އިންސާފު ލިބޭނީ ރާއްޖޭގެ މިސްރާބު އިންސާފުގެ މަގަށް ބަދަލުކޮށްގެން: ޚަލީލް

ދިވެހިރާއްޖޭގެ މިސްރާބު އިންސާފުގެ މަގަށް ބަދަލުކޮށްގެން ނޫންގޮތަކަށް ރާޢްޖޭގެ ރައްޔިތުންނަށް އިންސާފު ނުލިބޭނެ ކަމަށް ނިލަންދޫ ދާއިރާގެ މެންބަރު ޑރ. ޢަބްދުالله ޚަލީލް ވިދާޅުވެއްޖެއެވެ.

މެންބަރު ޚަލީލް މިހެން ވިދާޅުވީ އިއްޔެ ބޭއްވި މަޖިލީހުގެ ޖަލްސާގައި ވާހަކަ ދައްކަވަމުންނެވެ.

ޚަލީލް ވިދާޅުވި ގޮތުގައި ރާއްޖޭގެ މިސްރާބު އިންސާފުގެ މަގަށް ބަދަލު ނުކުރަންޏާ ރައްޔިތުންނަށާއި މަޖިލީހުގެ މެންބަރުންނަށް ވެސް އިންސާފު ލިބޭނެ މަގެއް ނޯންނާނެ ކަމަށެވެ.

"ރާއްޖެ މިދާ މިސްރާބު، އިންސާފުގެ މަގަށް ބަދަލުކޮށްގެން ނޫނިއްޔާ ރާއްޖޭގެ ރައްޔިތުންނަށް، އަޅުގަނޑުމެން މިތާ މިތިބަ ރައްޔިތުންގެ މަޖިލީހުގެ މެންބަރުންނަށް، ވަކިވަކި ފަރުދުންނަށް އިންސާފު ލިބޭނެ މަގެއް ނެތް." ޚަލީލް ވިދާޅުވިއެވެ.

ސަރުކާރުގެ ފަރާތުން ހުށަހަޅާފައިވާ އިންތިޤާލީ އަދާލަތުގެ ބިލަށް އިޝާރާތް ކުރައްވައި ވާހަކަ ދައްކަވަމުން ޚަލީލް ވިދާޅުވީ، މިއަދު ފެނިވަޑައިގަންނަވަނީ ދައުލަތް އިންސާފުގެ މަގުން އެއްކިބާވެ ނާއިންސާފާއި ދިމާލަށް ދަތުރުކުރާ މަންޒަރު ކަމަށެވެ.

ޚަލީލް ވިދާޅުވި ގޮތުގައި އިންތިޤާލީ އަދާލަތުގެ ބިލުގެ ސަބަބުން ރައްޔިތުންގެ ހިތްތަކަށް ނުރައްކާތެރި ސިގްނަލްތަކެއް ވައްދާ މަންޒަރު ފެނިވަޑައިގަންނަވާ ކަމަށެވެ.

"އަޅުގަނޑުމެންނަށް މި ފެންނަނީ ރާއްޖޭގެ ރައްޔިތުންގެ ހިތްތަކަށް ނުރައްކާތެރިކަމުގެ ސިގުނަލްތައް ވައްދާ މަންޒަރު އަޅުގަނޑުމެންނަށް މި ފެންނަނީ. އިއްޒަތްތެރި ރައީސް ، ވަރަށް ނުރައްކާތެރި ކަމެއް މިއީ." ޚަލީލް ވިދާޅުވިއެވެ.

އަދި އިންސާފު ޤާޢިމްކުރުމަށް ކަމަށް ބުނެ އުފައްދާ ކޮމިޝަންތަކަށް ޕާޓީގެ އެކްޓިވިސްޓުން އައްޔަންކުރުމުގެ ފުރުސަތު އޮތްކަމަށް ވެސް ޚަލީލް ވިދާޅުވިއެވެ.

މީގެ އިތުރުން އިންތިޤާލީ އަދާލަތު ޤާއިމްކުރުމަށް އުފައްދާ ކޮމިޝަނުން ހަމައެކަނި 2012 ފެށިގެން ހިނގާފައިވާ މައްސަލަތައް ބަލާތީ އެފަދަ ކޮމިޝަންތައް އުފައްދަނީ ވަކި ބަޔަކަށް ޓާގެޓްކޮށްގެންތޯ ވެސް ޚަލީލް ވަނީ ސުވާލު އުފައްދަވާފައެވެ.