ބ އަތޮޅުން ފެށިގެން މ އަތޮޅަށް ޔެލޯ އެލާޓް ނެރެފި

މޫސުން ވަރަށްބޮޑަށް ގޯސްވާނޭކަމަށް ލަފާކޮށް ބ އަތޮޅުން ފެށިގެން މ އަތޮޅާ ހަމަޔަށް ޔެލޯ އެލާޓް ނެރެފިއެވެ.

މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން އެ ސަރަހައްދަށް ޔެލޯ އެލާތް ނެރެފައިވަނީ މިއަދު 05:15 އިން ފެށިގެން ހެނދުނު 09:15 އާ ހަމަޔަށެވެ. މެޓް އޮފީހުން ބުނީ ޔެލޯ އެލާޓް ނެރެފައިވާ ވަގުތުގައި އެ ސަރަހައްދަށް ވައި ގަދަވެ،  ކަނޑުތައް ވަރަށް ގަދަވާނޭކަމަށް ލަފާކުރެެވޭ ކަމަށެވެ.

އެގޮތުން ބޯކޮށް ވާރޭވެހި ވިދާ ގުގުރައި ވިލާގަނޑުގައި 45 މޭލަށް ވައި ގަދަވާނޭކަމަށް ވަނީ ލަފާކޮށްފައެވެ.

މިދުިވަސްވަރަކީ މޫސުން ގޯސް ދުވަސްވަރެއްކަމުން ކަނޑުދަތުރުކުރާ ފަރާތްތަކުން މޫސުމަށް ބަލައިގެން ދަތުރުކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.

ކުރިއަށް މިދަނީ ހުލަނގު މޫސުމުގެ 17 ވަނަ ނަކަތްކަމަށްވާ ނޮރަ ނަކަތެވެ. މި ނަކަތުގައި ޢާންމުގޮތެއްގައި މޫސުން ރަނގަޅުވި ނަމަވެސް ދޭތެރެދޭތެރެއިން ކޮންމެވެސް ވަރަކަށް ވިއްސާރަކުރާނޭކަމަށް އިހުގެ މީހުން ބުނެއުޅެއެވެ. މި ނަކަތުގައި ކަނޑުގެ އޮއިވަރު އެކިގޮތްގޮތަށް ބަދަލުވާނެއެވެ. އަދި ނަކަތުގެ 3 ވަނަ ދުވަހުން ފެށިގެން އޮއިވަރު އިރުވައި މޫސުމުގެ ހުންނަ ގޮތަށް ބަދަލުވާން ފަށާނެއެވެ. އިހުގައި މީހުން ބުނެއުޅޭގޮތުން މި ނަކަތުގެ ފުރަތަމަ ވިއްސާރަ އަންނާނީ އިރުމަތިންނެވެ. މި ނަކަތުގެ ދުވަސްވަރު މަސްވެރިކަން ރަނގަޅުވާނޭކަމަށްވެސް ބުނެއުޅެއެވެ.