ފެނަކައިގެ ޕެޓީކޭޝްގެ ހަ ލައްކައަށް ހިޔާނާތްތެރިވި މައްސަލައެއް: ތިން މީހަކަށް ދައުވާ

ފެނަކަ ކޯޕަރޭޝަން ލިމިޓެޑް (ފެނަކަ) ގެ ސައިޓުތަކަށް ދޫކުރެވިފައިވާ ޕެޓީކޭޝް ފައިސާ ނަހަމަ ގޮތުގައި ބޭނުންކޮށްފައިވާ މައްސަލައެއްގައި ތިން މީހަކަށް ދައުވާކޮށްދޭން އެދިއްޖެ އެވެ.

މި މައްސަލަ ތަހުގީގު ކުރުމަށް ފަހު މިއަދު ޕީޖީ އޮފީހަށް ފޮނުވާފައިވާ ކަމަށް އޭސީސީން ބުންޏެވެ.

އޭސީސީން ބުނީ ސ.ހިތަދޫ ސެންޓްރަލް ޕަވަރ ސްޓޭޝަން ޕްރޮޖެކްޓުގެ ޕެޓީކޭޝް ފައިސާގެ ގޮތުގައި ފެނަކައިން ދޫކޮށްފައިވާ ފައިސާ، އެ ކުންފުނީގެ ޕެޓީ ކޭޝް ބެލެހެއްޓުމާ ބެހޭ ގަވާއިދާ ހިލާފަށް އަމިއްލަ ބޭނުންތަކަށް ބޭނުން ކޮށްފައިވާ ކަމަށެވެ. އެކަން ކޮށްފައި ވަނީ ފެނަކައިގެ ޕްރޮޖެކްޓްސް ޑިޕާޓްމަންޓުގެ ޑެޕިއުޓީ ޑިރެކްޓަރުގެ މަގާމުގައި އޭރު ހުރި އަޙްމަދު ސާތިޝް ސަޢީދު އާއި ފެނަކައިގެ ޕްރޮޖެކްޓްސް ޑިޕާޓްމަންޓުގެ ސީނިއާ އިންޖިނިއާގެ މަގާމުގައި އޭރު ހުރި މުހައްމަދު ޢާޞިދު އާއި ފެނަކައިގެ ސުޕަވައިޒަރެއްގެ މަގާމުގައި އޭރު ހުރި ހުސައިން އާސިރު އެވެ.

އެ މީހުންގެ މައްޗަށް ދައުވާކޮށް ދޭން ފޮނުވާފައިވާ ކަމަށާ އެ މީހުންގެ މައްޗަށް ހަތަރު ދައުވާއެއް ކޮށްދޭން އެދިފައިވާ ކަމަށް ބުންޏެވެ. އެއީ;

* ކުށެއްކުރަން އެދުމުގެ ކުށުގެ ދައުވާ

* ކުށެއްކުރަން ރޭވުމުގެ ކުށުގެ ދައުވާ

* ރަސްމީ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން މަންފާ ހޯދުމާއި ހޯދައިދިނުމުގެ ކުށުގެ ދައުވާ

* ދައުލަތުގެ މުދަލާއި ފައިސާއަށް ޚިޔާނާތްތެރިވުމުގެ ކުށުގެ ދައުވާ

އަދި މި މައްސަލައިގައި، 623,208.80 ރުފިޔާ އަނބުރައި ހޯދުމަށް އޭސީސީން ވަނީ ފެނަކައަށް އަންގާފަ އެވެ. މި މައްސަލައިގައި ތުހުމަތުކުރެވޭ މި ތިން މީހުން ފޯޖަރީގެ އަމަލުތަކެއް ހިންގާފައިވާ ކަމަށް ކޮމިޝަނުގެ ތަހުގީގަށް ފާހަގަކުރެވޭތީ، އެކަން ތަހުގީގު ކޮށްދިނުމަށް ފުލުހަށް ފޮނުވުމަށް ކޮމިޝަނުން ނިންމާފައިވާ ކަމަށް ވެސް ބުންޏެވެ.