ފޭސް 2 ގައި ބިނާކުރަމުންދާ ސުކޫލު މިއަހަރުގެ ނޮވެމްބަރު މަހު ނިންމާލެވޭނެ: ޑރ. ޝަފީޢު
ލިޔުންތެރިޔާ
ޚަދީޖާ އަރުފާ
ހުޅުމާލެ ފޭސް2 ގައި މިހާރު އަޅަމުންދާ ސްކޫލުގެ މަސައްކަތް މި އަހަރުގެ ނޮވެމްބަރު މަހުގެ ނިޔަލަށް ނިމޭނެ ކަމަށް ތަޢުލީމީ ވަޒީރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވަނީ ހުޅުމާލޭގައި، ޚާއްސަކޮށް ހުޅުމާލެ ފޭސް2 އިން ގިނަ އަދަދެއްގެ ދަރިވަރުން އަދިވެސް ކިޔެވުމަށް މާލެ އަންނަން ޖެހޭތީ އެ ދަރިވަރުންނަށް ތަކުލީފްތަކަކާ ކުރިމަތިލާންޖެހޭކަން ފާހަގަކުރައްވައި އެކަމަށް ދާއިމީ ހައްލެއް ލިބޭނެ ދުވަހަކާ ގުޅޭގޮތުން ސުވާލުކުރައްވާފައެވެ.
އެ ސުވާލަށް ޖަވާބު ދެއްވަމުން ވަޒީރު ޝަފީއު ވިދާޅުވީ އާބަން ޑިވެލޮޕްމެންޓުގެ ތެރެއިން މިހާރު އެންމެ އިސްކަން ދެނީ ފްލެޓު އެކަނި އަޅަން ކަމަށާއި ނަމަވެސް އެ ފްލެޓް އަޅަން ވިސްނާއިރު، ފުލެޓް ތަކުގައި ދިރިއުޅޭ ރައްޔިތުންނަށް ބޭނުންވާނެ އެހެން ޚިދުމަތްތައް ގާއިމްކުރަން ވެސް ވިސްނަން ޖެހޭ ކަމަށެވެ.
"މިސާލަކަށް އަޅުގަނޑު ދަންނަވާލަން ބޭނުންވަނީ 7000 ފްލެޓުގެ ހިޔާ ފްލެޓް ނިމިގެން ދިޔައިރުގައި ވަރަށް ގިނަ ދުވަސްވި، ފަސް ވަރަކަށް އަހަރު ދިޔަ. އެ ފަސް އަހަރު ތެރޭ ވެސް އެކަށީގެންވާ ސްކޫލު ބިނާރުތަކެއް އެ ސަރަހައްދުގައި ގާއިމެއް ނުކުރެވުނު. އެންމެ ސްކޫލެއް، ޞަލާހުއްދީން ސްކޫލު ބިނާ ކުރެވިގެން ދިޔައީ. ޞަލާހުއްދީން އެއް ސެޝަނަށް ހިނގަމުން އަންނަނިކޮށް އަޅުގަނޑު ނިންމީ އެތައް ހާސް ދަރިވަރުންނެއް ކޮންމެ ދުވަހަކު ބްރިޖު ހުރަސްކޮށް މާލެ އަށް އަންނަމުންދާތީ އެ ތަކުލީފު ކުޑަކުރުމަށް ސޮލާހުއްދީން ދެ ސެޝަނަށް ބަދަލު ކުރުމަށް“
ތަޢުލީމީ ވަޒީރު ޑރ. އިސްމާއިލް ޝަފީއު
މިއާއެކު ވަޒީރު ވިދާޅުވީ، މި ސަރުކާރުގެ ފުރަތަމަ ޕްރޮޖެކްޓްގެ ގޮތުގައި، ފޭސް 2 ގެ ހިޔާ ފްލެޓްތައް ކައިރީގައި 54 ކްލާސްރޫމުގެ ސްކޫލު އިމާރާތެއްގެ މަސައްކަތް ކުރިއަށްދާ ކަމަށާ، އެ ސްކޫލުގެ މަސައްކަތް ނޮވެމްބަރަށް ނިމޭނެ ކަމަށެވެ.
އެ ސުކޫލު ނިމުމާއެކުގައި، ފުދޭވަރަކަށް ބޮޑު ހައްލެއް އިރާދަކުރެއްވިއްޔާ ލިބިގެންދާނެ. ޖުމްލަ ހައްލެއްނޫން. ހަމަ އެއާއެކު މި އަހަރު ތެރޭ އިތުރު ދެ ސްކޫލެއްގެ މަސައްކަތް އަޅުގަނޑުމެން ފައްޓާނަން. އެއީ ފޭސް 2 އެއް ސްކޫލާއި ފޭސް 1 ގެ އެއް ސްކޫލް. ފޭސް1 އަށް ބަލާއިރު ވެސް ސިފްކޯ، ޕޮލްކޯ އަދި އެޕޯލޯ ޓަވަރުތައް ކައިރީ ސްކޫލެއް ނެތުމުގެ އުނދަގޫ ވަރަށް ބޮޑަށް ކުރަމުން މިދަނީ. އެނެްވީމާ ހުޅުމާލޭގައި ގޮންޖެހުންތަކެއް އެބަހުރި، އެ ގޮންޖެހުންތައް ހައްލު ކުރުމަކީ އަޅުގަނޑުމެން އެންމެ އިސްކަން ދޭ ކަންތައް. ދެ ސްކޫލު މި އަހަރު އަޅުގަނޑުމެން ފަށާނަން މި އަހަރު،"
ތަޢުލީމީ ވަޒީރު ޑރ. އިސްމާއިލް ޝަފީއު
އެޑިއުކޭޝަން މިނިސްޓްރީ އިން މީގެ ކުރިން ހާމަކޮށްފައިވާގޮތުގައި ދިރާސީ އާ އަހަރުގެ ކިޔެވުން ފެށުނު އިރު މާލެ އަށް ވުރެ ޑިމާންޑު ބޮޑީ ހުޅުމާލޭ ސްކޫލުތަކަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
