ހުޅުމާލެ ފޭސް ދޭއްގައި ދެ މިސްކިތެއް އެޅުމަށް ބިން ހަވާލުކޮށްފި

ހުޅުމާލެ ފޭސް ދޭއް ސަރަހައްދުގައި އިތުރު ދެ މިސްކިތެއް އެޅުމަށް ހައުސިންގ ޑިވެލޮޕްމެންޓް ކޯޕަރޭޝަން، އެޗް.ޑީ.ސީން މިއަދު އިސްލާމިކް މިނިސްޓްރީއަށް ބިންތައް ހަވާލުކޮށްފިއެވެ.

މިކަމާ ގުޅޭގޮތުން މިއަދު އިސްލާމީކަންތައްތަކާ ބެހޭ ވުޒާރާއާއި އެޗްޑީސީ އާ ދެމެދު ވަނީ މިކަމުގެ އެއްބަސްވުމުގައި ސޮއިކޮށްފައެވެ. މި އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ބްރިގޭޑިއާ ޖެނެރަލް (ރިޓަޔަރޑް) އަލީ ޒުހައިރުއެވެ. އިސްލާމިކް މިނިސްޓްރީގެ ފަރާތުން ސޮއިކުރެއްވީ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ

އިސްލާމިކް މިނިސްޓްރީން ބުނީ މިސްކިތް އެޅުމަށް ހަވާލުކުރި ބިންތަކުގެ ތެރެއިން ހުޅުމާލެ ލޮޓް ނަމްބަރު 22221 ގައި އަޅުމަށް ހަމަޖެހިފައިވާ މިސްކިތަކީ 2000-3000 މީހުންގެ ޖާގައިގެ މިސްކިތެއް ކަމަށެވެ. މި މިސްކިތުގެ ބިމުގެ ސައިޒަކީ 27920 ސްކޮއާފޫޓެވެ.

މީގެ އިތުރުން ހުޅުމާލެ ލޮޓް ނަމްބަރު 22242 ގައި އެޅުމަށް ހަމަޖެހިފައިވާ މިސްކިތަކީވެސް 2000-3000 މީހުންގެ ޖާގައިގެ މިސްކިތެއްކަމަށް އިސްލާމިކް މިނިސްޓްރީން ވަނީ ބުނެފައެވެ. މި މިސްކިތުގެ ބިމުގެ ސައިޒަކީ 20720 ސްކޮއާފޫޓެވެ.

ހުޅުމާލޭ ފޭސް ދޭއްގައި އިތުރު ދެ މިސްކިތް އެޅުމަށް ބިން ހަވާލުކޮށްފައިވާއިރު، ހުޅުމާލޭ ފޭސް 2 ގައި ބިނާ ކުރަމުންްދާ ދާއިމީ ބައެއް މިސްކިތްތައް މި އަހަރު ހުޅުވިގެންދާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ. މީގެ ތެރޭގައި ނުނިމި ދިގުލަމުންދާ ދެ މިސްކިތް ހިމެނެއެވެ. ފޭސް 2 ގައި މިހާރުވެސް 2800 މީހުންގެ ޖާގައިގެ މިސްކިތަކާއި، 3000 މީހުންގެ ޖާގައިގެ މިސްކިތަކާއި، 1500 މީހުންގެ ޖާގައިގެ މިސްކިތެއްގެ އިތުރުން 1162 މީހުންގެ ޖާގައިގެ މިސްކިތެއްގެ ޢަމަލީ މަސައްކަތް ކުރަމުން އަންނަކަން ފާހަގަކޮށްލެވެއެވެ.