އައްޑޫ ސިޓީގައި ސީޕްލޭން ހަބެއް ބިނާކުރުމުގެ މަސައްކަތް މިއަހަރުގެ ތެރޭގައި ފަށާނަން: ރައީސް މުޢިއްޒު

އައްޑޫސިޓީގެ ސީޕްލޭން ހަބެއް ބިނާކުރުމުގެ މަސައްކަތް މިއަހަރުގެ ތެރޭގައި ފަށައި އޭގެ މަންފާ ރައްޔިތުންނަށް ހޯދައިދޭނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މިއަދު އައްޑޫސިޓީގެ ހުޅުދޫ މީދޫގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

އެގޮތުން ރައީސް މުޢިއްޒު ވިދާޅުވީ އައްޑޫސިޓީ ހުޅުދޫ މީދޫ ބްރިޖާއި ގަން އިންޓަރނޭޝަނަލް އެއާޕޯޓު ތަރައްޤީކުރުމާއި ފަތުރުވެރިކަން ފުޅާކުރުމާއި އަދި ސީޕްލޭން ހަބެއް ބިނާ ކުރުމުގެ މަސައްކަތް އެކު އެކުއެކީގައި މިއަހަރުގެ ތެރޭގައި ފަށްޓަވާނެ ކަމަށެވެ.

އައްޑޫސިޓީގެ ބްރިޖާއި އެކީގައި އަޅުގަނޑުމެން ކުރިއަށް ގެންދާނެ، ގަން އިންޓަރނޭޝަނަލް އެއާޕޯޓްގެ މަސައްކަތް. އެތަން ފުރިހަމަ ކުރުން. ވަރަށް ވަރުގަދަ އިންޓަނޭޝަނަލް އެއާޕޯޓަކަށް އެތަން ހެދުމުގެ މަސައްކަތް. އައްސޭރި ޓޫރިޒަމް ޕްރޮޖެކްޓް މިސިޓީގައި ފެށުން. މަދުވެގެން 6000 އެދަށް ޓާގެޓް ކޮށްގެން ހިންގާ އައްސޭރި ޓޫރިޒަމް މަޝްރޫޢު ކުރިއަށް ގެންދިޔުމާއި، އެއާއި އެކީގައި ސީޕްލޭން ހަބެއް މިތަނުގައި ގާއިމް ކުރުމާއި. މި ހަތަރު ކަންތައް އެކު އެކީގައި މި ސިޓީ ގައި ވެގެން ދިޔައީމާ، މި ސިޓީގެ ރައްޔިތުންނަށް ލިބިގެންދާނީ ތިޔަ ލޮބުވެތި ރައްޔިތުން އަބަދާއި އަބަދު ތިޔަ އިންތިޒާރު ކުރައްވާ އުފާ ފާގަތިކަން.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މީގެ އިތުރުން ރައީސް މުޢިއްޒު ވިދާޅުވީ ހުޅުދޫ މީދޫގެ ޞީއްޙީ މަރުކަޒުވެސް ހޮސްޕިޓަލެއްގެ ފެންވަރަށް ބަދަލުކޮށްދެއްވާނެ ކަމަށެވެ. އެގޮތުން ގާއިމުކުރަންޖެހޭ ވަސީލަތްތައް ގާއިމުކުރައްވާނެކަމަށާއި ހަމަ އެހެންމެ އައްޑޫ އިކުއިޓޯރިއަލް ހޮސްޕިޓަލުގެވެސް ޚިދުމަތްތައް ފުޅާކޮށް ޞިއްޙީ ޚިދުމަތް ހޯދުމަށް މާލެދާން ނުޖެހޭނެ ފެންވަރަށް ބަދަލު ގެންނަވާނެކަމުގައި އެމަނިކުފާނު ވިދާޅުވިއެވެ.

މިއާއެކު ބިން ހިއްކުމާއި މަގުހެދުމާއި އަދި އެނޫންވެސް ހުޅުދޫ މީދޫ އަދި މުޅި އައްޑޫސިޓީއަށް ބޭނުންވާ ކަންކަމަށް ސަމާލުކަން ދެއްވައިގެން މަސައްކަތްތައް ކުރިއަށް ގެންގޮސްދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

އައްޑޫސިޓީ އާއި ފުވައްމުލައް ސިޓީ އަދި ގއ އާއި ގދ ގެ ބައެއް ރަށްރަށަށް ރައީސުލްޖުމްހޫރިއްޔާ ކުރައްވާ މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ