ބިދޭސީ އަންހެނުން ރާއްޖެ ގެންނަ ސްޕޮންސަރުން އެމީހުންނަށް ޖިންސީ ގޯނާކުރޭ: ޕޮލިސް
ތަފާތު މަސައްކަތް ކުރުވުމަށް ރާއްޖެ ގެންނަ ބިދޭސީ އަންހެނުންނަށް، އެމީހުން ގެންނަ ސްޕޮންސަރުން ޖިންސީ ގޯނާކޮށް، ރޭޕްކުރާ ކަމަށް ފުލުހުން މިއަދު ބުނެފިއެވެ.
އިސްކަންދަރުކޮށީގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފުލުހުންގެ ތަރުޖަމާނު އިޒުމިއާ ޒާހިރު ވިދާޅުވީ، ބިދޭސީ އަންހެނުން ރާއްޖެ ގެންނައިރު ބައެއް އަންހެނުންނަށް ޖިންސީ ގޯނާ ކުރާ މައްސަލަ ފުލުހުންނަށް ހުށަހަޅާފައިވާކަމަށެވެ. އެގޮތުން އެމީހުން ރޭޕްކުރުމާއި ޖިންސީ ގޯނާތައް ހިމެނޭ ކަމަށް އިޒުމިއާ ވިދާޅުވިއެވެ.
ބިދޭސީ އަންހެނުން ހަށިވިއްކުމުގެ މައްސަލަތައްވެސް ހުށަހެޅުމުން ބަލާއިރު ބައެއް މައްސަލަތަކުގައި އަންހެންމީހާ އެހެން ބަޔަކާއި ހަވާލުކުރުމަށްފަހު އަންހެންމީހާ ގޮވައިގެން އައި ފިރިހެން މީހާ ރައްޖެއިން ފުރައިގެން ގޮސްފައިވާ މައްސަލަތައްވެސް ފެންމަތިވެފައިވާކަމަށެވެ.
އެގޮތުން ހަށިވިއްކާ އަންހެނުން، އެމީހުން ގެންގުޅެފައިވަނީ ބިރުދައްކައި، ބަންދުކޮށްގެން އެމީހުންގެ މިނިވަންކަންވެސް ނިގުޅައިގަނެގެން ކަމަށް އިޒުމިއާ ވިދާޅުވިއެވެ.
އިޒުމިއާ ވިދާޅުވީ ރާއްޖޭގެ ނިސްބަތުން އެފަދަ މައްސަލަތައް ފުލުހުންނަށް ހުށަހަޅާފައިވާ މިންވަރު މަދު ކަމަށެވެ. އޭނާ ވިދާޅުވީ އެފަދަ މައްސަލަތައް ދިވެހިންގެ މެދުގައި ހިނގާފައިވާކަން ފާހަގަ ނުކުރެވެ ކަމަށެވެ.
އިޒުމިއާ ވިދާޅުވީ އެފަދަ މައްސަލަތައް މުޖުތައުގައި ހިނގާމިންވަރު މަދު ކުރުމަށް ފުލުހުން މަސައްކަތް ކުރަމުންދާ ކަމަށެވެ.
މީގެއިތުރުން ރާއްޖޭގައި ހާއްސައެހީއަށް ބޭނުންވަ އަންހެނުންނަށް ކުރާ ޖިންސީގޯނާގެ މައްސަލަތައްވެސް ހުރިކަން ފާހަގަކުރައްވައި އިޒުމިއާ ވިދާޅުވީ، އިވުމުން މަހުރޫމުވެފައިވާ އަންހެނުންނަށް ޖިންސީގޯނާކޮށް، އަދި ބައެއް އަންހެނުން ބަލިވެ އިނދެ، ވިހާފައިވާކަމަށެވެ.
އެހެންކަމުން އެފަދަ ކަންކަން އިތުރުވިޔަ ނުދިނުމަށް އާންމުން ހޭލުންތެރިކުރުމަށް އިތުރު ޕްރޮގްރާމުތައް ހިންގުން ވަރަށް މުހިންމު ކަމަށްވެސް އިޒުމިއާ ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
