"ވަގު ޕޭޖުތައް ހިންގާ މީހުން ފަޅާއަރާނެ" ކަމަށް ވިދާޅުވެ ޝަހީމް ކުރެއްވި ޕޯސްޓް ޑިލީޓް ކުރައްވައިފި
ލިޔުންތެރިޔާ
އަހުމަދު ހަމީދު އާދަމް
"ވަގު ޕޭޖުތައް ހަދައިގެން އުޅޭ މީހުން ފަޅާއަރަންވީމާ ހަމަ ފަޅާއަރާނެ" ކަމަށް ވިދާޅުވެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ކުރެއްވި ޕޯސްޓް ޑިލީޓް ކުރައްވައިފި އެވެ.
މިނިސްޓަރު ޝަހީމް ވަނީ ފޭސްބުކްގައި މިއަދު ކުރެއްވި އެ ޕޯސްޓް, ޕޯސްޓް ކުރެއްވިތާ އިރުކޮޅެއްގެ ތެރޭގައި ޑިލީޓް ކުރައްވާފަ އެވެ. ޕޯސްޓްގައި ޝަހީމް ވިދާޅުވީ "ވަގު ޕޭޖުތައް ހަދައިގެން އުޅޭ މީހުން ފަޅާއަރަންވީމާ ހަމަ ފަޅާއަރާނެ" ކަމަށެވެ. އޭގެ ފަހުން މަލާމާތުގެ ގޮތުން ބޭނުންކުރާ އިމޯޖީތަކެއް ޖައްސަވާފައިވެ އެވެ. އަދި ކުރީން ވިދާޅުވި ވާހަކަތަކަށް ބާރު ދެއްވުމުގެ ގޮތުން "މިއީ ކަން އޮތްގޮތް" ކަަމަށް ވިދާޅުވި އެވެ.
ޝަހީމް މިފަދަ ޕޯސްޓެއް ކުރައްވާފައި މިވަނީ އިސްލާމިކް މިނިސްޓަރު ޑރ. މުޙައްމަދު ޝަހީމްއާ ގުޅޭ "ނުބައި" ޕޯސްޓެއް ޝެއާ ކުރެވުނު ގޮތް ބަލަމުންދާ ކަމަށް ސިޓީސް މިނިސްޓަރު އާދަމް ޝަރީފް އުމަރު ވިދާޅުވެފައި ވަނިކޮށެވެ.
ޝަހީމްއާ ގުޅޭ ވިޔާނުދާ ވާހަކަތަކަކާއި ބޮޑެތި ތުހުމަތުތަކެއް ކޮށްފައިވާ ޕޯސްޓެއް އާދަމްގެ ޕާސަނަލް އެކައުންޓުން ވަނީ ޝެއާ ކޮށްފަ އެވެ. އެއީ އާދަމްގެ އެކައުންޓް ކަން ވަނީ ޔަގީން ކޮށްދީފަ އެވެ.
އެކަމާއި ގުޅިގެން އާންމުންގެ ގިނަަ ބަަޔަކު ސުވާލު އުފެއްދުމުން މިނިސްޓަރު އާދަމް ވަނީ ފޭސްބުކްގައި ޕޯސްޓެއް ކުރައްވާފަ އެވެ. ވިދާޅުވީ މިނިސްޓަރު ޝަހީމަކީ ވަރަށް އިހްތިރާމް ކުރާ ދީނީ އިލްމުވެރިއެއް ކަމަށެވެ. އަދި އެއީ ދައުލަަތަށް ގިނަގުނަ ހިދުމަތްތަކެއް ކުރައްވަމުން ގެންދަވާ އިހްލާސްތެރި ހާދިމެއް ކަމަށެވެ.
މިނިސްޓަރު ޝަހީމަކީ އޭނާގެ އެކުވެރި އަދި ވަރަށް ރަހްމަތެރި ބޭފުޅެއް ކަމަށްވެސް ވިދާޅުވި އެވެ.
"އެމަނިކުފާނާއި ބެހޭ ގޮތުން އަޅުގަނޑު ގަބޫލުނުކުރާ އެއްޗެއް އަޅުގަނޑުގެ ފޭސްބުކް ޕޭޖުގައި ހިއްސާ ކުރެވުނީ ކިހިނެތްތޯ މި ދަނީ ބަލަމުން," އާދަމްގެ ފޭސްބުކް ޕޯސްޓްގައި ވިދާޅުވެފައިވެ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
