ތަފާތުކުރުމެއް ނޯންނާނެ، މަސްއޫލިއްޔަތު އަދާކުރާނީ ލޯތްބާއި އިޙުތިރާމާ އެކު: ޑރ.ޝަހީމް

އެންމެހައި ދިވެހި ރައްޔިތުންނާއި ހުރިހައި ސިޔަސީ ޕާޓީތަކުގެ މެންބަރުނަށް އެއްވެސް ތަފާތުކުރުމެއް ނެތި ލޯތްބާއި އިޙުތިރާމާ އެކު މަސްއޫލިއްޔަތު އަދާކުރުން މަތީ ދެމިހުންނަވާނެކަމަށް އިސްލާމިކް މިނިސްޓަރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރ ޝަހީމް މިފަދައިން ވިދާޅުވެފައިވަނީ އިއްޔެ ބޭއްވި ރައްޔިތުންގެ މަޖިލިހުގެ ޖަލްސާގައި މިނިސްޓަރަށް ރުހުން ނުދިނުމުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަލުން އިސްލާމިކް މިނިސްޓަރުގެ މަގާމަށް ޑރ. އެބޭފުޅާ އައްޔަން ކުރެއްވުމާއި ގުޅިގެންނެވެ.

މިނިސްޓަރ ޝަހީމް އެކސްގައި ކުރެއްވި ޕޯސްޓެއްގައި އިތުރަށް ވިދާޅުވީ ރައީސް މުއިއްޒު އެބޭފުޅާ އާއި ޙަވާލުކުރެއްވި އަމާނާތް އެންމެ ފުރިހަމަ ގޮތުގައި އަދާކުރައްވާނެކަމަށެވެ.

"އިންޝާ الله އެންމެހައި ދިވެހި ރައްޔިތުންނާއި ހުރިހައި ސިޔަސީ ޕާޓީތަކުގެ މެންބަރުނަށް އެއްވެސް ތަފާތުކުރުމެއް ނެތި ލޯތްބާއި އިޙުތިރާމާއި އެކު މަސްއޫލިއްޔަތު އަދާކުރުން މަތީ ދެމިހުންނާނަން. ރައީސް ޙަވާލުކުރެއްވި އަމާނާތް އެންމެ ފުރިހަމަ ގޮތުގައި އަދާކުރާނަން އިންޝާ الله"  ޑރ. ޝަހީމްގެ ޕޯސްޓުގައި ވިދާޅުވެފައި ވެއެވެ.

އިއްޔެ ބޭއްވުނު ރައްޔިތުންގެ މަޖިލިހުގެ ޖަލްސާގައި ރުހުންދީފައި ނުވަނީ ، އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދަށާއި، އެޓާނީ ޖެނަރަލް އަހުމަދު އުޝާމަށާއި، އަދި ހައުސިން މިނިސްޓަރ ޑރ. އަލީ ހައިދަރަށެވެ.

އޭގެ ތެރެއިން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ފެންނަ ކަމަށް 30 މެމްބަރުން ވޯޓްދެއްވި އިރު ނުފެންނަ ކަމަށް 31 މެމްބަރަކު ވޯޓްދެއްވާފައި ވެއެވެ. އަދި ވަކި ގޮތަކަށް ވޯޓު ދޭން ބޭނުން ނުވި 8 މެމްބަރަކު ތިއްބެވިއެވެ. އެހެންކަމުން މިނިސްޓަރ ޝަހީމުއަށް އިތުބާރު ނެތްކަމަށް ފާސްވެފައި ވަނީ ހަމަ އެންމެ ވޯޓަކުންނެވެ.