މަޖިލީހަށް ޕީއެންއެފް ކެންޑިޑޭޓުން ނެރުނީ، ސަރުކާރު ދިފާއުކުރަން: ރައީސް ޔާމީން

ކުރިއަށް އޮތް މަޖިލިސް އިންތިހާބުގައި ވާދަކުރަން ޕީއެންއެފްގެ ކެންޑިޑޭޓުން ނެރުނީ އެމްޑީޕީއަށް އެއްވެސް ގޮނޑިއެއް ލިބުނަ ނުދޭން ކަމަށް ކުރީގެ ރައީސް އަބްދުالله ޔާމީން އަބްދުލް ގައްޔޫމް ވިދާޅުވެއްޖެއެވެ.

ޕީއެންއެފްގެ ފަރާތުން މަޖިލީހަށް ވާދަކުރާ ކެންޑިޑޭޓުންގެ ތަސައްވުރު އިއުލާންކޮށް ސުވާލު ކުރުމަށް ރޭ ބޭއްވި ޖަލްސާގައި ރައީސް ޔާމީން ވަނީ އެމްޑީޕީގެ އެންމެ ކެންޑިޑޭޓެއްވެސް މަޖިލީހަށް އިންތިޚާބު ކުރަންޖެހޭތޯ ޕީއެންއެފްގެ ކެންޑިޑޭޓަކާއި ސުވާލު ކުރައްވާފައެވެ.

އޭގެ ޖަވާބުގައި، އެމްޑީޕީ އެއްވެސް ކެންޑިޑޭޓަކަަށް ވޯޓުދޭން ނުޖެހޭނެ ކަމަށް އެ ކެންޑިޑޭޓް ވިދާޅުވުމުން ޔާމީން ވަނީ އެމްޑީޕީ ކެންޑިޑޭޓަކަށް ވެސް ވޯޓުދޭންޖެހޭފަދަ ހާލަތެއް އައިސްދާނެ ކަމުގެ އިޝާރާތެއް ދެއްވާފައެވެ.

މިސާލަކަށް އެމްޑީޕީން ދާއިރާއަކަަށް ނުކުމެ ހުރި ކެންޑިޑޭޓަށް ވުރެ، ޕީއެންސީން އެ ދާއިރާއަށް ނުކުމެ ހުރި ކެންޑިޑޭޓް، އަދި އެއަށްވުރެ ގީލަރުކަން ބޮޑުވެއްޖެ ނަމަ، އެމްޑީޕީ ކެންޑިޑޭޓަށް ވޯޓުދޭން ޖެހިދާނެތޯ؟ އެކަމުގެ ޕްރޮބަބިލިޓީއެއް އެބައޮތް ދެއްތޯ؟

ރައީސް ޔާމީން އަބްދުލްގައްޔޫމް

މިއާއެކު އެމަނިކުފާނު ވިދާޅުވީ، ކުރިއަށް އޮތް ވޯޓުގެ ނަތީޖާ ނުކުންނާނެ ގޮތް އަންދާޒާ ނުކުރެއްވޭކަމަށާއި ޕީއެންއެފްއިން އެފަދަ ހުރިހާ ހާލަތަކަށްވެސް ތައްޔާރުވާންޖޭހެކަމަށެވެ.

އަދި، ޕީއެންއެފް އިން ކެންޑިޑޭޓުން ނެރެފައިވަނީ، ޕީއެންސީގެ "ވީކް" ކެންޑިޑޭޓުން ތިބި ދާއިރާ ތަކުގެ ގޮނޑިތައް އެމްޑީޕީއަށް ލިބުނަ ނުދޭން ކަމަށްވެސް ޔާމީން ވިދާޅުވި އެވެ.

ޕީއެންސީން ނެރެފައި ތިބި ހެވީ ކެންޑިޑޭޓުން, އެ ދާއިރާތަކުން ދަތި ކަމެއް ނެތި ހޮވިދާނެ ކަމަށް އަޅުގަނޑުމެންނަށް ގަބޫލުކުރެވޭ ދާއިރާ ތަކަށް ޕީއެންއެފް އިން މީހަކު ނުނެރޭ. އެހެންވީމާ އަޅުގަނޑުމެން ޕީއެންސީއާ ކުރާ ވާދައެއް ނެތެއް ނޫންތޯ؟ ޕީއެންސީގެ ނުހޮވިދާނެހެން ހީވާ ކެންޑިޑޭޓުން ތިބި ދާއިރާ ތަކަށް އަޅުގަނޑުމެން އެބަ ކެންޑިޑޭޓުން ނެރެން. އެއީ އެ ގޮނޑި އެމްޑީޕީއަށް ނުލިބުމުން ޓަކައި. އެހެން ނޫނީ، އެ ގޮނޑި އެމްޑީޕީއަށްދާނެ. އެއީ ރައްޔިތުން ވޯޓުލާން އިތުރު ޗޮއިސް ނެތީ.

ރައީސް ޔާމީން އަބްދުލްގައްޔޫމް

އެހެންކަމުން، ކަންކަން ރަނގަޅަށް ގޮސްފިނަމަ، ޕީއެންސީން ވާދަކުރާ، ބުރަދަންހުރި ކެންޑިޑޭޓުންނާއި އަދި "ބަލިކަށިކޮށް ހުރި ދިމަ ދިމާއަށް" ޕީއެންއެފްއިން ނެރުނު ކެންޑިޑޭޓުން އިންތިޚާބު ވެއްޖެނަމަ، "ސަރުކާރު ދިފާއު ކުރާނެ ވަރުގަދަ ލެޖިސްލޭޓިވް ފޯސްއެއް" އުފެއްދޭނެ ކަމަށް ޔާމީން ވިދާޅުވި އެވެ. މިއާއެކު އެމަނިކުފާނު ވަނީ އެމްޑީޕީއަށް ގޮނޑިއެއް ދޭންޖެހޭ އެއްވެސް ސަބަބެއް ނުފެންނަ ކަމަށް ވިދާޅުވެފައެވެ.