ވިލިމާލޭ ދާއިރާގެ ގޮނޑި މުޙައްމަދު އިސްމާއީލަށް

ރައްޔިތުންގެ މަޖިލިހުގެ 20 ވަނަ އިންތިޚާބުގައި ވިލިމާލެ ދާއިރާގެ ގޮނޑި މުޙައްމަދު އިސްމާޢީލް ކާމިޔާބު ކުރައްވައިފިއެވެ.

ޕީޕީއެމް/ޕީއެންސީގެ ކެނޑިޑޭޓު މުޙައްމަދު އިސްމާއީލް މި ގޮނޑި ކާމިޔާބު ކުރައްވާފައިވަނީ ބޮޑު ތަފާތަކުންނެވެ.

އެގޮތުން ވަގުތީ ނަތީޖާ ދައްކާ ގޮތުން، މުޙައްމަދު އިސްމާޢީލް މި ގޮނޑި ކާމިޔާބު ކުރައްވާފައިވަނީ ވިލިމާލޭގައި ބެހެއްޓުނު 5 ވޯޓުފޮށީގެ ތެރެއިން ފުރަތަމަ ފޮށިން 357 ވޯޓު، ދެވަނަ ފޮށިން 286 ވޯޓު، ތިން ވަނަ ފޮށިން، 247 ވޯޓު، ހަތަރު ވަނަ ފޮށިން 159 ވޯޓު އަދި ފަސް ވަނަ ފޮށިން 172 ހޯދައްވާ ޖުމުލަ 1221 ވޯތު ހޯދައްވައިގެންނެވެ. މިއީ ވިލިމާލޭ ދާއިރާއަށް ލިބުނު 69.3 އިންސައްތަ ވޯޓެވެ.

މުޙައްމަދު އިސްމާޢީލް ވަނީ އަށާރަ ވަނަ ރައްޔިތުންގެ މަޖިލީހުގައި ހޯރަފުށި ދާއިރާ ތަމްސީލް ކުރައްވާފައެވެ.

ނިމިގެން ދިޔަ ރިޔާސީ އިންތިޚާބުގެ ދެބުރުގައި ވެސް މުހައްމަދު ފެނިގެންގޮސްފައި ވަނީ ޕާޓީގެ އެންމެ ހަރަކާތްތެރި އެއް މެންބަރުގެ ގޮތުގަ އެވެ. ޚާއްސަކޮށް އިންތިޚާބުގެ ކެމްޕޭން ނިންމާލުމަށް ބޭއްވި ރެލީތައް އިންތިޒާމް ކުރުމުގައި އެންމެ އިސްކޮށް އުޅުއްވި އެއް ބޭފުޅަކީ މުހައްމަދެވެ.