ނުގަވާއިދުން އުޅޭ ބިދޭސީންނަށް ކެއުމާއި ނިދުން ހަމަަޖައްސައިދޭ މީހުންނަށް ގާނޫނުގައިވާ ފިޔަވަޅު އަޅާނަން: ޝަމްޢާން

ނުގަވާއިދުން އުޅޭ ބިދޭސީންނަށް ކެއުމާއި ނިދުން ހަމަޖައްސައިދޭ ފަރާތްތަކާމެދު ގާނޫނުގައިވާ ގޮތުގެމަތިން ފިޔަވަޅު އަޅުއްވާނެ ކަމަށް ވިދާޅުވެ އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަޙީދު އިންޒާރުދެއްވައިފިއެވެ.

އިމިގްރޭޝަން ކޮންޓްރޯލަރ ޝަމްޢާން އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިރުޝާދުފުޅުގެ ދަށުން ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ކުރެވޭ މަސައްކަތްތަކުގެ ތެރެއިން މި ފިޔަވަޅު އެޅުމަށް ނިންމާފައިވާ ކަމަށެވެ.

ޝަމްޢާން ވިދާޅުވީ، އާންމު ޞިއްޙަތުގެ ރައްކާތެރިކަމަށާއި ސަލާމަތަށް ނުރައްކާވާފަދަ ގޮތަށް ގަވާއިދާ ޚިލާފަށް އުޅޭ ބިދޭސީންނަށް ކެއިންބުއިމާއި ނިދުމުގެ ކަންކަން ހަމަޖައްސައިދޭ ފަރާތްތަކާމެދު، ދިވެހިރާއްޖޭގެ އިމިގްރޭޝަން ގާނޫނުގެ 33 ވަނަ މާއްދާގެ ދަށުން ފިޔަވަޅު އެޅޭނެ ކަމަށެވެ.

"ގާނޫނުތައް ހެދިފައިވަނީ އެކަކު ނުވަތަ ދެމީހެއްގހެއްގެ ކޮންވީނިއަންސަކަށް ނޫން. އާންމު އެންމެހާ ފަރުދުންގެ ސަލާމަތާއި ރައްކާތެރިކަމަށްޓަކައި ހެދިފައިވާ ގާނޫނުތައް ތަންފީޒުކުރުމުން ހިތްހަމަނުޖެހޭ ބަޔަކު އުޅެދާނެ. ކުރިން ގާނޫނު ތަންފީޒު ނުކޮށް އޮތުމަކީ މިއަދު ހަމަ އެގޮތަށް އޮންނަން ޖެހޭނެ ޙުއްޖަތެއް ނޫން," ޝަމްޢާން ވިދާޅުވިއެވެ.

އިމިގްރޭޝަން ގާނޫނުގެ 33 ވަނަ މާއްދާގައި ބަޔާންކުރަނީ، އެ ގާނޫނާ ޚިލާފުވުމަކީ ކުށެއްކަމަށެވެ. އެ ކުށަށް ދިވެއްސަކު އަރައިގަނެފިނަމަ 50,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުމާއެކު އެމީހެއްގެ ޕާސްޕޯޓު ހިފެހެއްޓުމުގެ އިޚްތިޔާރު ކޮންޓްރޯލަރ އޮފް އިމިގްރޭޝަނަށް ލިބިގެންވެއެވެ. ބިދޭސީއެއްނަމަ 15,000 ރުފިޔާއާއި 50,000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.

ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް އިމިގްރޭޝަނުން އަންނަނީ ހުއްޓުމެއްނެތި ގިނަ މަސައްކަތްތަކެއް ކުރަމުންނެވެ. އެގޮތުން، ފަށާފައިވާ މަސައްކަތުގެ ތެރެއިން މިހާތަނަށް 3,000 އަށްވުރެ ގިނަ ބިދޭސީން ޑިޕޯޓުކޮށްފައިވާ ކަމަށާއި، ބިދޭސީން ހިންގަމުން އައި ވަރަށް ގިނަ ވިޔަފާރިތައް ހޯދައި ފުލުހުންނާއި އިމިގްރޭޝަނުން ބަންދުކޮށްފައިވާ ކަމަށް ޝަމްޢާން ވަނީ ވިދާޅުވެފައެވެ.