5 މިލިއަން ގަސް ޕްރޮގްރާމަށް އެމްއޭސީއެލުން އެއްލައްކަ ގަސް އިންދުމުގެ މަސައްކަތް ފަށައިފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފައްޓަވާފައިވާ "5 މިލިއަން ގަސް" ޕްރޮގްރާމަށް އެއްބާރުލުން ދިނުމުގެ ގޮތުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެއްލައްކަ ގަސް އިންދުމުގެ މަސައްކަތް މިއަދު ފަށައިފިއެވެ.
އެމްއޭސީއެލުން ގަސް އިންދުމުގެ މި ހަރަކާތް ފަށާފައިވަނީ، ވެލާނާ އިންޓަރނޭޝަނަލް އެއާޕޯޓް އައު ޓާމިނަލް ސަރަހައްދުގައި އެކަމަށްޓަކައި ބޭއްވި ހަފްލާއެއްގައެވެ.

މި ހަރަކާތް ފައްޓަވައިދެއްވީ ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމެވެ. ގަސް އިންދުމުގެ ހަރަކާތުގައި އެމްއޭސީއެލްގެ މެނޭޖިންގ ޑިރެކްޓަރު އިބްރާހީމް ޝަރީފް މުހައްމަދުގެ އިތުރުން ކުންފުނީގެ ވެރިން ބައިވެރިވަޑައިގަތެވެ. ގަސް އިންދުމުގެ މި ހަރަކާތުގެ ދަށުން އެމްއޭސީއެލުން 100،000 ގަސް އިންދުމަށް ވަނީ ނިންމާފައެވެ

"5 މިލިއަން ގަސް" މި ޕްރޮގްރާމަކީ  މިދިޔަ އަހަރުގެ ޖޫން މަހުގެ 5 ވަނަ ދުވަހު ރައީސް ޑރ.މުޢިއްޒު ފައްޓަވައިދެއްވި ޕްރޮގްރާމެކެވެ. މިއީ ރައީސުލްޖުމްހޫރިއްޔާގެ ރިޔާސީ ވައުދުފުޅެކެވެ. ރައީސް ޑރ.މުއިއްޒު ވިދާޅުވެފައިވަނީ މި ޕްރޮގްރާމްގައި އިސްކަންދެނީ ރާއްޖެއިން ނެތެމުންދާ ގަސްތައް ދިރުވައި އާލާކުރުމަށް ކަމަށެވެ. މި ގޮތުން 90 ބާވަތެއްގެ ގަސް މި ޕްރޮގްރާމްގައި އިންދުމަށް ނިންމާފައިވާކަމަށް އެމަނިކުފާނު ފާހަގަކުރެއްވިއެވެ.

ގަސް އިންދުމުގެ މި ޕްރޮގްރާމްގެ ދަށުން މިހާތަނަށް 500،000 ގަސް އިންދާފައިވާކަމަށް ސަރުކާރުން ވަނީ ބުނެފައެވެ. 5 މިލިއަންގަސް އިންދުމުގެ ޕްރޮގްރާމުގެ ދަށުން ސަރުކާރުގެ ގިނަ ކުންފުނިތަކަކާއި މުއައްސަސާތަކުން ވަނީ އެކަމަށް އިޖާބަދީ ގަސް އިންދަން ފަށާފައެވެ.