މި ސަރުކާރު ނިމޭއިރު ރާއްޖޭގެ މަސް ރައްކާ ކުރުމުގެ ކެޕޭސިޓީ ހުންނާނީ 25،000 ޓަނަށްވުރެ މަތީގައި: ޝިޔާމް

މި ސަރުކާރުގެ ފަސް އަހަރުގެ ދައުރު ނިމޭއިރު، މަހުގެ ސްޓޯރޭޖް ކެޕޭސިޓީ 25،000 ޓަނަށް ވުރެ އިތުރުކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެންބަރު އަހުމަދު ދީދީ ވަނީ ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް 48 ގަޑިއިރު ތެރޭ މަސްވެރިންނަށް ފައިސާ ދޭން ވިދާޅުވި ގޮތަށް އެ ފައިސާ ނުދެވިގެން އުޅެނީ ކީއްވެތޯ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ޝިޔާމް ވަނީ ކުރީ ސަރުކާރުން އިންތިޚާބާ ދިމާކޮށް އެއްވެސް ރޭވުން ތެރިކަމެއް ނެތިމަހުގެ އަގު -/25ރ އަށް މަތިކޮށްލާފައިވާއިރު އެ ވެރިކަން ނިމުނު އިރު މަސްވެރިންނަށް ނުދީ ބެކްލޮގްގައި 250 މިލިއަން ރުފިޔާގެ ފައިސާ ހުރި ކަަން ފާހަގަކުރައްވާފައެވެ.

ޝިޔާމްގެ އެ ވާހަކައާއި ގުޅިގެން ހިތަދޫ ދެކުނު ދާއިރާގެ އެމްޑީޕީގެ ޕީޖީ ލީޑަރު އިބްރާހީމް ނާޒިލް ވަނީ 250 މިލިއަން ރުފިޔާ ބެކް ލޮގުގައި ހުރި ވާހަކަ ދައްކަވާއިރު އެއާ ވާ ވަރަށް މަސް، ސްޓޯރޭޖްގައި ހުރިތޯ ނުވަތަ ނެތްތޯ ސުވާލު ކުރައްވާފައެވެ.

އެ ސުވާލަށް ޖަވާބުދެއްވާ ޝިޔާމް ވިދާޅުވީ، 250 މިލިއަން ރުފިޔާގެ ބެކްލޮގެއް އޮތް ނަމަވެސް އެހާ ރުފިޔާއަށް ވާވަރަށް މަސް ރައްކާކުރާނެ ކެޕޭސިޓީ ރާއްޖޭގައި ނެތް ކަމަށެވެ.

”ކޮންތާކުތޯ އެ މަސް ރައްކާކުރާނީ؟ މިއަދު ރާއްޖޭގެ ސްޓޯރޭޖް ކެޕޭސިޓީއަކީ 8500 ޓަނު. ކިހިނެއްތޯ 250 މިލިއަން ރުފިޔާގެ މަސް، އެ ސްޓޯރުގައި ސްޓޯރ ކުރާނީ؟ އިންސާނުންގެ ބުއްދިއަށް ގަބޫލުކުރެވޭ ވާހަކަ ކަންނޭނގެ އަޅުގަނޑަށް ހީވަނީ ގަބޫލު ކުރަންޖެހޭނީ. 250 މިލިއަން ރުފިޔާގެ މަސް ސްޓޯ ކުރެވޭނެ ސްޓޯރޭޖެއް ނެތް.“ ޝިޔާމް ވިދާޅުވުއެވެ.

އަޅުގަނޑުމެން މި އުޅެނީ، އިރާދަކުރެއްވިއްޔާ 250 މިލިއަން ރުފިޔާގެ މަސް ހުރި ނަމަ، އެ މަސްވެސް ސްޓޯ ކުރެވޭނެ ކެޕޭސިޓީ އިރާދަކުރެއްވިއްޔާ އިތުރުކުރަން މިއުޅެނީ. ދިވެހި ރާއްޖޭގެ ސްޓޯރޭޖް ކެޕޭސިޓީ އިރާދަކުރެއްވިއްޔާ އަޅުގަނޑުމެންގެ ސަރުކާރު ނިމޭއިރުގައި ހުންނާނީ 25،000 ޓަނަށްވުރެ މަތީގައި އިރާދަކުރެއްވިއްޔާ ރައީސް މުޢިއްޒުގެ ސަރުކާރު ނިންމާލާއިރު ހުންނާނީ

ފިޝަރީޒް މިނިސްޓަރު އަހުމަދު ޝިޔާމް

މިފްކޯގެ ކުންފުނީގެ ތަފާސް ހިސާބުތަކުން ދައްކާ ގޮތުން މިދިޔަ އަހަރުގެ ނޮވެމްބަރު 17 އިން މި އަހަރުގެ ސެޕްޓެމްބަރު މަހާ ހަމައަށް ދިޔައިރު ކުންފުނިން ވަނީ މަސްވެރިންނަށް ނުދެވި ހުރި ފައިސާގެ ތެރެއިން 862.3 މިލިއަން ރުފިޔާ ދައްކައިފައެވެ.