އިސްރާއީލުގެ ޕާސްޕޯޓް މަނާކުރަން ސަރުކާރުން ނިންމި ނިންމުމަށް ޑރ.އަލީ ޒާހިރުގެ ތައުރީފް

އިސްރާއީލުގެ ޕާސްޕޯޓް މަނާކުރުމަށް ސަރުކާރުން ނިންމި ނިންމުމަށް ޑރ.އަލީ ޒާހިރު ބިން ސައީދު ގާސިމް ތައުރީފް ކުރައްވައިފިއެވެ.

ސަރުކާރުގެ މި ނިންމުމަށް ތައުރީފް ކުރައްވާ އެކްސް ގައި ޑރ.އަލީ ޒާހިރު ކުރެއްވި ޕޯސްޓެއްގައި ވިދާޅުވީ، އިސްރާއީލުގެ ޕާސްޕޯޓް މަނާ ކުރުމަކީ ސަރުކާރުގެ ހިތްވަރުގަދަ ނިންމުމެއްކަމަށާއި، މިއީ ދިވެހި ރާއްޖެ ފަދަ ކުޑަ ގައުމަކަށް ބަލާއިރު ވަރަށް ބޮޑު ކަމެއް ކަމަށެވެ.

"އިޒްރޭލުގެ ޕާސްޕޯޓް މަނާ ކުރުމަކީ ސަރުކާރުގެ ހިތްވަރުގަދަ ނިންމުމެއް. ކުޑަ ގައުމަކަށް ބަލާއިރު ވަރަށް ބޮޑުކަމެއް. އިޒްރޭލުގެ އަނިޔާވެރި ކަމުން އަޅުގަނޑުމެން ގެ އަޚުންނާއި އުޚުތުން ރައްކާތެރި ކުރައްވާށި. އާމީން"

ޑރ.އަލީ ޒާހިރު ގެ ޕޯސްޓްގައި ވެއެވެ.

އިސްރާއީލުގެ ޕާސްޕޯޓު މަނާކުރުމަށްޓަކައި ގާނޫނު އަސާސީ އަށް ގެންނަންޖެހޭ ބަދަލުތައް ގެނައުމަށް ނިންމާފައިވާކަމަށް ސަރުކާރުން ހާމަކޮށްފައިވަނީ އިއްޔެއެވެ.

އިއްޔެ ބޭއްވި ވަޒީރުންގެ ބައްދަލުވުމުގައި އިސްރާއީލުގެ ޕާސްޕޯޓު މަނާކުރުމުގެ އިތުރުން ވެސް ފަލަސްތީނުގެ ހައްގުގައި ރާއްޖެއިން މަސައްކަތްތަކެއް ކުރުމަށް ވަނީ ނިންމާފައެވެ.

ފަލަސްތީނުގެ ހައްގުގައި ރާއްޖެއިން ކުރުމަށް ނިންމާފައިވާ މަސައްކަތްތަކަކީ:

1. އިސްރާއިލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކައި ޤާނޫނުތަކަށް ގެންނަންޖެހޭ އިސްލާހްތައް ގެނައުމަށް ކެބިނެޓުން ނިންމެވުން އަދި މިކަން ކުރިއަށް ގެންދިއުމަށް ވަޒީރުންގެ މަޖިލީހުގެ ކޮމިޓީއެއް އެކުލަވާލުން.

2. ފަލަސްތީނާއި އިސްރާއީލްގެ މައްސަލައިގައި ރާއްޖޭގެ ފަރާތުން ފަލަސްޠީނުގެ ފަރާތުން އެދޭކަންކަން ދެނެގަތުމަށް ރައީސް ސްޕެޝިއަލް އެންވޯއިއެއް ކަނޑައަޅުއްވަން ނިންމެވުން.

3. ޔޫ.އެން ރިލީފް އެންޑް ވޯރކްސް އެޖެންސީ މެދުވެރިކޮށް ފަލަޞްޠީނުގެ ޙާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށްޓަކައި ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ނިންމުން

4. "ފަލަސްތީނާއިއެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބާއްވަންނިންމުން.

5. ދިވެހިރާއްޖެއިން އިސްނަގައިގެން ފަލަޞްޠީނުގެ މައްސަލައަށް އަވަސް ޙައްލެއް ގެނައުމަށްޓަކައި އިސްލާމީ ޤައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ނިންމުން

ސަރުކާރުން އިސްރާއީލުގެ ޕާސްޕޯޓް މަނާކުރުމަށް ނިންމުމާއިއެކު، ބޭރު ދުނިޔެ ހިމެނޭހެން އެތައް ބަޔަކު އަންނަނީ މި ނިންމުމަށް ތާއީދުކޮށް، ސަރުކާރަށް ތައުރީފް ކުރަމުންނެވެ.