ދެ ޤައުމުގެ ގުޅުން ހީނަރުވުމެއް ނެތި އިންޑިޔާ ސިފައިން ރާއްޖެއިން ފޭބުމަކީ އުފާކުރަން ޖެހޭ ކަމެއް - ވަޒީރު އާދަމް ޝަރީފު

އިންޑިއާއާއި ރާއްޖެއާ ދެމެދު އޮތް ޒަމާންވީ ގުޅުން ހީނަރު ނުވެ، އިންޑިޔާ ސިފައިން ރާއްޖެއިން ފޭބުމަކީ ލިބުނު ކުރިއެރުމެއް ކަމަށާ އުފާކުރަން ޖެހޭ ކަމެއް ކަމަށް ސިޓީތަކާއި އިދާރީ ދާއިރާތައްހިންގުމާބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެ އެވެ.

ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފ. އަތޮޅުގެ ރަށްތަކަށް ކުރެއްވި ދަތުރުފުޅުގައި ފީއަލީ ރައްޔިތުންނާ ބައްދަލުކުރުމަށް ބޭއްވި ޖަލްސާގައި ވާހަކަދައްކަވަމުންނެވެ. ވަޒީރު ވިދާޅުވީ ޑިޕްލޮމަސީގެ ރީތި އުސޫލުތަކާ އެއްގޮތަށް އިންޑިޔާ ސިފައިން ރާއްޖެއިން ބޭލި ބޭލުމަކީ ބައިނަލްއަްުވާމީ ދުނިޔޭގެ އާދަޔާވެސް ޚިލާފު ކަމެއް ކަމަށެވެ.

"މީގެ ކުރީގެ ތަޖުރިބާއާއި ޚިލާފަށް އަދި ބައިނަލްއަޤްވާމީ ދުނިޔޭގައިވެސް މިކަންކަން ހިނގާފައި އޮތް ގޮތާ ޚިލާފަށް. މިއަދު އަޅުގަނޑުމެން އެންމެ އުފާކުރަން ޖެހޭ އެއް ކަމަކީ، ޑިޕްލޮމަސީގެ ރިވެތި އުސޫލުތަކާ އެކީގަ، އެއްވެސް ނުތަނަވަސްކަމެއް ކަންބޮޑުވުމެއް ނެތި އިރާދަކުރެއްވީތީވެ އިންޑިޔާއާ ދިވެހިރާއްޖެއާ އޮތް ޒަމާންވީ އެކުވެރިކަމުގެ ގުޅުން އެ އޮތްގޮތަށް އޮވެމެ، އެކަމަކު އިންޑިޔާ ސިފައިން މިއަދު ރާއްޖެއިން ފައިބައިގެން ދާދިޔުން"

ވަޒީރު ވިދާޅުވި އެވެ.

މީގެ އިތުރުން ޖަލްސާގައި ވަޒީރު ވިދާޅުވީ ދެ ޤައުމުގެ ގުޅުން ދެމެހެއްޓުމާއެކު އިންޑިޔާ ސިފައިން ރާއްޖެއިން ބޭލިކަމީ، ދިވެހި ރައްޔިތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް މަރުޙަބާ ކިޔާ ޝުކުރުދަންނަވަން ޖެހޭ ކަމެއް ކަމަށެވެ.

އަންނަ މޭ މަހުގެ 10 ވަނަ ދުވަހުގެ ކުރިން ރާއްޖޭގައި ތިބި ހުރިހާ އިންޑިޔާ ސިފައިން ބޭލުމަށް ވަނީ ދެޤައުމުގެ ދެމެދުގައި އެއްބަސްވެވިފައެވެ. އެ އެއްބަސްވުމުގެ ދަށުން، އައްޑޫ ސިޓީގައި އޮތް އިންޑިއާގެ ހެލިކޮޕްޓަރާއެކު އިންޑިއާ ސިފައިންގެ ފުރަތަަމަ ބެޗު ވަނީ މިދިޔަ މާޗު މަހުގެ 10 ވަނަ ދުވަހު ރާއްޖެއިން ފޮނުވާލާފައެވެ.

އަދި ރާއްޖޭގައި ތިބި އިންޑިޔާ ސިފައިންގެ ދެވަނަ ބެޗު މި އޭޕްރިލް މަހު ނުވަވަނަ ދުވަހުފޮނުވާލާފައިވާ ކަމަށް ރައީސް ޑރ. މުޙައްމަދު މުޢިއްޒު، މިދިޔަ ހުކުރު ދުވަހުގެރޭ އައްޑޫ ސިޓީގައި ބޭއްވި ޖަލްސާއެއްގައި ވަނީ އިއުލާން ކުރައްވާފައެވެ.