ރަށްރަށުގެ އިހުތިސާސްގައި ހިމެނޭ ބިންތައް ސަރުކާރަށް ނެގޭގޮތަށް ހުށަހެޅި އިސްލާހާ ދެކޮޅަށް ޕެޓިޝަނެއް

ރަށްރަށާއި ސިޓީ ކައުންސިލްތަކުގެ އިހުތިސާސްގައި ހިމެނޭ ބިންތައް ސަރުކާރުގެ މަޝްރޫއުތަކަށް ނެގޭގޮތަށް، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށަހަޅާފައިވާ އިސްލާހުތަކާ ދެކޮޅަށް ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފިއެވެ.

މިދުޢަމް ސައުދު އިސްވެ ހުންނަވައި ރައްޔިތުންގެ މަޖިލީހުގެ އީ-ޕެޓިޝަން ޕޯޓަލް މެދުވެރިކޮށް ހުށަހަޅާފައިވާ މި ޕެޓިޝަނުގައި މިހާތަނަށް 765 މީހުން ވަނީ ސޮއިކޮށްފައެވެ. މި ޕެޓިޝަނުގެ މައިގަނޑު މަގުސަދަކީ މިހާރު މަޖިލީހަށް ހުށަހެޅިފައިވާ ލާމަރުކަޒީ ގާނޫނުގެ އިސްލާހުތައް އަނބުރާ ގެންދިއުމަށް ގޮވާލުމެވެ.

ޕެޓިޝަނުގައި ފާހަގަކޮށްފައިވާ ގޮތުގައި، މި އިސްލާހުތަކުގެ ސަބަބުން ރައްޔިތުންގެ ވޯޓުން ހޮވާފައިވާ ކައުންސިލަރުންގެ ބާރު ކެނޑި، އެ ބާރުތައް ވަޒީރުންގެ މަޖިލީހަށް ލިބިގެންދާނެއެވެ. އަދި ވަޒީރުންގެ މަޖިލީހުގެ ނިންމުންތަކަށް އެއްބާރުލުން ނުދޭ ކަމަށް ބުނެ، ރައްޔިތުން ތަމްސީލުކުރާ ކައުންސިލަރުންނަށް ފިޔަވަޅު އެޅުމުގެ ފުރުސަތު ފަހިވެ، ރައްޔިތުންގެ ބަސްބުނުމުގެ ހައްގު ހަނިވެގެންދާނެ ކަމަށްވެސް ޕެޓިޝަނުގައި ބުނެފައިވެއެވެ. މި އިސްލާހުތަކަކީ ލާމަރުކަޒީ ގާނޫނުގެ ރޫހާ ހިލާފު، ރައްޔިތުންގެ ބާރު ހަނިކުރާ ކަންތައްތަކެއްގެ ގޮތުގައި ޕެޓިޝަނުގައި ސިފަކޮށްފައިވެއެވެ.

ތުޅާދޫ ދާއިރާގެ އަމިއްލަ މެންބަރު ޢަބްދުލްޙަންނާނު އަބޫބަކުރު ހުށަހަޅުއްވާފައިވާ މި ބިލު މިހާރު އޮތީ މަޖިލީހުގެ ކޮމިޓީ މަރުހަލާގައެވެ. މި ބިލު ހުށަހެޅުމުގެ ބޭނުމެއް ކަމަށް ބުނެފައިވަނީ، ސަރުކާރުގެ ތަރައްގީގެ މަޝްރޫއުތައް ހަލުވި ދުވެއްޔެއްގައި ކުރިއަށް ގެންދިއުމަށްޓަކައި ކައުންސިލްތަކުގެ އެއްބާރުލުން ކަށަވަރުކުރުމާއި، ބިންތަކާ ގުޅޭ އިޖުރާއާތުތައް ހަރުދަނާކުރުމެވެ.

ހުށަހެޅިފައިވާ އިސްލާހުގައިވާ ގޮތުން، ކައުންސިލެއްގެ އިހުތިސާސްގައި ހިމެނޭ ބިމެއްގައި ސަރުކާރުން މަޝްރޫއެއް ހިންގަން ބޭނުންވެއްޖެ ނަމަ، އެ ބިމެއް ކައުންސިލްގެ އިހުތިސާސުން ވަކިކުރުމަށް ވަޒީރުންގެ މަޖިލީހަށް ނިންމިދާނެއެވެ. އަދި އެކަން އެންގުމުން އެ ބިމެއް ކައުންސިލްގެ މިލްކިއްޔަތުން ވަކިވެ، ދައުލަތުގެ ބާރު ހިނގާ ތަނަކަށް ބަދަލުވާނެއެވެ.

މީގެ އިތުރުން، ރަށުގެ ޕްލޭން ފާސްކުރުމުގެ ކުރިންވެސް ސަރުކާރުގެ މަޝްރޫއަކަށް ބިމެއް ބޭނުންވެއްޖެނަމަ އެ ބިމެއް ހަވާލުކުރުން ކައުންސިލްތަކަށް މި އިސްލާހުންު ލާޒިމްކުރެއެވެ. އަދި މަގުބޫލު ސަބަބެއް ނެތި ސަރުކާރުގެ މަޝްރޫއުތަކަށް ހުރަސްއެޅުމާއި، މަޝްރޫއުތައް ހުއްޓޭ ފަދަ ނިންމުންތައް ނިންމުން ކައުންސިލްތަކަށް މަނާކުރުންވެސް މި އިސްލާހުގައި ހިމެނެއެވެ.