރާއާއި ފަތުރުވެރިކަމުގެ ދާއިރާގެ ވަޒީރުކަމުގެ މަޤާމުގައި ހުންނަވައިގެން އެ ދާއިރާތަކުގެ ޞިނާޢަތު ކުރިއެރުވުމަށްޓަކައި ޤައުމީ މުހިންމު މަސައްކަތް ޕުޅުތަކުގެ ސަބަބުންނެވެ.

ޞާބިރު ފާހަގަވެގެން ގޮސްފައިވަނީ ފަތުރުވެރިކަމާއި މަސްވެރިކަމުގެ މަޝްރޫޢުތައް ރޭވެވުމާއި ހިންގެވުމުގެ މާހިރެއްގެ ގޮތުގައެވެ.