އަހަރު ނިމިގެންދާއިރު ހިސާބުތަކުން ފެނިގެންދަނީ، ސަރުކާރުން ކުރި ބޭކާރު ހަރަދުތައް: ޝާހިދު

މާލީއަހަރު ނިމިގެންދާއިރު، މި ސަރުކާރުގެ މާލީ ހިސާބުތަކުން ފެނިގެންދަނީ ސިޔާސީގޮތުން ކުރި ބޭކާރު ހަރަދުތައްކަމަށް އިދިކޮޅު އެންމެބޮޑު ޕާޓީ، އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

ސަރުކާރުގެ މާލީ ހިސާބުތަކާ ގުޅޭގޮތުން ޢަބްދުﷲ ޝާހިދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، އަހަރު ނިމިގެން ދާއިރު، މި ސަރުކާރުގެ މާލީ ހިސާބުތަކުން ދިވެހިންގެ ހިތްތަކަށް ލިބޭ ފިނިކަމެއް، ލިބުނު ހިތްހަމަޖެހުމެއް ނުފެނުނު ކަމަށެވެ. ޝާހިދު ވިދާޅުވީ، މިދިޔަ އަހަރާ ބަލާއިރު މިއަހަރު ދައުލަތަށް ލިބުނު އާމްދަނީ 78 މިލިޔަން އިތުރުވެފައި ވީނަމަވެސް ރައްޔިތުން ބިކަވެ, ނިކަމެތިވުން ނޫން ކަމެއް ނުވިކަމަށެވެ.

ޝާހިދު ވިދާޅުވީ ސަރުކާރުން އާސަންދައަށް ކުރި ޚަރަދު 101 މިލިއަން ރުފިޔާ މަދުކޮށްފައިވާކަމަށެވެ. މިކަންކަން މި ބީދައިން ހުރުމުން އިވެމުން ދަނީ ނިކަމެތި ރައްޔިތު މީހާ، އާސަންދައަށް އެދި ރޮއެ ކުރާ އާދޭހުގެ ހިތްދަތި އަޑުކަމަށެވެ. ކަން މިހެން ހުރިނަމަވެސް ސިޔާސީ މުސާރަ އާއި ގުޅުންހުރި ޚަރަދުތަކަށް 1.4 ބިލިއަން ރުފިޔާ އިތުރަށް ޚަރަދުކޮށްފައިވާކަމަށް ޝާހިދު ފާހަގަކުރިއެވެ.

އެންމެހާ ދިވެހިން، ކޮއްޕަމުން، ލަވަމުން، ވައްދަމުން އެގެންދަނީ ނުތަނަވަސްކަމާއި ކަންބޮޑުވުމެއްގެ ތެރެއަށް. އަޅުވެތިކަމުގެ ބަނދެލުމަކުން ދިވެހިން ބަނދެލުމަށް މި ސަރުކާރުން އެވަނީ މިސްރާބު ހިފާފައި.

ޝާހިދު ވިދާޅުވިއެވެ

ޝާހިދު ވިދާޅުވީ އާންމު ރައްޔިތުންގެ ވޭނުގެ އަޑު އެހުމާއި ނުލައި ކުރިއަށްދަނީ ސަރުކާރުގެ އިސްވެރިންގެ ޒާތީ މަންފާއަށް ކުރާ ބޭކާރު ހޭދަތަކާއި އެމަގަށް ކުރާ މަސައްކަތްތައްކަމަށެވެ.

އަދުގެ ސަރުކާރުން ސިޔާސީ ބޭނުންތަކަށް ކުރާ ހޭދަ އިތުރުވަމުން އަންނަކަމަށް ޝާހިދު ފާހަގަކޮށްފައިވާއިރު، މިއަހަރުގެ ޑިސެމްބަރުމަހުގެ 5 ވަނަ ދުވަހުގެ ނިޔަލަށް ދައުލަތުގެ ހަރަދުތައް 43.5 ބިލިއަން ރުފިޔާއަށް އަރާފައިވާކަމަށް މާލީވުޒާރާގެ ތަފާސްހިސާބުތަކުން ދައްކައެވެ.

މިއަހަރުގެ ޖުމްލަ ބަޖެޓްގެ ގޮތުގައި ރައްޔިތުންގެ މަޖިލީހުން ފާސްކޮށްދީފައިވަނީ، 49.8 ބިލިއަން ރުފިޔާއެވެ. ފިނޭންސް މިނިސްޓްރީން އާއްމުކޮށްފައިވާ ދައުލަތުގެ ހަރަދުބަރަދު ހުރި ގޮތް އަންގައިދޭ ތަފާސްހިސާބުތަކަށް ބަލާއިރު، ޑިސެމްބަރުމަހުގެ 5 ވަނަ ދުވަހުގެ ނިޔަލަށް ބަޖެޓުން 43.5 ބިލިއަން ރުފިޔާ ހަރަދުކޮށްފައިވާއިރު، މިދިޔަ އަހަރުގެ މި މުއްދަތުގައި ކުރި ހޭދަ ހުރީ 42.8 ބިލިއަން ރުފިޔާގައެވެ.

މިއަހަރުގެ މިހާތަނަށް ކުރި ހަރަދުތަކަށް ބަލާއިރު، ކެޕިޓަލް ހަރަދުގެ ގޮތުގައި 12.9 ބިލިއަން ރުފިޔާ ހިނގާފައިވާއިރު، ބަޖެޓުން ކުރި ރިކަރަންޓް ހަރަދު އުޅެނީ 30.5 ބިލިއަން ރުފިޔާގައެވެ. މިއަހަރުގެ މިހާތަނަށް ކުރި ހަރަދުތަކަށް ބަލާއިރު، މުސާރަ ދިނުމަށް 12.4 ބިލިއަން ރުފިޔާ ހޭދަކޮށްފައިވާއިރު، އިދާރީގޮތުން ކުރި ހަރަދު އުޅެނީ 18 ބިލިއަން ރުފިޔާގައެވެ. މިއަހަރުގެ މިހާތަނަށް ޕީއެސްއައިޕީ ޕްރޮގްރާމްތަކަށް ވަނީ 9.2 ބިލިއަން ރުފިޔާ ހަރަދުކޮށްފައެވެ.