އަންނަ އަހަރު ސިވިލް ސާވިސް މުއައްޒަފުންގެ މުސާރަ ބޮޑުކުރަނީ

ސިވިލް ސާވިސް މުއައްޒަފުންގެ މުސާރަ ބޮޑުކުރުމަށް ނިންމައި އަންނަ އަހަރުގެ ބަޖެޓްގައި އެފައިސާ ހިމަނައިފިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް މަޖިލީހުގައި މިއަދު ހުށަހަޅައި ދެއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ، ކުރިއަށް އޮތް އަހަރުގެ ބަޖެޓުގައި ސިވިލް ސާވިސް މުވައްޒަފުންގެ ތެރެއިން މިހާތަނަށް ޕޭ ހާމަނައިޒްކޮށްފައިނުވާ ހުރިހާ މުވައްޒަފުންނާއި ޖުޑީޝަރީގެ މުވައްޒަފުންގެ މުސާރަތަކަށް ބަދަލުގެނެސް ހާމަނައިޒްކުރަން 500 މިލިއަން ރުފިޔާ ހިމަނާފައި ވާނެ ކަމަށެވެ.

އަދި އެނޫން އެހެން ހުރިހާ މުވައްޒަފުންގެ މުސާރަތަކަށް 2026 ވަނަ އަހަރު ބަދަލުގެނައުމަށް ރާވާފައިވާކަމަށް މާލީ ވަޒީރު ވިދާޅުވިއެވެ.

އަދުގެ ސަރުކާރުން ސިވިލް ސާވިސް މުއައްޒަފުންގެ މުސާރަތައް ބޮޑުކުރާނޭކަމަށް ބުނެފައިވާއިރު، ދައުލަތުެގ މުއައްޒަފުންގެ ތެރެއިން ޓީޗަރުންނާއި، ސިއްހީ ދާއިރާގެ އިތުރުން ސަލާމަތީ ހިދުމަތްދޭ މުއައްސަސާތަކުގެ މުއައްޒަފުންގެ މުސާރަތައް ވަނީ ބޮޑުކޮށްފައެވެ.

ސަރުކާރުން އަންނަ އަހަރަށް ލަފާކޮށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މިއީ މިއަހަރަށް ހުށަހެޅި ބަޖެޓަށްވުރެ، 6.8 ބިލިއަން ރުފިޔާގެ އިތުރުވުމެކެވެ. ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.

އަންނަ އަހަރުގެ ބަޖެޓްގެ ޖުމްލަ ހަރަދުގެ ގޮތުގައި ހިނގާނޭކަމަށް ލަފާކޮށްފައިވަނީ، 49.2 ބިލިއަން ރުފިޔާއެވެ. އޭގެ ތެރޭގައި ރިކަރަންޓް ހަރަދުގެ ގޮތުގައި 35.8 ބިލިއަން ރުފިޔާ ހަރަދުވާނޭކަމަށް ލަފާކޮށްފައިވާއިރު، ކެޕިޓަލް ހަރަދުގެ ގޮތުގައި ބަޖެޓްގައި ޖަހާފައިވަނީ 13.4 ބިލިއަން ރުފިިޔާއެވެ. އަދި ޕީއެސްޕީއައި މަޝްރޫޢުތަކަށް ކަނޑައަޅާފައިވަނީ 12.4 ބިލިއަން ރުފިޔާއެވެ.