ޕީއެޗްޑީ ހިމެނޭހެން ހަންގޭރީގައި ކިޔެވުމަށް 25 ސްކޮލަރޝިޕް ފުރުޞަތު

ޕީއެޗްޑީ ހިމެނޭހެން ހަންގޭރީގައި ކިޔެވުމަށް 25 ސްކޮލަރޝިޕަކަށް އެދުމުގެ ފުރުޞަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން ހުޅުވާލައިފިއެވެ.

މަތީ ތަޢުލީމާބެހޭ ވުޒާރާއިން ކުރި އިއުލާނެއްގައި ވާގޮތުން، މި ސްކޮލަރޝިޕްތަކުގައި ކިޔެވޭނީ ހަންގޭރީގެ ޔުނިވަރސިޓީތަކުން ކަމަށެވެ.

މި ސްކޮލަރޝިޕްގެ ދަށުން ބެޗްލަރސް ޑިގްރީއަށް ކިޔެވުމަށް 8 ފުރުޞަތާއި މާސްޓަރސް ޑިގްރީއަށް ކިޔެވުމަށް 14 ފުރުޞަތާއި ޕީއެޗްޑީއަށް ކިިޔެވުމަށް 3 ފުރުޞަތު ދިނުމަށް ހަމަޖެހިފައިވާކަމަށް އިއުލާނުގައިވެއެވެ.

އަދި މި ސްކޮލަރޝިޕްތަކުގައި ކޮންމެ ދަރިވަރަކަށްވެސް ހުށައެޅޭނީ ފުލްޓައިމް އެއް ޕްރޮގްރާމަށްކަމަށްވާއިރު، ސްކޮލަރޝިޕްގައި ކިޔެވުމަށް އެދި ހުށައަޅާ ދަރިވަރުން ވުޒާރާއިން ޝޯޓްލިސްޓުކޮށް، ސްކޮލަރޝިޕަށް ހޮވޭ ދަރިވަރުން ކަނޑައަޅާނީ ސްކޮލަރޝިޕްދޭ ފަރާތުންކަމަށް މަތީ ތަޢުލީމާބެހޭ ވުޒާރާގެ އިއުލާނުގައިވެއެވެ.

މި ސްކޮލަރޝިޕްތަކުގެ ދަށުން ދެކޮޅު ޓިކެޓާއި ވިސާގެ ޚަރަދު މަތީ ތަޢުލީމާބެހޭ ވުޒާރާއިން ހަމަޖައްސައިދޭނެ ކަމަށާ، ކޯސް ފީއާއި ޓިޔުޝަން ފީއާއި މެޑިކަލް އިންޝުއަރެންސްގެ އިތުރުން ދިރިއުޅުމުގެ ޚަރަދުން ބައެއް ސްކޮލަރޝިޕްދޭ ފަރާތުން ހަމަޖައްސައިދޭނެ ކަމަށް އިއުލާނުގައިވެއެވެ.

މި ސްކޮލަރޝިޕްތަކުގެ ދަށުން ކިޔެވޭނެ ދާއިރާތަކާއި، ސްކޯލަރޝިޕްތަކަށް އެދުމުގެ ޝަރުތުތައް، މަތީ ތައުލީމާ ބެހޭ ވުޒާރާގެ އިއުލާނުގައި ހިމަނާފައިވެއެވެ.

ސްކޮލަރޝިޕަށް އެދި މަތީ ތަޢުލީމާބެހޭ ވުޒާރާގެ މައި އެޑިޔު ޕޯޓަލް މެދުވެރިކޮށް ހުށައެޅޭނެ ކަމަށާ ހުށައެޅުންތައް ބަލައިގަތުމުގެ ސުންގަޑިއަކީ މި ފެށޭ ޖެނުއަރީ މަހުގެ 15 ވަނަ ދުވަހުގެ 14:00 ކަމަށްވެސް އިއުލާނުގައި ވެއެވެ.