މިދިޔަ މަހު އެކަނިވެސް ސްކޭމްތަކަށް މިލިއަނަކަށް ވުރެ ގިނަ ރުފިޔާ ގެއްލުނު

މިދިޔަ ޖެނުއަރީ މަހު އެކްނިވެސް ސްކޭމްތަކުގައި މިލިއަނަކަށް ވުރެ ރުފިޔާ ގެއްލިފައިވާކަމަށް ފުލުހުން މައުލޫމާތުދީފިއެވެ.

ފުލުހުން އާންމުކުރި ހިސާބުތަކުގައި ވާގޮތުން، މުޅި ޖުމުލަ 189 މައްސަލައެއްގައި މިދިޔަ މަހު ފައިސާ ގެއްލިގެން ވަނީ ހުށަހަޅާފައެވެ. އެ މައްސަލަތަކުގައި 1.7 މިލިއަން ރުފިޔާ ގެއްލިފައިވާއިރު، އަނބުރާ ހޯދިފައިވަނީ 630،319.15 ރުފިޔާކަމަށްވެސް މި ހިސާބުތަކުގައި ހާމަކޮށްފައިވެއެވެ. ފުލުހުން ބުނި ގޮތުގައި، އެ މައްސަލަތަކުގެ ތެރެއިން އެއްކޮށް ފައިސާ ހޯދުނީ، 52 މީހުންނެވެ. އެގާރަ މީހުންގެ ހޯދައިދެވުނީ، ގެއްލުނު ފައިސާއިން ބައެއް ކަމަށް ފުލުހުން ވަނީ ބުނެފައެވެ.

މިދިޔަ މަހު އެންމެ ގިނަ މީހުން ފުލުހުންނަށް ރިޕޯޓުކޮށްފައިވަނީ އީކޮމާސް ސްކޭމްގެ މައްސަލަތަކެވެ. އެ ބާވަތުގެ 109 މައްސަލަ ހުށަހަޅާފައިވެއެވެ. އަދި ޑޮލަރު މާރު ކުރުމުގެ ސްކޭމްގައި ވެސް 36 މީހަކު މިދިޔަ މަހު ޖެހިފައިވެއެވެ. މީގެ އިތުރަށް، މީހެއްގެ ފަރާތުން ކަމަށް ހެދިގެން އޮޅުވާލައިގެން 17 މީހެއްގެ އަތުން މަކަރާއި ހީލަތުން މިދިޔަ މަހު ސްކޭމަރުން ވަނީ ފައިސާ ހޯދާފައެވެ.

އެ މައްސަލަތަކުގައި ބޭނުންކޮށްފައިވާ މަންސަތަކުގެ ތެރޭގައި، ފޯނު ކޯލާއި އައިބޭއާއި އޮންލައިން މެސެޖިން ޕްލެޓުފޯމުތަކާއި ފިޝިން ލިންކުތަކާއި ފޭސްބުކް މާކެޓު ޕްލޭސް ހިމެނޭ ކަމަށް ހިސާބުތަކުން ދައްކައެވެ.

ބަލި މީހުންނަށް އެހީވުމުގެ ނަމުގައި ސްކޭމް ކުރުން އިތުރުވާތީ ފުލުހުން ވަނީ، އެ ފަދަ ސްކޭމަރުންނަށް ސަމާލުވެ، ރައްކާތެރިކަމުގެ ފިޔަވަޅުތައް އަޅަން އިލްތިމާސްކޮށްފައެވެ.