ފައިސާއަށް ހިޔާނާތްތެރިވި ބީއެމްއެލްގެ މުއައްޒަފަކު ޖޫރިމަނާކޮށް މުޖުތަމައަށް ހިދުމަތްކުރަން ހުކުމްކޮށްފި

ކަސްޓަމަރުންގެ 4 ލައްކަ އަށް ވުރެ ގިނަ ފައިސާއަށް ހިޔާނާތްތެރިވި ބޭންކް އޮފް މޯލްޑިވްސް (ބީއެމްއެލް) ގެ މުއައްޒަފަކު ޖޫރިމަނާކޮށް، މުޖުތަމައަށް ހިދުމަތްކުރަން ކްރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ހިޔާނާތްތެރިވުމުގެ ކުށުގެ ދައުވާ ދައުލަތުން އުފުލާފައިވަނީ ބ.އޭދަފުށި/ހިޔާވަހި، އަލީ މާޒިންގެ މައްޗަށެވެ.

މިގޮތުން ކްރިމިނަލް ކޯޓުން ކުރި ހުކުމްގައި ބުނީ، 18 ސެޕްޓެމްބަރު 2012 އިން ފެށިގެން 26 އޮކްޓޫބަރު 2021 އާއި ހަމައަށް މާޒިން ބީއެމްއެލްގެ ކަސްޓަމަރ ސަރވިސް އެސިސްޓެންޓެއްގެ ގޮތުގައި މަސައްކަތް ކުރިއިރު، މަޤާމުން އޭނާއަށް ލިބިފައިވާ މަޢުލޫމާތާއި ބާރުގެ ބޭނުންކޮށްގެން 13 ކަސްޓަމަރެއްގެ މައުލޫމާތު ބީއެމްއެލްގެ ސީއާރްއެމް ސިސްޓަމްއިން ބަދަލުކޮށް، ކަސްޓަމަރުންގެ ހުއްދަ ނެތި އެ ކަސްޓަމަރުންގެ އިންޓަނެޓް ބޭންކިން ރަޖިސްޓްރީ ކޮށްފައިވާ ކަމަށެވެ.

މިގޮތުން އޭނާ ވަނީ މި ކަސްޓަމަރުްގެ އެކައުންޓުން ޖުމްލަ 482،611 ރުފިޔާ ޞައްޙަނޫން ކްރެޑިޓް ކާޑު ޕޭމަންޓުގެ ގޮތުގައާއި، ފޮރެކްސް ޓްރާންސެކްޝަނުގެ ގޮތުގައާއި، މާޒިންގެ އަމިއްލަ އެކައުންޓަށް ޖަމާކޮށް، އަމިއްލަ ފައިސާގެ ގޮތުގައި އެ ފައިސާއިން މުޢާމަލާތްކޮށް އެފައިސާއަށް ޚިޔާނާތްތެރިވެފައެވެ.

އެ މައްސަލާގައި މާޒިން ކުށަށް އިއުތިރާފް ވުމުގެ އިތުރުން، ޕްރޮސެކިއުޓާ ޖެނެރަލް (ޕީޖީ) އޮފީހާއިއެކު، އިއުތިރާފު އެއްބަސްވުމެއް ހަދާފައިވާއިރު، މި އެއްބަސްވުމުގެ ދަށުން އޭނާގެ މައްޗަށް އޮތް އަސްލު އަދަބު ކަމުގައިވާ 9 މަހާއ 18 ދުވަހުގެ ޖަލު ހުކުމް 40 ގަޑިއިރު މުޖުތަމައަށް ހިދުމަތްކުރުމަށާއި، 56،200 ރުފިޔާގެ ޖޫރިމަނާއަކަށް ބަދަލުކުރުމަށްވަނީ ކަނޑައަޅާފަ އެވެ.

ހަމައެއާއިއެކު، ބީއެމްއެލްއާއި މާޒިންގެ މެދުގައި ހަދާފައިވާ އެއްބަސްވުމާ އެއްގޮތަށް ބޭންކަށް ފައިސާ ދެއްކުމަށް ވެސް މި އެއްބަސްވުމުގައި ބަޔާން ކުރެއެވެ.

އެހެންކަމުން، ކްރިމިނަލް ކޯޓުން ވަނީ މާޒިން 40 ގަޑިއިރު މުޖުތަމައަށް ހިދުމަތްކުރުމަށާއި، 56،200 ރުފިޔާގެ ޖޫރިމަނާ ކުރުމަށް ހުކުމްކޮށް، ޖޫރިމަނާގެ ފައިސާ ތިން މަސްދުވަހުގެ ތެރޭގައި މީރާ އަށް ދެއްކުމަށް ހުކުމްކޮށްފައެވެ.