ސިޔާސީ އެއްވެސް ލީޑަރަކު ޖަލުބަންދުގައި ނުހުންނާނެ: ރައީސް ސޯލިހު
މިސަރުކާރުގައި ސިޔާސީ އެއްވެސް ލީޑަރަކު ޖަލުބަންދުގައި ނުހުންނާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ށ.ފޯކައިދޫގައި ކުރިއަށްދިޔަ އެޖެންޑާ19ގެ ކެމްޕެއިން ޖަލްސާއެއްގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ އެމަނިކުފާނު ވެރިކަމަށް ވަޑައިގެންނެވުނީ ވަރަށް ދަތި ހާލުން ކަމަށާއި ސިޔާސީގޮތުން އޭރު ޚިޔާލުތަފާތު ކޮންމެ މީހަކު ދިޔައީ ބަންދުކުރެވެމުންކަމަށެވެ.
އެމަނިކުފާނު ވިދާޅުވީ އެ ހާލަތު ގޯސްވެގެން ޕީޕިއެމް ފިޔަވައި ހުރިހާ ޕާޓީތަކުން އެކުގައި ނިކުމެ މަސައްކަތް ކުރީ އެކަންކަން ބަދަލުކުރުމަށްޓަކައި ކަމަށެވެ. އަދި މިއަދު ހަމަ ގައިމުވެސް ސިޔާސީ އެއްވެސް ލީޑަރަކު ޖަލުގައި ބަންދު ކުރެވިފައެއް ނުހުންނާނެކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ ރާއްޖޭގެއޭރުގެ ހާލަތަށް ބަލައިލާއިރު އަސާސީ ހައްގުތައް ރާއްޖޭގެ ރައްޔިތުންގެ ކިބައިން ވަނީ ނިގުޅައިގެންފައިކަމަށެވެ. އެގޮތުން އެއްވެ އުޅުމާއި ހިޔާލު ފާޅު ކުރުމާއި އަދި ނޫސްވެރިކަމުގެ މިނިވަންކަން ނެތޭ ބުނުމަކީ ދޮގަކަށް ނުވާނެކަމަށް އެމަނިކުފާނު ފާހަގަކުރެއްވިއެވެ.
"ކަރަޕްޝަނާއި ވައްކަން އިންތިހާއަށް ސަރުކާރުގެ ތެރޭގައި އޮތީ މޫ ލައިފަ. ކޮންމެ ބޮޑު ޕްރޮޖެކްޓަކާ ގުޅިގެން އެކަމަކާ ހަވާލުވެތިބި ވެރިންގެ ބޮލުގައި އެތައް ކޮރަޕްޝަނާއި ވައްކަމުގެ ޒިންމާވަނީ އެޅިފަ"، ރައީސް ސޯލިހު ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
