ޣައްޒާގައި ދިވެހީންގެ ފަރާތުން ބިޔަ ބޮޑު ރޯދަ ވީއްލުމެއް، ބައިވެރިވާން ބޭނުންތަ!

ފަލަސްތީނުގެ ޣައްޒާގައި ދިވެހީންގެ ފަރާތުން ބިޔަ ބޮޑު, ރޯދަ ވީއްލުމުގެ ހަރަކާތެއް ބޭއްވުމަށް އިންޓަނޭޝަނަލް އެއިޑް ކެމްޕެއިނުން ނިންމައިފި އެވެ.

އައިއޭސީން ބުނީ ޣައްޒާގެ ރައްޔިތުންނަށް ޚާއްސަ ރޯދަ ވީއްލުން ބާއްވަން ތައްޔާރު ވަމުން ދަނީ އަންނަ ހުކުރު ދުވަހު ކަމަށެވެ. މިއީ ދިވެހިރާއްޖެއާ ދިވެހީންގެ ނަމުގައި އެ ޖަމާއަތުން އިންތިޒާމު ކުރާ ހަރަކާތެކެވެ.

އައިއޭސީގެ އުންމީދަކީ މަދުވެގެން ހާހެއްހާ މީހުންނަށް ބައިވެރިވެވޭ ގޮތަށް މި ރޯދަ ވީއްލުން ބޭއްވުމެވެ.

ޣައްޒާގެ ރައްޔިތުންނަށް ހާއްސަ މި ރޯދަ ވީއްލުމަށް އެހީތެރިވުމުގެ ފުރުސަތު އައިއޭސީން މިހާރު ވަނީ ހުޅުވާލާފަ އެވެ.

އެ ޖަމާއަތުން ބުނީ މީހަކަށް ރޯދަ ވީއްލުމެއް ދިނުމުގެ އަގަކީ 85 ރުފިޔާ ކަމަށެވެ. އެހެން ކަމުން އެ އަދަދު ނުވަތަ އެއަށް ވުރެ ގިނައިން ފައިސާ ހަދިޔާ ކޮށްގެން ވެސް މި ހަރަކާތަށް އެހީތެރިވެދެވޭނެ ކަމަށެވެ.

ދިވެހީންނަކީ ޣައްޒާގެ ރައްޔިތުންނަށް އެހީތެރިވުމުގައި ނަމޫނާ ބައެކެވެ. ފަލަސްތީނާއި ޣައްޒާގެ ރައްޔިތުން ވެސް އެކަން ބަލައިގަންނަނީ ޝުކުރުވެރިކަމާ އެކު އެވެ. މުޅި ދުނިޔޭގައި ވެސް ދިވެހީން, މަޝްހޫރުވެފައިވަނީ ފަލަސްތީނުގެ މިނިވަން ކަމުގެ ހައްގުގައި އެންމެ ގަދައަށް އަޑުއުފުލާ, އަދި އެހީތެރިވެދޭ މީހުންގެ ގޮތުގަ އެވެ.

"މިއީ އިންޝާﷲ ތާރީހުގައި ފަވާލެވޭނެ ދުވަހެއް," އަންނަ ހުކުރު ދުވަހު ބާއްވަން ތައްޔާރުވަމުންދާ ބިޔަ ބޮޑު ރޯދަ ވީއްލުމާއި ގުޅޭގޮތުން އައިއޭސީ އިން ބުންޏެވެ.

އެ ޖަމާއަތުން ދެކޭ ގޮތުގައި މިއީ ހުރިހާ ދިވެހީން ފަހުރުވެރިވާނެ ފަދަ ކަމެކެވެ. އެހެން ކަމުން ވީހާވެސް ގިނަ ބަޔަކު މި ހަރަކާތުގައި ބައިވެރިވުމަށް ވަނީ އެދިފަ އެވެ.

އައިއޭސީ ފާހަގަ ކުރެވިފައި ވަނީ ދިވެހީންގެ އެހީ ޣައްޒާއާ އެހެނިހެން ގައުމުތަކުގައި ތިބި ހާލުގައި ޖެހިފައިވާ މުސްލިމުންނަށް ފޯރުކޮށް ދިނުމުގައި ނަމޫނާ ޖަމާއަތެއްގެ ގޮތުގަ އެވެ.

ރޯދަވީއްލުން ޕެކޭޖެއްގެ އަގަކީ 85ރުފިޔާ

ރޯދަވީއްލުން ހަދިޔާކުރެއްވުމަށް ތިރީގައިވާ އެކައުންޓް ޚިޔާރުކުރައްވާ!

👇🏻

އެކައުންޓް ނަމްބަރު: 7770000062740

އެކައުންޓް ނަން: International Aid Campaign

އެކައުންޓް ލޭބަލް: seasonal projects.

ޓްރާންސްފަ ކޮށްފަ ސްލިޕް 9122121 އަށް ވައިބާ ކޮށްލަންވާނެ..

.ފަލަސްތީނުގެ ޣައްޒާގައި ދިވެހީންގެ ފަރާތުން ބިޔަ ބޮޑު, ރޯދަ ވީއްލުމުގެ ހަރަކާތެއް ބޭއްވުމަށް ތައްޔާރުވަމުންދާ މި ދަނޑިވަޅަކީ އެ އަވަށަށް އިންސާނީ އެހީ ވެއްދުމަށް އިޒްރޭލުން ހުރަސް އަޅަމުންދާ ވަގުތެކެވެ. އެކަމުގެ ސަބަބުން ޣައްޒާގެ އެތައް ހާސް ބަޔަކު ބަނޑަށް ޖެހިދާނެ ކަމުގެ ބިރު އޮތީ ހީވެފަ އެވެ.