އަތޮޅު ކައުންސިލްތައް އުވާލަން ގަސްތުކުރައްވާ ކަމަށް ރައީސް ވިދާޅުވެއްޖެ
ލިޔުންތެރިޔާ
އަހުމަދު ހަމީދު އާދަމް
އަތޮޅު ކައުންސިލްތައް މިހާރު އޮތްގޮތުން ރައްޔިތުންނަށް އޭގެ މަންފާ ނުލިބޭކަން ފާހަގަ ކުރައްވާ އަތޮޅު ކައުންސިލްތައް އުވާލަން ގަސްތުކުރާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
"ރައްޔިތުންނާ އެކު" ސިލްސިލާ ޕޮޑްކާސްޓްގެ ހަ ވަނަ އެޕިސޯޑްގައި ވާހަކަ ދައްކަވަމުން ރައީސް ވިދާޅުވީ އަތޮޅު ކައުންސިލްގެ ރައީސަކު ވަކީން އިންތިހާބުކޮށް އަތޮޅުގެ ހުރިހާ ރަށެއްގެ ރައީސުން ކައުންސިލްގައި ހިމެނޭ ގޮތަށް އޮތުމުން ނަތީޖާ ނުފެންނަ ކަމަށެވެ. އަދި އަތޮޅުގެ ކަންކަމުގައި މަސައްކަތް ކުުރުމުގެ ބަދަލުގައި ހުރިހާ މެންބަރުންގެ ފޯކަސް ހުންނަނީ ރަަަށްރަށުގެ ކަންކަމަށް ކަމަށް ވިދާޅުވި އެވެ.
"އަތޮޅުގެ ކަމެއްގައި މަޝްވަރާކުރަން ބައްދަލު ކުރިއަސް އެ ރަށެއްގެ ކަމެއް އެ ރަށުގެ ކައުންސިލަރަށް އިސްކުރެވެނީ. މުޅި އަތޮޅުގެ ކަމެއްގައި ވާހަަކަ ދެކެވޭ ވަރު މަދު. ގިނަ ފަހަރަށް ބައްދަލުވުންތައް ބޭއްވެނީ އޮންލައިންކޮށް، އެއްތަނަކަށް ނާދެވި،" ރައީސް ވިދާޅުވި އެވެ.
ކައުންސިލްތަކަށް ބްލޮކް ގްރާންޓުގެ ގޮތުގައި ދޭ ފައިސާ މިހާރު ހޭދަކުރެވޭ ގޮތާމެދު ވެސް ރައީސް ވަނީ ކަންބޮޑުވުން ފާޅު ކުރައްވާފަ އެވެ. ރައީސް ވިދާޅުވީ ބަައެއް ކައުންސިލްތަކުން ބޭރު ގައުމުތަކަށް ދަތުރު ކުރަމުންދާ ކަމަށެވެ. އެކަމުން ރައްޔިތުންނަށް ފައިދާއެއް ނުވާ ކަމަށް ވިދާޅުވި އެވެ.
އެހެން ކަމުން ރަށްރަށު ކައުންސިލްތައް ހަރުދަނާކޮށް އަތޮޅު ކައުންސިލްތައް އުވާލަން ހުށައަޅުއްވަން ވިސްނުންފުޅު ގެންގުޅުވާ ކަމަށް ރައީސް ވަނީ ވިދާޅުވެފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
