ފައިނޭންޝަލް ސާވިސް އޮތޯރިޓީގެ ޗެއާޕާސަންކަމަށް ކުރީގެ ނައިބު ރައީސް ޖިހާދު އައްޔަނުކުރައްވައިފި
މޯލްޑިވްސް އިންޓަނޭޝަނަލް ފައިނޭންސް ސާވިސް އޮތޯރިޓީ (އެމްއައިއެފްއެސްއޭ)ގެ ޗެއާޕާސަންގެ މަޤާމަށް، ކުރީގެ ނައިބުރައީސް ޢަބްދުالله ޖިހާދު އައްޔަންކުރައްވައިފިއެވެ.
އިކޮނޮމިކް މިނިސްޓަރު މުޙައްމަދު ސަޢީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުޙައްމަދު މުޢިއްޒު އެމްއައިއެފްއެސްއޭ ގެ ގަވަނިން ބޯޑް އެކުލަވާލައްވާ ޗެއާ ޕާސަންއަކަށް ކުރީގެ ނައިބު ރައީސް ޖިހާދު އައްޔަނުކުރައްވާފައި ވާކަމަށެވެ. އަދި ވަޒީރު ވަނީ ޖިހާދަށް މަރުހަބާ ވިދާޅުވެ، ރާއްޖޭގެ މާލީ ދާއިރާއަށް ހެޔޮ ބަދަލުތަކެއް ގެނައުމަށް ރައީސް ކުރައްވާ ތަސައްވަރު، ފުއްދަވާނެކަމުގެ ފުރިހަމަ ޔަގީންކަން އޮތްކަމަށް ވިދާޅުވެފައެވެ.
ރައީސް ޑރ. މުޙައްމަދު މުޢިއްޒު ދިވެހިރާއްޖޭގައި އިންޓަނޭޝަނަލް ފައިނޭޝަލް ސެންޓަރުތައް ގާއިމުކުރަން ވަނީ ވަޢުދުވެފައެވެ. އެގޮތުން އެމްއައިއެފްއެސްއޭ އުފައްދަން ނިންމާފައިވާކަން އެމަނިކުފާނު އިއުލާނުކުރެއްވީ މި އަހަރުގެ ޖެނުއަރީ މަހުގައެވެ.
އެމްއައިއެފްއެސްއޭ ގެ ޗެއާޕާސަންކަމަށް އައްޔަނު ކުރެއްވި، ކުރީގެ ނައިބު ރައީސް ޖިހާދަކީ، ކުރީގެ ރައީސް ޔާމީންގެ ސަރުކާރުގައި ނައިބު ރައީސްގެ މަޤާމް އަދާކުރެއްވުމުގެ ކުރިން ފައިނޭންސް މިނިސްޓަރުގެ މަޤާމު އަދާކުރެއްވި ވަޒީރެކެވެ. އަދި އެމަނިކުފާނު ވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރުކަމާ ސިވިލް ސަރވިސް ކޮމިޝަންގެ މެންބަރުކަންވެސް ކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
