ދިވެހީންގެ ނަމުގައި 10 ރިސޯޓް ތަރައްގީކޮށް ކޮންމެ އަހަރަކު ހުރިހާ ދިވެހީންނަށް ފައިދާ ބަހަން ފަށަނީ

ދިވެހީންގެ ނަމުގައި މަދުވެގެން 10 ރިސޯޓް ތަރައްގީކޮށް ކޮންމެ އަހަރަކު ހުރިހާ ދިވެހީންނަށް ފައިދާ ބަހަން ނިންމާ އެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިއުލާނު ކުރައްވައިފި އެވެ.

އެމަނިކުފާނު އެކަން އިއުލާނު ކުރެއްވީ މިއަދު އިއްވެވި ރިޔާސީ ބަޔާނުގަ އެވެ. ރައީސް ވިދާޅުވީ ދިވެހި ފަތުރުވެރިކަމަށް 50 ވުރެެ ގިނަ އަހަރު ވެގެން ދިޔަނަމަވެސް ހުރިހާ ދިވެހީންނަށް އެ ސިނާޔަތުން ފައިދާ ލިބޭނެ ގޮތެއް ފަހިވެފައި ނެތް ކަމަށެވެ. އެއީ ހަމަޖެހޭ އަދި ގަބޫލު ކުރެއްވޭނެ ކަމެއް ނޫން ކަމުގައި ވިދާޅުވި އެވެ.

ރައީސް ވިދާޅުވީ މި ރާއްޖޭގެ ފަޅުތަކާއި ރަށްތަކާއި ގިރިތަކާއި އެ ނޫން ކޮންމެ ތަނަކީ ހުރިހާ ދިވެހީންގެ މިލްކުވެރިކަން އޮތް ތަންތަން ކަމަށެވެ. އެހެން ކަމުން ފަތުރުވެރިކަމުން ދިވެހި ހުރިހާ ރައްޔިތުންނަށް ހަމަހަމަ ކަމާއެކު މަންފާ ލިބެން ޖެހޭ ކަމުގައި ވިދާޅުވި އެވެ.

އެކަމަށް މަގު ފަހި ކުރުމުގެ ގޮތުން ދިވެހީންގެ ނަމުގައި މަދުވެގެން 10 ރިސޯޓް ތަރައްގީކޮށް ކޮންމެ އަހަރަކު ހުރިހާ ދިވެހީންނަށް ފައިދާ ބަހަން ނިންމާފައިވާ ކަމުގައި ރައީސް ވިދާޅުވި އެވެ.

"ސަރުކާރުގެ ކުންފުންޏެއް މެދުވެރިކޮށް ކުރިއަށް އޮތް ތިން އަހަރު ދުވަހުގެ ތެރޭގައި މަދުވެގެން 10 ރިސޯޓް ތަރައްޤީކޮށް އެ ރިސޯޓްތަކުން ލިބޭ ފައިދާގެ ބޮޑު ބައެއް ހަމަ އެއްވެސް ރައްޔިތަކު ބާކީ ނުކޮށް ރާއްޖޭގެ ކޮންމެ ރައްޔިތެއްގެ ބޭންކު އެކައުންޓަށް ހަމަހަމަ ކަމާއެކު އަހަރަކު އެއް ފަހަރު ބޭރު ފައިސާއިން ޖަމާކޮށްދޭން," ރައީސް ވިދާޅުވި އެވެ.

ރައީސް ވިދާޅުވި ގޮތުގައި މި ގޮތަށް ތަރައްގީކުރާ ހުރިހާ ރިސޯޓެއްގެ ހިއްސާ ދިވެހި ހުރިހާ ރައްޔިތުންނަށް ލިބޭ ގޮތަށް ގާނޫނުގައި އެކަން ކަނޑައަޅުއްވާނެ ކަމުގައި ރައީސް ވިދާޅުވި އެވެ.

އަންދާޒާ: 2030 ގައި ފައިދާ ޖަމާކުރެވެން ފެށޭނެ

ރައީސް ވިދާޅުވި ގޮތުގައި ރިސޯޓްތައް ތަަރައްގީކޮށް ކުރިއަށް އޮތް 2030 ވަނަ އަހަރުން ފެށިގެން ފައިދާ ޖަމާކުރަން ފެށޭނެ ކަމަށް އުންމީދު ކުރައްވާ ކަމުގައި ރައީސް ވިދާޅުވި އެވެ.

ރައީސް ވިދާޅުވި ގޮތުގައި އަންދާޒާ އަކީ އަހަރަކު ކޮންމެ ރައްޔިތެއްގެ އެކައުންޓަށް 400 ޑޮލަރު ޖަމާވުން ކަމަށެވެ. އަދި ވިދާޅުވީ އެ އުންމީދު ހަގީގަތަކަށް ހެދުމަށް ވަރަށް ހަލުވިކަމާއެކު މަސައްކަތް ކުރައްވާނެ ކަމަށް ރައީސް ވިދާޅުވި އެވެ.