އިންތިހާބުތަކުގެ ވޯޓުލުމާއި ވޯޓުގުނުން ޑިޖިޓަލައިޒެއް ނުކުރާނަން: އީސީ

ދިވެހިރާއްޖޭގައި އެއްވެސް އިންތިހާބެއްގައި ވޯޓުލުމާއި ވޯޓް ގުނުން ޑިޖިޓަލައިޒް އެއް ނުކުރާނެ ކަމަށް އިލެކްޝަން ކޮމިޝަނުން ހާމަކޮށްފިއެވެ.

ޕީއެސްއެމްގެ 'ރާއްޖެ މިއަދު' ޕްރޮގްރާމުގައި މިދިޔަ ބުރާސްފަތި ދުވަހު ވާހަކަ ދައްކަވަމުން އީސީގެ ރައީސް މުހައްމަދު ޒާހިދު ވިދާޅުވީ މިފަހަރުގެ ލޯކަލް ކައުންސިލުގެ އިންތިހާބުގެ ހުރިހާ އިދާރީ ކަންކަމެއް ކުރިއަށް ގެންދަނީ ޑިޖިޓަލައިޒްކޮށް ނަމަވެސް ވޯޓް ނެގުމާއި ވޯޓު ގުނުން އަދި ނަތީޖާ އިއުލާން ކުރުން  ޑިޖިޓަލައިޒްކޮށް ކުރިއަށް ނުގެންދާނެކަމަށެވެ.

"މިސާލަކަށް ވޯޓުލުމާއި ވޯޓު ގުނުމާއި ވޯޓުގެ ނަތީޖާ އާއި ވޯޓުގެ ނަތީޖާއާ ގުޅިގެން އަންނަ ކަންތައްތަކާއި މިއިން އެއްވެސް ކަމެއް އަޅުގަނޑުމެން ޑިޖިޓަލައިޒެއް ނުކުރާނެ. އެކަން ކުރާނީ ހަމަ ފިޒިކަލްކޮށް މާޒީގައި ވެސް އަޅުގަނޑުމެން ކުރަމުން އައި ގޮތަށް،"

އީސީގެ ރައީސް މުހައްމަދު ޒާހިދު

ޒާހިދު އިތުރަށް ވިދާޅުވީ ވޯޓުގުނުމާއި ވޯޓުގެ ނަތީޖާއާއި ގުޅޭ ކަންކަން ކުރިން ކުރަމުން އައި ގޮތައް އެއްވެސް ބަދަލެއް ނުގެންނާނެކަމަށާއި، އެ ބަދަލު އަންނާނެ އެއްވެސް ހާލަތެއް އިލެކްޝަން ކޮމިޝަނަށް ކުރިމަތިވާނެ ކަމަށް ވެސް ގަބޫލު ނުކުރައްވާކަމަށެވެ. އަދި ކުރިއަށް އޮތް ކައުންސިލް އިންތިހާބުގެ ވޯޓުލުން ވެސް ވީހާވެސް އަމާންއޮމާން ކަމާއެކު، އިންސާފުވެރިކޮށް އަދި ނުފޫޒެއްނެތި ކުރިއަށް ގެންދިއުމަށް ކަމާ ގުޅުންހުރި އިދާރާތަކާއެކު ހާއްސަ މަސައްކަތްތަކެއް ކުރަމުން އަންނަ ކަމަށް ވެސް ޒާހިދު ވިދާޅުވިއެވެ.

ކުރިއަށް އޮތް ކައުންސިލް އިންތިހާބު ބޭއްވުމަށް ހަމަޖެހިފައިވަނީ އޭޕްރީލް 4 ގައެވެ. ރިޔާސީ އިންތިހާބާއި މަޖިލިސް އިންތިހާބު އެއްކޮށް ބޭއްވުމަށް ފެންނަ ނުފެންނަ ވޯޓެއް އެ ދުވަހު ނެގުމަށް ވެސް ސަރުކާރުން ވަނީ ނިންމާފަ އެވެ.

މި އިންތިހާބުގައި 48 ޓީމުގެ މަތިން، ތަމްރީނުދެވިފައިވާ 7000 އެއްހާ އީސީ އޮފިޝަލުން މަސައްކަތްކުރާނެކަމަށް އެ ކޮމިޝަނުން ބުނެފައިވެއެވެ.