މަޖިލީހުގެ މެންބަރުންގެ މުސާރައާއި ޢިނާޔަތް ކުޑަކުރާކަށް ނުފެނޭ: ޤާސިމް

ރައްޔިތުންގެ މަޖިލިސް މެންބަރުންގެ މުސާރައާއި ޢިނާޔަތް ކުޑަކުރުމަށް ނުފެންނަ ކަމަށް މާމިގިލީ ދާއިރާގެ މެންބަރު ޤާސިމް އިބްރާހިމް ވިދާޅުވެއްޖެ އެވެ.

މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި މަޖިލީހުގެ މެންބަރުންގެ އަދަދު މަދުކުރުމާ ގުޅޭގޮތުން ބާރަށު ދާއިރާގެ މެންބަރު އިބްރާހިމް ޝުޖާއު ހުށަހެޅުއްވި ގަރާރަށް ބަހުސްކުރެއްވަމުން ޤާސިމް ވިދާޅުވީ މެންބަރުންނަށް ދެ ދައުރަށްވުރެ ގިނަ ދައުރު އަދާ ނުކުރެވޭ ގޮތަށް ހެދުމަކީ ދުނިޔޭގެ އެއްވެސް ގައުމެއްގައި އޮންނ ކަމެއް ނޫން ކަމަށާ އެކަމާ އޭނާ ދެކޮޅުހައްދަވާ ކަމަށެވެ.

މަޖިލިސް މެންބަރުންނަށް ދެ ދައުރު އޮތުމަކީ ދުނިޔޭގެ އެއްވެސް ތަނެއްގައި އޮންނަ ގޮތެއްނޫން ކަމަށް އަޅުގަނޑު ގަބޫލު ކުރަނީ. އެއާ އަޅުގަނޑު ކަނޑައެޅިގެން ދެކޮޅު. އަދި ހަމަ އެހެންމެ މިއަދު މަޖިލީހުގެ މެންބަރުންނަށް ލިބޭ މުސާރަ ކުޑަ ކުރަންވެސް އަަޅުގަނޑަށް ނުފެންނަ ކަމަށް، އަދި ޢިނާޔަތްތައްވެސް ކުޑަ ކުރަން ނުފެންނަ ކަމަށް އަޅުގަނޑު ދަންނަވަން

ޤާސިމް އިބްރާޙީމް

ޤާސިމް ވިދާޅުވި ގޮތުގައި، ރާއްޖޭގައި އޮންނަނީ ޔުނިޓަރީ ދައުކަތެއް ކަމަށްވާއިރު، މިހާރު މެންބަރުންނަށް ލިބޭ މުސާރައާއި ޢިނާޔަތްތައް އޮތީ ޔުނިޓަރީ ދައުލަތެއްގައި އޮންނަންޖެހޭ އެންމެ ރަނގަޅު މިންވަރުގައެވެ.

މީގެ އިތުރުން، ޤާސިމް ފާހަގަކުރެއްވި ގޮތުގައި މަޖިލިސް މެންބަރުންނަށް 20،000 ރުފިޔާގެ އެލަވަންސެއް ލިބޭކަމަށް އޮތް ނަމަވެސް އެވަރަށް ނުލިބެއެވެ.

މަޖިލިސް މެންބަރުންނަކީ އެހެން އެއްވެސް ސިފައެއްގައި ހައްގު ގޮތުގައި އަތަށް ލާރިއެއް ލިބޭނެ ގޮތެއް އޮތް ބައެއް ނޫން. ދައުލަތުގެ އެހެން ވުޒާރާތަކާއި ކުންފުނިތަކާއި ތަންތަނުގެ ވެރިންނާއު އަދި އެތަންތަނުގެ މުވައްޒިފުންނަށް ލިބޭ ފަދައިން ފައިސާ އަތުގައި ޖެހޭ ބައެއް ނޫން މަޖިލިސް މެންބަރުންނަކީ

ޤާސިމް އިބްރާޙީމް

ގާސިމް އިތުރަށް ވިދާޅުވިގޮތިގައި، ގާނޫނުގެ ކުރިމަތީގައި އެންމެނަށް ހަމަހަމަ ފުރުސަތާއި، ހައްގު ތަކާއި އަދި ބައިވެރިވުންވެސް އޮންނައިރު، އެ ތިން ކަން ދާންވާނީ އެއްކޮށް ކަމަށެވެ. އެގޮތުން، ހަމަހަމަ ފުރުސަތު ލިބެންޖެހޭނީ، ބައިވެރިވުންވެސް އޮންނަ ކަމަށްވާނަމައެވެ.

އެންމެ ގިނައިން ޓެކްސް ދައްކާ ފަރާތްތަކަށްތޯ އުމުރުން ދުވަސްވެގެން ނޫނީ އަނެއް ކަމެއް ވެގެން، ނޫނީ އެންމެ ބޮޑު ޚިދުނަތެއް ކުރާ މީހާއަށްތޯ ދައުލަތުން އެހީތެރިކަމެއް ލިބެން ނުޖެހެނީ. ނޯ.. އަޅުގަނޑު ދެކޮޅު އެކަމާ. ގާނޫނު އަސާސީގައި ބުނަނީ އީކުއަލް ޕާޓިސިޕޭޝަންސް އޭ. އީކުއަލް ރައިޓްސް އޭ. އީކުއަލް އޮޕޮޗުނިޓީ އޮންނަންވާނެ. މި ތިނެތި ދާންޖެހޭނީ އެއް މަގަކަށް.

ޤާސިމް އިބްރާޙީމް

މިއާއެކު ގާސިމް ވަނީ މަޖިލީހުގެ މެންބަރުންގެ އަދަދު އާބާދީއަށް ބަލައިގެން ކަނޑައެޅުމުގެ ބަދަލުގައި ދާއިރާ ތަކަށް ބަހާލައިގެން ވަކި އަދަދަކަށް ދާއިރާތައް ބަހަށްޓައިގެން ކަނޑައެޅުމަށް ލަފާ ދެއްވާފައެވެ.

މަޖިލީހުގެ މެންބަރުންގެ މުސާރަ ކުޑަ ކުރަން ނުފެންނަ ކަމަށް ޤާސިމް ވިދާޅުވާއިރު، މެންބަރުންނަށް ކޮންމެ މަހަކު މުސާރައިގެ ގޮތުގައު، 42،500، ލިވިންގ އެލަވަންސްގެ ގޮތުގައި 20،000 އަދި ކޮމިޓީ އެލަވަންސްގެ ގޮތުގައި 20،000 ހިމެނޭހެން އެކު ޖުމްލަ މަދުވެގެން 82،500 ރުފިޔާ ކޮންމެ މަހަކު ގެއަށް ގެންދަން ލިބެއެވެ. މީގެ އިތުރުންވެސް ބޭސްފަރުވާ އާއި އެހެނިހެން ވެސް އާއްމު ރައްޔިތުންނަށް ނުލިބޭ އެތަށް ފަސޭހަތަށް އެ މެންބަރުންނަށް ލިބެއެވެ.